I Kôrintô 3:16-23
“Thoi noh na iĕm ‘nĕ pơang tơdrong hơgei kon bơngai ala teh âu” (I Kôrintô 3:21a)
Nơ̆r jet tơchĕng pơwao:
– “Hơgei tơdrong ala teh” đei pơma hơđăl lăm trong 21 thoi yơ?
– Yua kơ kiơ noh bơih “pơrăm hnam ‘Bok Kei-Dei?
– Lăm tơdrong arih gah bơhngol, ih ngăl pơang gah tơdrong kiơ?
‘Bok Pôl đei chih roi kơ ‘nhŏng oh lăm Bơngai Lui Kôrintô noh bơih “Hnam akŭm ‘Bok Kei-Dei”. Hăm lu bơngai Juđê, hnam akŭm noh anih rơgoh ‘lơ̆ng păng kơmĭl ‘lơ̆ng Kră Yang ‘Bok Kei-Dei oei pơgơ̆r ‘Bok Pôl yua iŏk rup pơtih gia rơgoh ‘lơ̆ng ‘nâu wă kơ lu bơngai lui Kôrintô ‘bôh thoi âu, tơdrong “pơrăm hnam akŭm”, ‘bok Pôl wă pơma kơ tơdrong pơang gah kon bơngai, yua kơ tơdrong khan kơdih kiơ̆ khul bu, tơklah băl khul, dang wă pơrăm trăp tih dêh. Pơm thoi ‘nâu ưh kơ sĭ wă kơ jing pơjah pơjăng băl, tơklah băl lăm khul bơngai lui Kôrintô đĕch ôh, na mă tơpă đei tơ’bôh, ‘noh kư̆m gơh jing tơklah băl păng tơdrong ‘mêm bơngai lui, đơ̆ng noh bơih kon bơngai ưh kơ băt lu sư jơ̆ bơngai pơhrăm păng Kră Yang (Yôhan 13:35). ‘Bok Pôl, bơngai mă đêl oei lăm khul Pharisi, đei hŏk pơhrăm hlôh jrŭ; ‘Bok Apôlê bơngai mă đei ‘bơ̆r đon hơgei păng hŏk pơhrăm jrŭ hlôh lơ; ‘Bok Sêpha (Pêtrôs) bơngai mă adrin tơpă păng đei Kră Yang mơnat, mă trŏ sư lăng lu sư thoi lu bơngai “’nhŏng oh”, wang tơgŭm pơjing đon lui lu bơngai lui Kôrintô (trong 21-22), lei na tă kơ jing bơngai mă pơm kơ bơngai tơklah băl.
Kiơ̆ kơ I Kôrintô 3:15 dah đon lui dan ‘bơ̆t kơpal hơnă Kră Yang Yêsu Krist lei bơngai lui kư̆m gơh dŏng “đơ̆ng ŭnh sa”, đơ̆ng noh nơ̆r “pơrăm” lăm âu ưh kơ đei wă khan hiong lê̆ tơdrong dŏng pơklaih ôh, na wă khan dôm tơdrong đơ̆ng bơngai noh adrin ŭnh gô sa ngăl. Lơ bơngai khan “Tuch luch gơh klaih noh huay bơih”. Mă khan lei ră, dah khei sơnăm oei arih na nŏng kơ pơjah tơhil băl, ưh kơ hiôk dih băl, ưh kơ mơn đơ̆ng tơdrong pŭn hiôk Kră Yang lei na arih thoi noh trŏ kơ arih dah ưh?
Hlĭch tơpă, kơplah nao lui kơ Kră Yang, bơ̆n băt bơnê kơ Kră Yang yua kơ bơ̆n gơh dong đơ̆ng tơdrong pơmat tih Kră Yang, đơ̆ng ‘long pơglang Kră Yang Yêsu, mălei kiơ̆ kơ jơ năr hlôi, tơdrong mă bơ̆n hiôk lăp đon păng pơang kơdih khan tơdrong ‘mêm, ‘long pơglang, tơdrong mơnat noh ưh kơ đei đơ̆ng Kră Yang ăn kơ bơ̆n! Nơ̆r Kră Yang bơtho ‘nĕ kơ pơang gah kon bơngai. Dah bơ̆n gơh dơ̆ng ‘bơ̆t anih băt bơnê kơ bơngai mă tơiung bơ̆n lei ‘lơ̆ng dêh, mălei lui gơnang kơ bơngai ‘nâu wă kơ jing pơtŏ pơting, pơjah pơjei bu hloh kơ bu. Pơang lei gô iŏk tơdrong ưh kơ ‘lơ̆ng tih dêh.
Kơkuh kơ Ih Kră Yang, jơhngơ̆m mă pơm tơklah đei pơrăm Khul Bơngai Lui trăp dêh. Apinh Ih tơgŭm inh pơ’lơ̆ng băt pơting tơdrong inh tơchĕng, nơ̆r inh pơma păng dôm tơdrong inh pơm wă ba tơdrong pơjing tơiung kơ Khul Bơngai Lui. Krao khan yua anăn Kră Yang Yêsu Krist, Amen.
Dôm nơ̆r bơ̆n pơma păng tơchĕng ba tơdrong pơrăm dah pơjing tơiung Khul Bơngai Lui?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 10
Kênh Youtube BHKTHN:
