Klei Aê Diê Blŭ: Y-Yakơ 5:16-18
Êlan kliăng: “Klei sa čô mnuih kpă wah lač mâo klei myang leh anăn klei dưi” (Y-Yakơ 5:16b)
Klei êmuh ksiêm mĭn: Hdră êlan hgăm kơ klei wah lač mâo klei myang leh anăn klei dưi ya jing? Ya klei bi mđĭ ai drei mâo mơ̆ng klei Khua pô hưn êlâo Y-Êli bi hmô hlăm klei wah lač?
Brei phung đăo kơ Krist đăo klei wah lač mâo klei myang leh anăn klei dưi sĭt nik, ƀiădah amâo djŏ ôh jih jang klei drei ha blŭ mơ̆ng ƀăng êgei drei mâo klei myang sơăi. Aê Diê yơh jing Pô Myang, Ñu jing Aê Diê kơ lu klei bi knăl yuôm bhăn, leh anăn Ñu srăng ngă klei myang Ñu hlăm klei wah lač, jing klei Ñu brei mdê kơ phung đăo kơ Ñu.
Čiăng mtrŭt phung khua mduôn leh anăn phung đăo đru wah lač kơ phung ruă asei mlei amâodah klei ruă hlăm mngăt, Y-Yakơ lač, “Klei sa čô mnuih kpă wah lač mâo klei myang leh anăn klei dưi” (êlan 16). Hră hđăp mblang snei, “Klei sa čô mnuih kpă wah lač hŏng jih ai tiê mâo klei dưi sơăi.” Klei mtô anei brei thâo klei dưi mơ̆ng klei wah lač mâo klei bi mguôp kjăp hŏng klei kpă ênô pô wah lač. Klei kpă ênô drei mâo hlăm klei đăo kơ Yêsu Krist (II Kôrantô 5:21), ƀiădah klei yuôm hĭn jing si ngă klei drei dôk dơ̆ng ƀơ̆ng huă bi êdah mơ̆ klei kpă ênô anăn amâodah hơăi? Mtao Đawit yăl dliê kơ klei bi knal ñu pô hlăm Klei Mmuñ Hđăp 66:18 snei, “Tơdah kâo khăp pioh leh klei wê hlăm ai tiê kâo, Khua Yang amâo dôk hmư̆ kâo ôh.” Kyuanăn, čiăng kơ klei wah lač mâo klei dưi, brei drei ksiêm kơ ai tiê drei pô leh anăn hưn klei soh akâo kơ Khua Yang pap brei. Klei drei jing kpă ênô kbiă mơ̆ng klei drei đăo kơ Yêsu Krist kyuanăn klei drei dôk dơ̆ng ƀơ̆ng huă hŏng klei kpă ênô ăt kbiă mơ̆ng klei bi mguôp sĭt suôr hŏng Ñu mơh.
Y-Yakơ yua klei yăl dliê kơ Khua pô hưn êlâo Y-Êli čiăng bi hmô kơ klei myang klei wah lač (I Bruă Mtao 17). Ñu akâo kơ Aê Diê brei adiê không, Aê Diê brei adiê không. Tloh tlâo thŭn mkrah, ñu lŏ wah lač leh anăn Aê Diê brei adiê hjan. Klei yăl dliê kơ Khua pô hưn êlâo Y-Êli čiăng bi hdơr kơ drei tơdah wah lač, brei drei wah lač hŏng jih ai tiê, gĭr, wah lač hŏng klei sĭt leh anăn knang kơ klei myang Aê Diê leh anăn klei čiăng jăk Ñu. Drei khăng mâo klei mĭn Y-Êli jing sa čô Khua pô hưn êlâo prŏng kyuanăn Aê Diê hmư̆ klei ñu wah lač. Ƀiădah Y-Yakơ brei thâo “Y-Êli jing mnuih msĕ si drei.” Snăn yơh, klei bi knăl yuôm bhăn Aê Diê ngă amâo djŏ kyua pô wah lač jing sa čô mnuih yuôm bhăn ôh, ƀiădah Aê Diê čiăng bi êdah hdră yuôm bhăn Ñu.
Wah lač jing klei brei mdê Aê Diê brei kơ phung ƀuôn sang Ñu, jing mnơ̆ng đru drei hriê giăm kơ Khua Yang leh anăn bi knăl klei myang Ñu. Akâo kơ Yang Mngăt Jăk mtô drei čiăng klei drei wah lač djŏ tui si klei Khua Yang čiăng. Hlăk anăn, klei drei wah lač srăng jing mnơ̆ng ba hriê klei jăk jĭn leh anăn klei bi mlih kơ klei hdĭp drei wăt kơ jih jang mnuih jŭm dar drei.
Mâo mơ̆ klei čiăng kơ drei bi mlih hĕ hlăm klei drei wah lač?
Wah lač: Ơ Khua Yang, pap brei klei soh kâo leh anăn răng kriê ai tiê kâo doh nanao. Akâo Yang Mngăt Jăk đru kâo thâo klei Ih čiăng, čiăng kơ kâo wah lač hŏng jih ai tiê djŏ tui si klei Ih čiăng, čiăng kơ klei myang Ih bi êdah hlăm klei kâo wah lač kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
