Klei Aê Diê Blŭ: Y-Yakơ 5:13-15
Êlan kliăng: “Hlăm phung diih mâo mơ̆ mnuih dôk tŭ klei knap mñai? Brei ñu wah lač. Mâo mơ̆ mnuih dôk hơ̆k mơak? Brei ñu mmuñ klei bi mni” (Y-Yakơ 5:13)
Klei êmuh ksiêm mĭn: Y-Yakơ mtă brei phung đăo bi tlă anăp hŏng klei lông dlăng hŏng ya klei? Ya klei Khua Yang ƀuăn rơ̆ng tơdah drei wah lač? Si drei srăng mă yua klei sĭt nik anei?
Klei hdĭp mâo lu ênuk mdê mdê, mâo ênuk hơ̆k mơak, ênưih leh anăn mâo klei jăk, mâo mơh ênuk ruă duam, bŏ hŏng klei dleh dlan, knap mñai. Klei Aê Diê Blŭ hlăm Y-Yakơ 5:13-15 mtô kơ phung đăo jing phung Yuđa dôk bra đuĕ kyua klei arăng ngă jhat, thâo kơ klei myang klei wah lač tơdah mâo klei lông dlăng. Jing phung đăo, thâo kơ Aê Diê jing Pô Mâo Jih Klei Myang leh anăn kiă kriê jih jang mnơ̆ng, brei phung đăo bi tlă anăp hŏng klei lông dlăng hŏng klei wah lač: Wah lač, kwưh akâo tơdah dôk tŭ klei knap mñai; wah lač hŏng klei mmuñ bi mni, hơêč hmưi kơ Aê Diê tơdah dôk hơ̆k mơak (êlan 13); wah lač hŏng klei đru wah lač brei tơdah mâo mnuih dôk ruă (êlan 14).
Grăp čô srăng wah lač mă kơ ñu pô, ƀiădah jing phung đăo kơ Krist, drei lŏ mâo sa klei dưi yuôm bhăn jing drei dưi bi êdah akâo kơ pô mkăn wah lač brei kơ klei dleh dlan drei. Mnuih ruă dưi iêô phung khua mduôn hlăm Phung Sang Aê Diê wah lač kơ ñu. Jăk jĭn yơh tơdah mâo phung ayŏng adei hlăm klei đăo đru bi gui brei klei ktrŏ, thâo klă hŏng ya klei drei dôk bi tlă anăp leh anăn đru gui hŏng drei. Rup Phung Sang Aê Diê bi mguôp mbĭt wah lač kơ sa čô mnuih ruă siam êdimima!
Klei Aê Diê ƀuăn rơ̆ng jing Ñu srăng “bi hlao” mnuih ruă. Tơdah klei soh yơh jing phŭn bi mâo klei ruă, snăn Aê Diê srăng pap brei kơ pô ruă anăn (êlan 15). Sĭt nik amâo djŏ jih jang klei ruă kbiă mơ̆ng klei soh sơăi ôh. Klei yuôm jing brei drei thâo săng hĕ kơ klei jing klei hdĭp myang drei pô leh anăn ya klei Aê Diê čiăng bi hriăm drei. Boh nik nak, brei drei thâo klei bi hlao kbiă hriê mơ̆ng Aê Diê pô leh anăn Ñu dưi yua djăp êlan čiăng bi hlao phung ƀuôn sang Ñu.
Snăn yơh, hlăm klei lông dlăng drei dôk bi tlă anăp, wah lač jing klei yuôm hĭn drei dưi ngă. Hŏng klei wah lač, drei hưn kơ drei pô amâo mâo djăp klei ktang dưi bi kdơ̆ng hŏng klei dlông dlăng ôh. Hrô kơ klei anăn, drei čiăng hưn jih djăp mta klei kơ Khua Yang, bi êdah klei knang kơ Ñu, akâo kơ Ñu đru leh anăn mgaih mkra brei. Khua Yang ƀuăn Ñu srăng hmư̆ klei drei wah lač leh anăn Ñu srăng lŏ wĭt lač hŏng êlan êgao hĭn kơ klei drei akâo amâodah mĭn tui si klei čiăng jăk Ñu. Ară anei hin, hŏng ya klei lông dlăng drei dôk bi tlă anăp? Wah lač bĕ akâo kơ Khua Yang đru. Đăm huĭ ôh hưn bi êdah klei dleh dlan drei kơ phung knơ̆ng gĭt gai leh anăn kơ jih jang phung bi đru đăo mkăn hlăm Phung Sang Aê Diê. Khua Yang dôk iêo brei drei “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih” (I Y-Pêtrôs 5:7).
Mâo mơ̆ klei dleh dlan drei jao kơ Khua Yang hruê anei?
Wah lač: Ơ Khua Yang, hlăm klei dleh dlan, knap mñai, kâo thâo kơ kâo jing mnuih awăt. Đru kâo brei kâo hriê leh anăn knang kơ Ih, kyuadah Ih jing Pô khăp leh anăn răng kriê kâo. Akâo Khua Yang bi hlao klei ruă kâo leh anăn đru kâo dưi hŏng klei lông dlăng kâo dôk tŭ. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
