Mathais 21:18-19
Nqe cim:
“Kuv yog tsob hmab, nej yog cov ceg. Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dabtsi li” (Yauhas 15:5)
Lus nug rau sawvdaws xav:
– Thaum Tswv Yexus taug kev rov mus hauv nroog Yeluxalees Nws pom ib tsob txiv ncuavpias zoo li cas?
– Vim li cas Tswv Yexus foom tsob txiv ncuavpias hais tias, “Txij no mus koj yuav tsis tau txi txiv ib zaug li lawm!”?
– Niaj hnub nimno, Vajtswv xav tau dab tsi ntawm cov ntseeg Yexus?
Thaum so ib hmo hauv Npethanis dhau lawd, hnub tom qab thaum sawv ntxov, Tswv Yexus rov los rau hauv lub nroog Yeluxalees, thaum tabtom taug kev mus, Nws hnov tshaib plab. Pom ib tsob txiv ncuavpias nyob ntawm ntug kev muaj nplooj ntsuabxiab, Tswv Yexus cia siab hais tias , yuav nrhiav tau tej lub txiv los noj daws kev tshaib, tiamsis Yexus nrhiav tsis tau ib lub txiv li. Txiv ncuavpias yog ib yam txiv ntoo uas yuav txi txiv ua ntej nws hlav nplooj, tiamsis txooj txiv ntawd muaj nplooj xwb tsis txi txiv. Txawm hais tias, thaum ntawd tsis yog lub caij txi txiv ncuavpias, tiamsis qhov uas tsob txiv ncuav pias muaj nplooj tsis muaj txiv yog ib yam txawv lawm. Vim li ntawd, Tswv Yexus thiaj foom tsob txiv ncuavpias ntawd hais tias, “Txij no mus koj yuav tsis tau txi txiv ib zaug li lawm!, Tamsim ntawd tsob txiv ncuavpias txawm cia li qhuav lawm” (nqe 19).
Tus duab ntawm tsob txiv ncuavpias uas muaj nplooj tsis txi txiv yog piv rau Vajtswv haivneeg tiam uas Tswv Yexus los yug. Tus Tswv tsis txais yuav cov neeg ntsejmuag ncaj siab nkhaus uas zoo tsob txiv ncuavpias muaj nplooj tiamsis tsis txi txiv, sab nraud mas tham tau kawg tiamsis ua tsis tawm ib yam haujlwm li. Cov neeg Yixalayees tabtom nyob tsis muaj dab tsi zoo tshwm hauv sab ntsujplig, txawm hais tias lawv yog cov paub Vajtswv. Lawv muaj lub Tuamtsev zoo nkauj kawg nkaus uas rub tau tibneeg txhua qhov tuaj ncig saib txhua lub xyoo, tiamsis lawv lub siab tsis muaj Vajtswv nyob hauv. Tswv Yexus lo lus foom “Txij no mus koj yuav tsis tau txi txiv ib zaug li lawm!” tau muaj tiav hauv xyoo 70 tom qab Tswv Yexus. Txij thaum lub nroog Yeluxalees thiab lub Tuamtsev raug poob rau cov neeg Loos txhais tes, Vajtswv haiv neeg raug tawg mus nyob ua sab ua sua thoob qab ntuj yuav luag ob txhiab xyoo, lawv mam tau rov los txhim muaj tebchaws.
Tswv Yexus xav kom pawg ntseeg thiab peb txhua tus uas yog Vajtswv cov menyuam muaj lub neej pheej “txi txiv” rau Nws. Tswv Yexus xav tau li ntawd vim, “Vajtswv twb txhiv nej kim kawg li los lawm. Yog li ntawd, peb yuav tsum cia peb lub cev ua rau Vajtswv tau ntsejmuag” (1 Kauleethaus 6:20). Vajtswv yuav tsis txais yuav peb, yog peb tsuas hais tias yog tus ntseeg, coj tej kevcai rau luag pom xwb, tiamsis sab ntsujplig tsis txi txiv, tsis ua ib yam dab tsi rau Nws li. Hauv Yauhas 15:2 Tswv Yexus qhia txog qhov ntawd hais tias, “Nws muab txhua ceg hmab uas tsis txi txiv ntshua tawm ntawm lub hauvpaus mus povtseg…”. Vim li cas thaum tsis txi txiv, yuav raug txim hnyav npaum li ntawd? Vim peb tabtom ua saib tsis taus tej koob hmoov uas Vajtswv pub, peb ua tsis tiav Vajtswv lub homphiaj ntawm lub neej ntseeg thiab tabtom ua rau Vajtswv poob ntsejmuag. Thaum lub neej tsis txi txiv rau Vajtswv yog peb tabtom nyob rau lub tsamthawj qhuav qhawv ntawm sab ntsujplig, peb tsuas lees hais tias yog tus ntseeg Yexus tiamsis lub neej ntsujplig qhuav qhawv, yeej ua tsis tau dab tsi li.
Tswv Yexus hais tias: “Kuv yog tsob hmab, nej yog cov ceg. Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dabtsi li” (Yauhas 15:5). Vajtswv xav kom pawg ntseeg uas yog Vajtswv cov menyuam txhua tus yuav tsum txi txiv rau Vajtswv, yog tsis txi txiv tus ntawd yeej tsis nyob hauv Vajtswv!
Thov Vajtswv,
Vajtswv, thov pab nyuam yaus tsis txhob ua neej hais ntawm lub ncauj xwb, lub siab ua tsis tau ib yam dab tsi rau Koj. Yog nyuam yau pheej zoo li ntawd ces yuav raug Koj rau txim hnyav heev. Tiamsis thov pab nyuam yaus ua neej txi txiv rau Koj raws li txoj koob hmoov uas Koj pub rau nyuam yaus lawm. Nyuam yaus tuav Tswv Yexus Khetos lub npe thov. Amees.
Peb lub neej sab ntsujplig puas tseem tabtom txi txiv rau Vajtswv?
Nyeem Vajluskub hauv peb lub xyoos: 1 Petus 5
Kênh Youtube BHKTHN:
