Yakaunpaus 5:13-15
Nqe cim:
“Nej cov yog leejtwg raug kev txomnyem, tus ntawd yuav tsum thov Vajtswv. Yog leejtwg zoo siab, cia tus ntawd hu nkauj qhuas Vajtswv.” (Yakaunpaus 5:13)
Lus nug rau sawvdaws xav:
– Yakaunpaus ntuas cov ntseeg uas tabtom raug kev sim siab los ntawm yam dabtsi?
– Vajtswv ua tabpov li cas thaum peb thov Vajtswv?
– Peb ua raws qhov tseeb no zoo li cas?
Lub neej muaj tej ntu sib txawv. Tej lub sijhawm zoo siab, tau zoo, kaj siab, kuj muaj tej lub sijhawm puv npho kev sim siab, txomnyem, mob nkeeg. Vajtswv Txojlus hauv Yakaunpaus 5:13-15 qhia cov ntseeg uas yog neeg Yudais tabtom khiav mus nyob rau txhua qhov chaw vim raug kev tsimtxom, hais txog lub hwjchim ntawm txojkev thov Vajtswv thaum ntsib kev sim siab. Yog ib tug ntseeg Vajtswv, zeem paub Nws yog tus uas muaj hwjchim ua tau ib puas tsav yam thiab tswj kav txhua yam, Vajtswv cov menyuam yuav tau tiv kev sim siab los ntawm qhov kev thov Vajtswv: Thov Vajtswv thaum raug txomnyem, thov Vajtswv los ntawm kev qhuas, txhawb nqa thaum zoo siab (nqe 13); thov Vajtswv sib pab thaum muaj mob (nqe 14).
Txhua tus neeg yuav tsum xwbtim thov Vajtswv pab rau yus, tiamsis yog tus ntseeg Yexus, peb muaj ntxiv qhov feem xyuam uas yog qhia yus tej kev teebmeem thiab hais kom lwm tus pab thov Vajtswv pab rau yus. Cov neeg uas raug mob muaj feem caw cov txwjlaug hauv Pawg Ntseeg tuaj thov Vajtswv pab. Zoo heev thaum muaj cov neeg koom kev ntseeg sib qhia, sib pab ris nra, paub tias yus ntsib raug yam dabtsi thiab pab txhawb yus zog. Tus duab uas Pawg Ntseeg koom siab thov Vajtswv rau ib tug neeg raug mob mas zoo nkauj heev li!
Tus Tswv cov lus tabpov tias tus neeg raug mob yuav tau Nws kho “zoo”, txhais tau tias nws tau txais rov los, tau kho zoo lawm. Yog tias kev txhaum ua rau nws muaj mob ces tus Tswv yuav zam nws lub txim (nqe 15). Tsis yog txhua yam mob puavleej yog kev txhaum ua. Qhov tseemceeb yog peb cheemtsum paub txog yus lub neej sab ntsujplig thiab zaj kawm twg tus Tswv xav kom peb qhia. Tshwjxeeb, yuav tsum paub tias qhov uas mob zoo yog tus Tswv ua thiab Nws muaj cai siv txhua lub peevxwm los ua kom Nws haivneeg tej mob zoo.
Yog li ntawd, hauv txojkev sim siab uas peb ntsib raug, thov Vajtswv pab yog qhov uas cheemtsum heev dua qhov peb ua. Los ntawm txojkev thov Vajtswv, peb qhia tawm hais tias yus tsis txaus peevxwm tiv teebmeem. Yus yuav muab qhia rau tus Tswv, vamkhom Nws pab cawm thiab daws pab yus. Tus Tswv coglus hais tias Nws yeej yuav mloog tej lus uas peb taij thov thiab Nws yuav teb tej lus ntawd raws li Nws lub siab nyiam uas peb xav tsis tau txog. Nimno, peb tabtom ntsib raug tej kev sim siab twg? Cia li thov Vajtswv pab cawm. Tsis txhob txajmuag cia li muab yus tej teebmeem hais qhia rau cov thawjcoj thiab cov ntseeg hauv Pawg Ntseeg nrog paub. Vajtswv nqua hu peb hais tias “cia li muab nej tej kev nyuaj siab huv tibsi tso plhuav rau Vajtswv.” (I Petus 5:7).
Thov Vajtswv,
Tus Tswv, hauv txojkev txomnyem, sim siab, nyuam yaus zeem paub tias nyuam yaus ua tsis tau. Thov Koj pab nyuam yaus tig los vamkhom Koj, vim Koj xwb thiaj yog tus hlub thiab pab tau. Thov kho nyuam yaus tej kev mob thiab pab kom tiv taus tej sim siab. Nyuam yaus tuav Yexus Khetos lub npe thov, Amees.
Nyeem Vajluskub hauv peb lub xyoo: II Xwmtxheej Vajntxwv 21
Kênh Youtube BHKTHN:
