Klei Aê Diê Blŭ: Y-Mathiơ 21:18-19
Êlan kliăng: “Kâo jing ana boh kriăk ƀâo, diih jing adhan. Hlei pô dôk hlăm kâo leh anăn kâo dôk hlăm ñu, ñu anăn srăng mboh lu. Kyuadah tơdah amâo mâo kâo, diih amâo dưi ngă sa klei ôh.” (Y-Yôhan 15:5)
Klei êmuh ksiêm mĭn: Aguah hruê êdei, êjai wĭt ti ƀuôn Yêrusalem, si ana boh hra Khua Yang ƀuh leh? Ya ngă Khua Yang lač “Mơ̆ng anei kơ anăp ih amâo srăng lŏ mboh ôh!” Hruê anei, ya klei Khua Yang čang hmăng kơ Phung Sang Aê Diê leh anăn grăp čô drei?
Leh mdei ti Ƀêthani, aguah hruê êdei Khua Yang Yêsu lŏ wĭt hlăm ƀuôn Yêrusalem, hlăm ktuê êlan ñu êpa. Ƀuh sa ƀĕ ana hra ti djiêu êlan mâo hla, Khua Yang čang hmăng ƀuh boh čiăng ƀơ̆ng kyua khăng ƀuh ana hra mboh êlâo kơ mâo hla, ƀiădah tơdah nao giăm knŏng ƀuh hla đuč. Wăt tơdah amâo amâo djŏ yan boh hra ôh ƀiădah klei sa ƀĕ ana hra mâo leh hla ƀiădah ka mâo boh jing klei amâo bhiăn ƀuh ôh. Khua Yang Yêsu lač kơ ana hra, “Mơ̆ng anei kơ anăp ih amâo srăng lŏ mboh ôh!” Bhiâo riâo rit ana boh hra krô mtam” (êlan 19).
Rup ana hra knŏng mâo hla ƀiădah amâo mâo boh ôh jing boh klei mơ̆ng phung ƀuôn sang ênuk Khua Yang Yêsu, Ñu amâo tŭ ôh kơ klei mgưt msĕ si ana hra knŏng mâo bŏ hla ƀiădah amâo boh. Phung ƀuôn sang Israel dôk hlăm klei thu krô hlăm klei hdĭp mngăt wăt tơdah ti êngao diñu hur har snăk. Diñu mâo Sang yang Yêrusalem prŏng siam snăk mâo lu mnuih nao dlăng grăp thŭn. Klei Khua Yang lač, “Mơ̆ng anei kơ anăp ih amâo srăng lŏ mboh ôh!” bi sĭt leh klei hưn êlâo hlăm thŭn 70 êdei kơ klei kkiêng kơ Khua Yang. Hlăk ƀuôn prŏng hŏng Sang Yang Yêrusalem mâo phung Rôm bi rai, phung ƀuôn sang Israel dôk hlăm boh klei luč ala čar leh anăn Sang Yang hlăm dua êbâo thŭn truh ară anei.
Khua Yang Yêsu ăt čang hmăng “boh tŭ” hlăm phung Sang Aê Diê leh anăn mơ̆ng grăp čô phung ƀuôn sang Ñu hruê anei msĕ snăn. Khua Yang čang hmăng hŏng mta phŭn, “Kyuadah Aê Diê blei leh diih hŏng sa ênoh. Snăn bi guh kơang bĕ Aê Diê hlăm asei mlei diih” (I Kôrantô 6:20). Khua Yang amâo tŭ ư ôh kơ drei knŏng mâo klei bi êdah ti êngao ƀiădah hlăm klei hdĭp mngăt amâo mâo boh tŭ kơ Ñu. Hlăm Y-Yôhan 15:2, Khua Yang Yêsu mtô leh kơ klei anei, “Grăp adhan hlăm kâo amâo mboh ôh, Ñu mă khăt hĕ…” Ya ngă tơdah amâo mboh, drei srăng tŭ klei bi kmhal kjham snăn?
Drei dôk dlăng hơăi mang kơ klei pap Aê Diê brei, amâo bi leh klei kñăm Aê Diê brei hlăm klei hdĭp pô leh anăn dôk bi čhŏ Anăn Ñu. Tơdah klei hdĭp amâo mâo tŭ dưn kơ Khua Yang, drei dôk hlăm boh klei ƀun ƀin hlăm klei hdĭp mngăt drei knŏng dôk hơô ao klei đăo jăk siam hĭn ƀiădah klei hdĭp mngăt hlăm lam snăn thu krô sơăi. Khua Yang mtô: “Kâo jing ana boh kriăk ƀâo, diih jing adhan. Hlei pô dôk hlăm kâo leh anăn kâo dôk hlăm ñu, ñu anăn srăng mboh lu. Kyuadah tơdah amâo mâo kâo, diih amâo dưi ngă sa klei ôh” (Y-Yôhan 15:5). Ñu čang hmăng nanao phung Sang Aê Diê leh anăn grăp čô đăo kơ Ñu srăng hdĭp tŭ dưn kơ Ñu, kyua tơdah amâo tŭ dưn, pô anăn dôk ti êngao Khua Yang!
Klei hdĭp mngăt drei dôk mboh tŭ dưn kơ Khua Yang mơ̆?
Wah lač: Ơ Khua Yang, akâo kơ Ih đru kâo dôk nanao hlăm Khua Yang čiăng hdĭp tŭ dưn kơ Ih, akâo kơ Ih đru kâo kbiă mơ̆ng klei hdĭp mgưt, hdĭp amâo tŭ dưn kơ Ih kyua srăng tuôm hŏng klei Ih bi kmhal kjham snăk. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Pêtrôs 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
