Yakaunpaus 5:16-18
Nqe cim:
“Tej lus uas tus neeg ncaj ncees thov Vajtswv, tej lus ntawd muaj hwjchim heev” (Yakaunpaus 5:16b)
Lus nug rau sawvdaws xav:
– Lub tswvyim uas thov Vajtswv pab leej yog dabtsi?
– Peb tau txhawb zog zoo li cas dhau los ntawm Eliyas tus qauv thov Vajtswv?
Cov ntseeg Yexus yuav tsum ntseeg hais tias kev thov Vajtswv muaj hwjchim ua tau txhua yam, tiamsis tsis yog txhua yam uas hais tawm ntawm peb lub qhov ncauj puavleej muaj hwjhim. Vajtswv yog tus muaj hwjchim ua tau, Nws yog Vajtswv tus uas ua tej txujci tseemceeb, thiab Nws xaiv ua Nws lub hwjchim dhau los ntawm tej lus thov, uas yog txoj koob hmoov uas tus Tswv pub rau Nws haivneeg. Tsuas yog Vajtswv xwb thiaj yog tus uas muaj hwjchim thiab lub tshwjchim yog Nws li.
Cia kom txhawb tau cov txwjlaug thiab cov ntseeg Vajtswv muaj kev thov Vajtswv rau tus uas raug mob sab nqaij tawv thiab sab ntsujplig, Yakaunpaus qhia tias, “Tej lus uas tus neeg ncaj ncees thov Vajtswv, tej lus ntawd muaj hwjchim heev” (nqe 16). Nqe no ua rau peb totaub meej dua li no: “Tus ncaj ncees tej lus thov muaj hwjchim ua tau tiav” (nqe 16 – phau txhais tshiab). Lo lus no qhia paub hais tias qhov uas txojkev thov Vajtswv tau txais yog nyob ntawm tus neeg ncaj ncees txojkev thov Vajtswv. Peb muaj kev ncaj ncees los ntawm txojkev ntseeg Yexus Khetos (II Kauleethaus 5:21), tiamsis qhov tseemceeb yog saib peb kev ua neej puas qhia tshwm txojkev ncaj ncees ntawd xwb? Vajntxwv Daviv twb qhia qhov uas nws ntsib hauv Phau Ntawv Nkauj 66:18 hais tias; “Yog kuv tsis lees kuv tej kev txhaum, tus Tswv yuav tsis mloog kuv tej lus thov.” Yog li ntawd, cia kom tej lus peb thov muaj tiav, peb cheemtsum tshuaj saib yus lub siab thiab lees kev txhaum rau tus Tswv. Peb lub meejmom ncaj ncees uas peb ntseeg Yexus tau ces yog ua neeg ncaj ncees los ntawm qhov peb muaj kev sib raug zoo nrog Nws.
Yakaunpaus muab zaj lus hais txog tus cevlus Eliyas los piv txog lub hwjchim ntawm kev thov Vajtswv (I Vajntxwv 17). Eliyas thov kom Vajtswv tsis txhob tso nag los, ces tus Tswv tsis tso nag los. Tau peb lub xyoos ntau tom qab, Eliyas thov Vajtswv tso nag los ces nag txawm los. Zaj lus uas hais txog tus cevlus Eliyas no qhia rau peb hais tias kev thov Vajtswv yuav tsum muaj kev nquag, ua sia ntev, ncaj ncees thiab ntseeg ruaj Vajtswv lub hwjchim thiab cia ua li Vajtswv nyiam. Peb pheej muaj kev xav hais tias Eliyas yog tus cev Vajtswv lus, tus Tswv thiaj teb nws cov lus thov. Tiamsis Yakaunpaus qhia paub, “Eliyas yog ib tug neeg zoo li peb xwb”. Yog li ntawd, lub hwjchim yog tus Tswv ua, tsis yog tus neeg thov Vajtswv ua, tus Tswv xav qhia Nws lub siab nyiam tshwjxeeb.
Thov Vajtswv yog txoj koob hmoov Vajtswv pub rau cov ntseeg, yog txojkev uas coj tau peb mus cuag Nws thiab txais tau Nws lub hwjchim pab. Thov Vaj Ntsujplig qhia tej lus uas peb thov Vajtswv kom yog raws li Vajtswv siab nyiam. Thaum ntawd, peb kev thov Vajtswv yuav yog qhov uas coj tej koob hmoov thiab kev hloov rau peb lub neej thiab cov neeg nyob ib ncig peb.
Thov Vajtswv,
Tus Tswv, thov Koj zam txim rau nyuam yaus thiab tswj kom nyuam yaus muaj lub siab dawbhuv. Thov Vaj Ntsujplig pab qhia nyuam yaus zeem paub Vajtswv lub siab nyiam kom tej lus nyuam yaus thov Vajtswv tau txais kev pab. Nyuam yaus tuav Yexus Khetos lub npe thov, Amees.
Puas muaj yam dabtsi cheemtsum peb hloov kev ua neej, kev thov Vajtswv? Peb tabtom nrog tus Tswv mus zoo li cas?
Nyeem Vajluskub hauv peb lub xyoo: II Xwmtxheej Vajntxwv 22
Kênh Youtube BHKTHN:
