Efexus 6:18-20
Nqe cim:
“Thiab nej thov Vajtswv pab kuv, kom thaum kuv qhia Vajtswv txojlus, kuv muaj lub siab tawv qhia Txojmoo Zoo lub ntsiab lus rau sawvdaws paub” (Efexus 6:19)
Lus nug rau sawvdaws xav:
– Timthawj Paulus nqua hu cov ntseeg yuav tau thov Vajtswv li cas?
– Nws thov lawv thov Vajtswv rau nws yam dabtsi?
– Ntawm Paulus, yam dabtsi yog yam tseemceeb hauv kev tshaj tawm Txojmoo Zoo?
– Peb cheemtsum ua dabtsi thaum uas zeem paub hais tias kev thov Vajtswv yog qhov tseem ceeb ntawm kev tshaj tawm Txojmoo Zoo?
Thov Vajtswv yog ib lub npe tseemceeb hauv timthawj Paulus tsab ntawv xa mus rau Pawg Ntseeg Efexus. Txawm yog tseem tabtom raug kaw hauv tebchaws Loos los, thaum uas sau tsab ntawv no nws pheej nco ntsoov hais txog kev thov Vajtswv. Nws tau tas siab thov Vajtswv rau cov ntseeg los ntawm ntau seem, thiab tamsim no, xaus tsab ntawv nws qhia qee yam kev coj thiab taij lawv thov Vajtswv meej rau qee yam ntawd. Timthawj Paulus tabtom raug kaw hauv tsev lojcuj los nws tsis nqua hu cov ntseeg hauv Efexus thov Vajtswv pab rau nws txoj kev cheem tsum tiamsis nqua lawv thov Vajtswv rau kev tshaj tawm Txojmoo Zoo. Nws thov lawv thov Vajtswv los ntawm Vaj Ntsujplig lub hwjchim, ua siab ntev thiab tsim dleev los thov Vajtswv rau nws thiab rau cov ntseeg, kom Tswv Yexus Txojmoo Zoo tau ywjpheej tshaj tawm rau txhua lub tsamthawj.
Txawm yog peb hnav txaus txhua yam cuabyeej ntawm sab ntsujplig (Efexaus 6:14-17) los kev thov Vajtswv yog qhov tseemceeb tshaj hauv kev ua tsov rog ntawm sab ntsujplig. Kev thov Vajtswv tseemceeb heev rau tshaj tawm Txojmoo Zoo, vim “Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim uas kav tiam tsaus ntuj” (Efexaus 6:12). Kev thov Vajtswv yog yam xub ua ua ntej uas npaj muaj tej homphiaj thiab nqis tes ua haujlwm tshaj tawm Txojmoo zoo. Tsis muaj txaus kev thov Vajtswv ces tsis muaj txaus lub zog ntawm Vaj Ntsujplig lub hwjchim.
Tim thawj Paulus thov kom cov ntseeg thov Vajtswv pab rau sawvdaws thiab nws kom Vajtswv pub rau lawv tau txoj lus tseeb thiab siv yog lub tsamthawj (nqe 19). Txawm kiag thaum tseem raug kev sim siab los tsimnyog peb thov Vajtswv kom Txojmoo Zoo tau tshaj tawm. Lolus “siab tawv” hais txog kev ua siab loj thiab kev ywjpheej tshaj tawm Txojmoo Zoo txawm yog Paulus tabtom raug kaw thiab muaj ntau yam tav kev los xij (nqe 20). Nws xav tau kev thov Vajtswv kom nws muaj txaus lub zog thiab Vajtswv txoj koob hmoov “qhia Txojmoo Zoo lub ntsiab lus rau sawvdaws paub” (nqe 19).
Kev thov Vajtswv yog qhov tseemceeb thiab yog lub plag rau timthawj Paulus thiab rau txhua tus tub tshaj tawm Txojmoo Zoo kom lawv muaj puv npo Vaj Ntsujplig lub hwjchim. Qhov no qhia rau peb pom hais tias kev thov Vajtswv yog yam uas tseemceeb heev rau txhua tus uas tabtom qhia Txojmoo Zoo: cov tub xa Moo Zoo fij lawv tus kheej tshaj tawm Txojmoo Zoo, xibfwb thiab cov uas koom zwm tes haujlwm tshaj tawm Txojmoo Zoo. Kev thov Vajtswv kuj yog ib txoj haukev rau peb koom ua ke nrog lwm tus hauv tes haujlwm tshaj tawm Txojmoo Zoo.
Thov Vajtswv,
Vajtswv thov zam txim rau nyuam yaus, vim tau tsis quav ntsej txog txoj kev tshaj tawm Txomoo Zoo hauv Pawg Ntseeg thiab tshaj tawm Txojmoo Zoo rau lub ntiajteb no. Thov pab kom nyuam yaus nco ntsoov txog cov tub xa Moo Zoo thiab tas siab thov Vajtswv rau lawv. Nyuam yaus tuav Tswv Yexus Khetos lub npe thov, Amees.
Peb puas thov Vajtswv rau kev tshaj tawm Txojmoo Zoo hauv Pawg Ntseeg thiab txoj Kev tshaj tawm Txojmoo Zoo hauv lub ntiajteb no?
Thov Vajtswv tshaj Moo Zoo
Moo Zoo nrov ncha mus thoob txhua tus
Ua raws Tswv samhwm mus
Koom siab sib pab Tswv pub dag zog .
Nyeem Vajluskub hauv peb lub xyoos: Yelemis 51
Kênh Youtube BHKTHN:
