Efexus 6:10-20
Nqe cim:
“Ib puas tsav yam uas nej ua no, nej yuav tsum thov Vajtswv pab. Nej yuav tsum thov Vajtswv txhua lub sijhawm raws li Vajtswv tus Ntsujplig coj nej. Vim li ntawd nej yuav tsum ceevfaj thiab ua siab ntev thov Vajtswv tsis txhob nkees. Thiab niaj hnub thov Vajtswv pab cov ntseeg sawvdaws” (Efexus 6:18)
Lus nug rau sawvdaws xav:
– Cov ntseeg yuav tsum ua dabtsi kom kovyeej npluav rog sab ntsujplig?
– Yog vim li cas yuav tsum thov Vajtswv rau tagnrho cov ntseeg txhua tus?
– Peb yuav tsum thov Vajtswv sib pab li cas?
Hauv Efexus 6:10-18, timthawj Paulus qhia rau Pawg Ntseeg paub hais tias cov ntseeg tabtom nyob hauv npluav rog sab ntsujplig nrog rau dab Ntxwgnyoog lub hwjchim tsaus ntuj, yog li ntawd yuav tsum muab “Vajtswv tej cuabyeej los hnav”. Paulus siv tus duab ntawm tus tub rog Loos los piav txog lub hauvpaus muaj zog ntawm sab ntsujplig pub rau cov ntseeg uas tseem nyob hauv npluav rog ntawm lub hwjchim uas tsaus ntuj no. Tswv Yexus tus tub rog yuav tsum vamkhom Vajtswv lub zog thiab Vajtswv tej cuabyeej kom sawv ruaj rau hauv kev ntseeg thiab txeeb yuav txoj kev kovyeej thaum kawg. “Cuab yeej” pab peb tiv thaiv thiab tawmtsam yeeb ncuab, tiamsis “lub zog” yog yam uas pab kom peb siv tau cov cuabyeej ntawd kom zoo tshaj plaws.
Lub zog uas Vajtswv pub yog los ntawm Vaj Ntsujplig los tau dhau los ntawm tej lus thov Vajtswv (nqe 18). Thaum siv cov lus “thov Vajtswv pab”, “thov Vajtswv txhua lub sijhawm” “thov Vajtswv pab cov ntseeg sawvdaws” yog Paulus xav kom cov ntseeg yuav tsum thov Vajtswv txhua lub sijhawm, rau txhua tes haujlwm thiab rau txhua tus. Vim li cas yuav tsum “thov Vajtswv pab cov ntseeg sawvdaws”? Hauv npluav rog sab nqaij tawv kuj ib yam li sab ntsujplig, tus tub rog tsis mus ntaus rog ib leeg tiamsis nws ibtxwm koom nrog ib pab ua ke mus koom sib ntaus sib pab kom kovyeej. Vajluskub qhia hais tias peb yog tej tes taws ntawm Tswv Yexus lub cev, ib leeg yog ib yam ntawm lub cev thiab muaj feem xyuam sib pab hauv tus Tswv lub cev (1 Kauleethaus 12:12-27). Vim li ntawd, thov Vajtswv sib pab yog yam uas tseemceeb tshaj plaws. Kiag Tswv Yexus kuj tau thov Vajtswv rau timthawj Petus kom nws sawv ruaj rau hauv kev ntseeg, hla dhau kev sim siab thiab kom nws txhawb tau lwm tus (Lukas 22:31-32). Vaj Ntsujplig thiab Tswv Yexus tabtom thov Vajtswv rau peb txhua tus (Loos 8:26, 34). Vim li ntawd, timthawj Paulus nqua hu peb thov Vajtswv tsis yog rau Pawg Ntseeg yus nyob xwb tiamsis thov tagnrho rau“cov ntseeg sawvdaws”. Kiag Paulus los kuj cheem tsum cov ntseeg thov Vajtswv pab nws thiab (nqe 19). Nws tau hais tawm hauv lub siab tuaj tiag tiag rau cov ntseeg hauv Thexalaunikes hais tias: “Cov kwvtij, nej yuav tsum thov Vajtswv pab peb thiab” (1 Thexalaunikes 5:25). Yuav tsum ua siab ntev, nco ntsoov thov Vajtswv pab rau cov ntseeg sawvdaws ntawd yog yam uas cheem tsum tshaj plaws (nqe 18).
Niaj hnub no, cov ntseeg yeej tseem nyob rau hauv npluav rog sab ntsujplig, Vajtswv cov menyuam yuav tsum sib hmov tshua txog txhua tus thov Vajtswv sib pab txhua lub sijhawm. Peb kuj yuav tsum thov Vajtswv kawg siab pab rau ib tug zuj zus, lawv lub neej kev noj nyob, yuav tsum muaj lub siab ntshaw kom tau Vajtswv foom koob hmoov, pab cawm, tiv thaiv, kho txhua tus zoo… Los ntawm kev thov Vajtswv pab rau cov kwvtij koom kev ntseeg, peb kuj nqis tes sib pab hauv txhua npluav rog sab ntsujplig kom qhia tshwm kev hlub, kev koom siab sib pab tawmtsam yeebncuab thiab kovyeej.
Thov Vajtswv,
Vajtswv, thov Koj pub rau nyuam yaus thiab nyuam yaus cov kwvtij nkauj muam hauv kev ntseeg txawj thov Vajtswv sib pab kom tau Koj coj kev, tiv thaiv, pub dag zog tshiab kom kovyeej npluav rog sab ntsujplig. Nyuam yaus tuav Tswv Yexus Khetos lub npe thov, Amees.
Peb puas hmov tshua thov Vajtswv sib pab?
Nyeem Vajluskub hauv peb lub xyoos: 2 Xwmtxheej Vajntxwv 7.
Kênh Youtube BHKTHN:
