Klei Aê Diê Blŭ: I Y-Timôthê 3:14-16
Êlan kliăng: “Klei yuôm hgăm kơ klei drei mpŭ kơ Aê Diê prŏng snăk, klei anăn arăng amâo dưi hngah ôh” (I Y-Timôthê 3:16a)
Klei êmuh ksiêm mĭn: Ya klei Khua ƀĭng kna Y-Pôl čiăng kñăm tơdah čih hră mơĭt anei? Si ñu hưn bi êdah kơ klei yuôm hgăm kơ klei mpŭ kơ Aê Diê? Si bruă klam kơ drei tơdah Khua Yang bi êdah klei yuôm hgăm anei?
Mơ̆ng kŏ hră mơĭt mtam, Khua ƀĭng kna Y-Pôl mtrŭt anak ñu hlăm klei đăo brei “djă pioh klei đăo leh anăn ai tiê kpă jăk” (I Y-Timôthê 1:3-5; 18-19). Leh anăn hlăm kdrêč 2-3, ñu bi klă kơ klei mtă anăn. Tal êlâo hĭn ñu lač klei kñăm čiăng kơ hră mơĭt jing čiăng đru Khua pô mtô hlăk ai Y-Timôthê “thâo si klei djŏ dôk dơ̆ng ƀơ̆ng huă hlăm găp djuê Aê Diê (êlan 15). Klah čŭn, truh tinei, klei hră mơĭt čiăng kñăm jing klei huĭ mpŭ kơ Aê Diê êjai bi tlă anăp hŏng klei lông dlăng.
Khua ƀĭng kna Y-Pôl hưn mdah klei yuôm hgăm kơ klei mpŭ kơ Aê Diê hŏng pruê̆: “Klei yuôm hgăm kơ klei drei mpŭ kơ Aê Diê prŏng snăk, klei anăn arăng amâo dưi hngah ôh” (êlan 16a). Jing sa klei yuôm hgăm prŏng snăk, kyuadah anei jing klei mdăp hgăm bi êdah kơ phung đăo kơ Krist. Jih jang klei yuôm hgăm anei dôk hlăm Yêsu Krist sơăi. Mâo năm pruê̆ blŭ hưn bi sĭt yua boh blŭ “mâo”, “ƀuh”, “mtô”, “đăo” pŭ ba”, čiăng bi êdah klei sĭt nik yuôm hĭn kơ Yang Krist.
Pruê̆ blŭ tal êlâo yua boh blŭ “mâo” čiăng kñăm kơ knuih mnuih Khua Yang Yêsu. Pruê̆ tal dua lač kơ klei Yang Mngăt Jăk kđăm jih jang bruă Khua Yang Yêsu ngă “hlăm kđeh” jing bruă kpă ênô. Anei jing klei yuôm hgăm kơ klei mpŭ kơ Aê Diê, kyuadah wăt hlăm kđeh anak mnuih mâo kdriêl leh anăn jing awăt dưn, Khua Yang Yêsu brei ƀuh hdĭp kpă ênô jing klei dưi ngă tơdah drei knang kơ klei myang Yang Mngăt Jăk.
Pruê̆ tal tlâo čih “phung dĭng buăl jăk ƀuh Ñu leh”. Phung dĭng buăl jăk ƀuh leh klei hdĭp Khua Yang Yêsu, diñu răng kriê leh anăn mă bruă kơ Gơ̆. Pruê̆ tal pă “arăng mtô leh klei Ñu kơ phung tue” mâo klei bi mguôp kjăp hŏng pruê̆ tal êma “arăng đăo kơ Ñu leh hlăm lăn ala”, lač kơ klei amâo djŏ Khua Yang Yêsu jing Khua Yang knŏng kơ phung Israel ôh, ƀiădah Ñu jing Khua Yang kơ jih jang mnuih. Klei sĭt nik hlăm pruê̆ hưn bi sĭt tal tlâo, tal pă leh anăn tal êma jing klei yuôm hgăm kơ klei mpŭ kơ Khua Yang tui si klei mblang mnuih mpŭ kơ Khua Yang jing mnuih “ƀuh” Khua Yang, “mtô” klei Khua Yang. Dôk dơ̆ng ƀơ̆ng huă mpŭ kơ Aê Diê amâo mjưh mă tăp klei dôk dơ̆ng ƀơ̆ng huă hŏng klei ênuah ênô ôh, ƀiădah dôk dơ̆ng ƀơ̆ng huă ênuah ênô hŏng klei đru pô mkăn hmư̆ leh anăn ƀuh Khua Yang Yêsu.
“Leh anăn Aê Diê pŭ ba Ñu leh hlăm klei guh kơang” blŭ djŏ kơ klei Khua Yang Yêsu tŭ klei guh kơang leh Ñu tŭ klei knap mñai, tŭ klei djiê leh anăn kbiă lŏ hdĭp êjai Ñu hdĭp ti lăn ala anei. Anei jing klei yuôm hgăm kơ klei mpŭ kơ Aê Diê kyuadah klei anei brei kơ drei klei čang hmăng snei: jing msĕ si Khua Yang Yêsu mơh, jih jang klei suăi êmăn drei êjai dôk dơ̆ng ƀơ̆ng huă hŏng klei huĭ mpŭ kơ Aê Diê amâo srăng dôk nanao hlŏng lar ôh, ƀiădah jih jang klei srăng ruê̆ hŏng “klei guh kơang”.
Jih jang klei yuôm hgăm kơ klei dôk dơ̆ng ƀơ̆ng huă hŏng klei mpŭ kơ Aê Diê dôk hlăm klei sĭt nik mâo klei hưn bi sĭt leh kơ Khua Yang Yêsu. Brei klei drei dôk dơ̆ng ƀơ̆ng huă dưm Khua Yang Yêsu jing phŭn. Amâo djŏ drei knŏng hdĭp msĕ si Khua Yang ôh, ƀiădah wăt brei drei hưn mơh klei yuôm hgăm anei kơ jih jang mnuih thâo.
Drei thâo kral leh mơ̆ klei yuôm hgăm kơ klei mpŭ kơ Aê Diê? Ya klei drei čuăn ngă?
Wah lač: Ơ Khua Yang, đru kâo hdĭp msĕ si klei hdĭp Khua Yang Yêsu, leh anăn hŏng jih ai tiê hưn klei yuôm hgăm kơ klei huĭ mpŭ kơ Ih – Ih bi êdah leh kơ kâo brei jih jang phung riêng gah kâo thâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
