I Timautes 3:14-16
Nqe cim:
“Txhua tus puavleej paub hais tias zaj uas peb ntseeg yog zaj uas tseemceeb kawg nkaus” (I Timautes 3:16a)
Nyeem ntxiv Phau Txhais Tshiab HMOWSV
“Peb lees tias txojkev ntseeg uas muab npog cia tob tob lawd tseem ceeb heev.”
Lus nug xav:
– Timthawj Paulaus saib hlob yam dabtsi thaum nws sau tsab ntawv no?
– Nws qhia txog kev npog cia tob tob ntawm txojkev ntseeg li cas?
– Peb muaj feemxyuam li cas thaum tau tus Tswv qhia txog txojkev ntseeg uas npog cia tob tob no?
Thaum pib tsab ntawv, Timthawj Paulaus tau txhawb nws tus tub hauv txojkev ntseeg lub zog kom yuav tsum “muab siab rau ntseeg thiab muaj lub siab ncaj siab ncees” (I Timautes 1:3-5, 18-19). Thiab hauv tshooj 2-3, nws hais meej ntxiv txog qhov ntawd. Xubthawj, nws hais tias lub homphiaj uas nws sau tsab ntawv no yog xav pab rau tus Xibhwb hluas Timautes “paub hais tias Vajtswv tsev neeg yuav tsum coj li cas” (nqe 15). Tsis tas li ntawd xwb, txog lub sijhawm no, yam uas phau ntawv no saib hlob yog lubneej ntseeg thaum ntsib kev sim siab.
Timthawj Paulaus piav qhia txog kev npog cia tob tob ntawm lubneej ntseeg los ntawm nqe lus hais tias: “Peb lees tias txojkev ntseeg uas muab npog cia tob tob lawd tseem ceeb heev” (nqe 16a HMOWSV). Ntawd tseeb yog ib txojkev zais cia loj heev, rau qhov tej no yog tej uas zais cia tiamsis tau qhia tshwm rau cov ntseeg. Tagnrho txojkev zais cia no yog nyob hauv Tswv Yexus. Raws li hauv paus lus, muaj rau lo lus “tau” nyob hauv rau nqe lus, qhia pom qhov tseeb tseemceeb txog Tswv Yexus Khetos.
Lo lus “tau” nyob hauv thawj nqe, yog hais txog Tswv Yexus txojkev ua tibneeg. Lo lus thib ob hais txog Vaj Ntsujplig tau zeem paub tej uas Tswv Yexus ua thaum “Nws los yug ua neeg” yog qhov ncaj ncees. Qhov no yog txojkev npog cia ntawm txojkev ntseeg, rau qhov txawm tias tibneeg lub cev nqaij tawv muaj kev qaug zog, tiamsis Tswv Yexus ua qhia hais tias peb muaj peevxwm ua lubneej ncaj ncees tau, yog peb cia siab rau Vaj Ntsujplig lub hwjchim.
Lo lus thib peb yog tau “cov timtswv pom”. Tswv Yexus lubneej tau cov timtswv ua timkhawv, saib xyuas thiab ua haujlwm pub rau. Lo lus thib plaub yog Nws zaj tau qhia rau txhua haivneeg, nqe no muaj kev sib txuas nrog lo lus “tau” thib tsib, uas yog Nws tau “tej neeg uas nyob txhua qhov hauv ntiajteb no los ntseeg”, qhov qhia tias Tswv Yexus tsis yog cov Yixalayees tug xwb, tiamsis Nws yog tagnrho tibneeg ntiajteb tus Tswv. Tej qhov tseeb hais hauv nqe lus thib peb, thib plaub thiab thib tsib yog txojkev npog cia ntawm txojkev ntseeg raws li qhov uas tus ntseeg tau “pom” tus Tswv thiab tshajtawm txog tus Tswv. Lubneej ntseeg tus Tswv tsis yog tsuas yog ua neeg zoo xwb, tiamsis yuav tsum ua lubneej zoo los ntawm qhov uas pab lwm tus pom thiab hnov txog Tswv Yexus.
“Vajtswv coj nws mus saum ntuj lawm” qhia txog qhov uas tus Tswv tau txais lub tshwjchim tomqab uas Nws nyob hauv lub ntiajteb, tiv kev tsimtxom, tuag thiab sawv rov qab los. Qhov no yog txojkev npog cia ntawm txojkev ntseeg rau qhov nws qhia rau peb muaj kev cia siab tias, ib yam li Tswv Yexus, tagnrho peb tej kev khwv thaum peb ua lubneej ntseeg tus Tswv yuav tsis yog ib txhis, tiamsis thaum kawg txhua yam yuav xaus nrog “lub tshwjchim”.
Muab hais sau zog, txojkev npog cia tob tob ntawm lubneej ntseeg nyob ntawm qhov tseeb uas tau lees paub hauv Tswv Yexus. Peb lubneej yuav tsum muab Tswv Yexus ua qhov tseemceeb. Peb tsis yog tsuas ua lubneej kom zoo li tus Tswv xwb, tiamsis peb yuav tsum muaj feemxyuam tshajtawm txojkev npog cia tob tob no rau coob leej thiab.
Thov Vajtswv,
Tus Tswv, thov pab nyuam yaus ua lubneej kom zoo li Tswv Yexus thiab tas siab tshajtawm txog txojkev npog cia ntawm txojkev ntseeg rau cov neeg nyob puag ncig nyuam yaus. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas tau zeem paub txog kev npog cia tob tob ntawm txojkev ntseeg lawm tau? Peb txiav txim siab yuav ua li cas?
Nyeem Vajluskub hauv peb xyoos: I Kauleethaus 9
Kênh Youtube BHKTHN:
