Pajlug 24:27
Nqe cim:
“Tsis txhob maj ua koj lub tsev thiab npaj koj lub cuab lub yig ua ntej koj npaj tau thaj teb thiab txhua yam txhij tso.” (Pajlug 24:27)
Peb saib ntxiv Phau Txhais Tshiab,
“Cia li npaj koj tej haujlwm sab nraud thiab ua txhua yam kom txhij hauv koj daim teb. Dhau ntawd kuj ua koj lub tsev. (Hmowsv)
Lus nug rau sawvdaws xav:
– Lo lus “ua” txhais tau li cas?
– Vim li cas cheemtsum teeb tseg kev ua haujlwm hauv lub neej?
– Zaj kawm no pab tau peb teeb tseg kev ua haujlwm rau peb tsevneeg zoo li cas?
Vajntxwv Xalumoos qhia nws cov menyuam ib tug lw ua neej yog yuav tsum teeb tseg kev ua haujlwm kom meej thiab ua tib zoo nqis tes ua cov haujlwm ntawd kom tiav raws li ib qib zuj zus. Lo lus “ua”, raws li lus Alamais yog “teeb tseg lossis npaj cia”. Yog li ntawd, cov menyuam yuav tsum teeb tseg kev ua haujlwm kom tsimnyog, thawj qhov yuav tsum npaj thiab teeb tej haujlwm sab nraud, tom qab ntawd los txog hauv yus daim teb, thiab thaum kawg yog ua tsev nyob. Cov “haujlwm sab nraud” yog cov uas nyob tom tej kev, kiab khw (saib Pajlug 1:20), hais txog tes haujlwm ua kom tau koob npe zoo, ua tau zoo nyob rau lub tebchaws. “Npaj txhua yam hauv daim teb” yog hais txog qhov uas npaj nyiaj txiag kom muaj noj haus txaus. Tes haujlwm “ua tsev” hais txog kev txhim tsa vaj tse rau tsevneeg nyob. Nqe Pajlug no tsis yog hais rau cov neeg uas ua qoob ua loo xwb tiamsis kuj yog hais rau txhua tus neeg uas ua haujlwm. Cia li txhim tsa koob npe, haujlwm, nyiaj txiag ua ntej thaum ua vaj ua tsev nyob. Yog li tus neeg uas muaj tswvyim thiab ua tau haujlwm yog tus neeg uas teeb tseg kev ua haujlwm thiab ua tej haujlawm ntawd ib yam zuj zus.
Teeb tseg kev ua haujlwm thiab ua tib zoo nqis tes ua qhov haujlwm ntawd ces yog peb ua txhua yam tiav. Muaj ntau leej rau siab ntso ua noj ua haus tiamsis niaj hnub poob vim npaj sijhawm, dag zog tsis yog cai, yog chaw. Coob leej ntau tus tsis hmov tshua txog kev teeb haujlwm, kev ua neej zoo li lub thoob kuav. Vajtswv Txojlus hais tias: “Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus.” (Pajlug 21:5).
Cov ntseeg Yexus yog tus Tswv txawj ntse cov menyuam, yog li yuav tsum muaj tswvyim rau kev ua neej. Thawj qhov thiab yog qhov tseemceeb dua txhua yam, peb yuav tsum tas siab thov Vajtswv, qhia peb tej kev teeb tseg ua haujlwm rau Vajtswv kom peb teeb tseg tau tej haujlwm haum Vajtswv siab, thiab thov Vajtswv pub tswvyim, dag zog ua tej haujlwm teeb tseg ntawd. Vajtswv Txojlus qhia: “Tso koj tes haujlwm rau tus Tswv ua tus coj, koj thiaj yuav ua tau tes haujlwm ntawd tiav” (Pajlug 16:3). Yuav tau nco ntsoov tias ua tau thiab tsis tau, nws yog nyob ntawm Vajtswv teeb cia (I Kauleethaus 3:4-8).
Thov Vajtswv pub rau peb txhua tus rau siab ntso nrhiav qhov uas cia Vaj Ntsujplig coj, kom peb muaj tswvyim txawj ntse teeb tseg kev ua haujlwm meej thiab ua tib zoo nqis tes ua tej haujlwm ntawd kom tiav rau kev ua neej, ua rau Vajtswv tau ntsejmuag nyob hauv tebchaws, Pawg Ntseeg, thiab tsevneeg muaj kev sib hlub.
Thov Vajtswv,
Vajtswv, ua tsaug uas Koj pub muaj Koj Txojlus. Thov Koj qhia kom nyuam yaus niaj hnub nrhiav ua raws li Koj nyiam thaum teeb kev ua haujlwm, thiab nquag ua tej haujlwm ntawd pab tsevneeg thiab ua rau Koj tau ntsejmuag. Nyuam yaus tuav Yexus Khetos lub npe thov, Amees.
Peb puas thov Vajtswv pub tswvyim rau peb thaum teeb tseg kev ua haujlwm ua ntej ua?
Nyeem Vajluskub hauv peb lub xyoo: II Xwmtxheej Vajntxwv 17
Kênh Youtube BHKTHN:
