Klei Aê Diê Blŭ: Klei Bi Hriêng 24:27
Êlan kliăng: “Mkra bĕ bruă ih ti tač, jah jik bĕ hma ih; leh anăn êdei kơ anăn brei ih mdơ̆ng sang ih” (Klei Bi Hriêng 24:27)
Klei êmuh ksiêm mĭn: Boh blŭ “mkra bĕ” si ngă mblang? Ya ngă brei mkra hĕ hdră hlăm klei hdĭp? Klei hriăm anei đru drei si srăng mkra hdră kơ gŏ sang?
Mtao Salômôn mtô anak ñu sa hdră êlan hdĭp, anăn jing, mkra hĕ hdră bi klă leh anăn ngă bi jăk hdră anăn tui si pruê̆ dăp leh. Boh blŭ “mkra bĕ” hlăm boh blŭ phŭn klei Aram lŏ mblang jing “mjing amâodah prăp êmiêt”. Snăn yơh, brei anak mâo hdră djŏ, êlâo hĭn prăp êmiêt leh anăn mkra hĕ bruă ti tač, êdei kơ anăn truh kơ bruă jah jik hma, ti knhal tuč kơh mdơ̆ng sang. “Bruă ti tač” tinei jing bruă ti êlan dơ̆ng, hlăm sang mnia (Klei Bi Hriêng 1:20). Čiăng lač kơ klei mkŏ mjing bruă knuă mă, klei hing ang, klei arăng mpŭ hlăm yang ƀuôn. “Jah jik bĕ hma” lač kơ klei duah prăk čiăng mâo klei hdĭp mda. Bruă “mdơ̆ng sang” čiăng lač kơ klei mkra anôk đuĕ dăp, čiăng mâo anôk mdei kơ pô leh anăn kơ gŏ sang. Êlan Klei Bi Hriêng anei amâo djŏ yua knŏng kơ phung ngă hma ôh, ƀiădah yua kơ jih jang bruă knuă mă. Mjing bĕ kơ drei pô klei arăng dưi knang, bruă knuă mă, bi mâo hĕ anôk mă prăk êlâo kơ mdơ̆ng sang. Snăn yơh, sa čô hdĭp hŏng klei thâo mĭn leh anăn čăt đĭ jing sa čô mnuih mâo hdră leh anăn ngă djŏ pruê̆ bruă dăp leh.
Mkra hdră kơ bruă srăng ngă leh anăn ngă bi jăk hdră mkra leh jing êlan atăt truh kơ klei jing. Mâo lu mnuih gĭr snăk hlăm klei duah ƀơ̆ng huă ƀiădah amâo tuôm mâo klei jing ôh kyuadah diñu yua hruê mmông, ai ktang amâo djŏ mmông, amâo djŏ anôk. Mâo lu mnuih mkăn lĕ amâo uêñ ôh kơ hdră mă bruă, klei hdĭp diñu jing msĕ si rơ̆k đung hlăm êa. Klei Aê Diê Blŭ lač: “Hdră mnuih kriăng atăt kơ klei bŏ dlai, ƀiădah ngă hŏng klei jêč srăng atăt kơ klei kƀah” (Klei Bi Hriêng 21:5).
Phung đăo kơ Krist jing anak Pô thâo mĭn, kyuanăn brei drei mâo klei thâo mĭn hlăm klei hdĭp. Êlâo hĭn leh anăn êgao hĭn kơ jih jang klei, brei drei wah lač hŏng jih ai tiê, myơr jih hdră drei kơ Aê Diê čiăng mâo hdră bi mơak kơ Ñu, leh anăn akâo mơh kơ Ñu brei klei thâo mĭn, thiăm ai ktang čiăng ngă jih jang hdră mkra leh. Klei Aê Diê Blŭ mtă: “Jao bĕ bruă ih kơ Yêhôwa, leh anăn hdră ih čiăng ngă srăng jing” (Klei Bi Hriêng 16:3). Hdơr bĕ, jing amâodah hơăi, kluôm dhuôm tui si Aê Diê dê (I Kôrantô 3:4-8).
Akâo Khua Yang đru grăp čô drei hŏng jih ai tiê akâo kơ Yang Mngăt Jăk atăt gai, mâo klei thâo mĭn mơ̆ng Aê Diê mkra hdră bi klă leh anăn ngă bi jăk čiăng mâo klei čăt jing hlăm klei hdĭp, bi guh kơang kơ Anăn Khua Yang ti krah phung ƀuôn sang, đru mkŏ mjing, bi mđĭ kyar Phung Sang Aê Diê, leh anăn gŏ sang mơak mñai.
Drei akâo kơ Aê Diê brei klei thâo mĭn čiăng mkra hdră êlâo kơ ngă bruă mơ̆?
Wah lač: Ơ Khua Yang, kâo bi mni kơ Ih brei leh kơ kâo Klei Ih Blŭ. Brei kâo duah klei Ih čiăng hŏng jih ai tiê hlăm jih jang hdră, leh anăn kriăng mă bruă čiăng mâo klei hdĭp mda kơ gŏ sang leh anăn bi guh kơang kơ Anăn Ih ti krah phung ƀuôn sang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
