Yakơ 5:12; Mathiơ 5:33-37
“Ơ ‘nhŏng oh, mă loi inh wă pơkă kơ iĕm tơdrong âu kăl dêh: Tơdrong kiơ iĕm pơkă kơ đe wă kơ đe băt kơ iĕm gô pơm, iĕm ‘nĕ pă pơkă pao anăn ‘Bok Kei-Dei, anăn plĕnh, anăn teh, dah anăn kiơ kiơ nai; iĕm wă pơkă kơ đe tơdrong kiơ, iĕm athei pơkă mă tơpăt hăm ‘bơ̆r hoh đĕch. Thoi noh ‘Bok Kei-Dei huay kơ hil kơ iĕm.” (Yakơ 5:12)
Nơ̆r jet tơchĕng pơwao:
– Pơkă pơkăm wă khan kiơ păng lơ bơngai ngăl juăt pơma pơkăm kơplah layơ?
– Yua kơ kiơ ‘bok Yakơ bơtho “‘nĕ kơ pơkă pơkăm”?
– Sơ̆p hla bơar nơ̆r ‘Bok Kei-Dei bơtho gah tơdrong pơkă pơkăm păng lu bơ̆n athei yua iŏk thoi yơ wă kơ trŏ?
Pơkă pơkăm wă khan khŏm pơm mă trŏ thoi bơ̆n kơdih pơma, wă khan pơsĭt hăm bơngai nai gah kơdih akâu pơm tơpăt. Lăm tơdrong arih, lu bơ̆n tơ;bơ̆p lơ tơdrong pơma pơkă pơkăm, phŏ lăp noh lăm tơdrong gĭt kăl lăm tơdrong pơkong dăm păng mŏ, phĕt pơjao tơdrong jang bơngai pơgơ̆r lăm minh pôm dêh char, ‘bơ̆t anăp lu bơngai sek tơdrong, lu thây pơgang keh tơdrong hŏk, kư̆m nơ̆r pơkă lăm năr hmă hmă đĕch, pơtih gia thoi lu pơkă hăm kon hơ’lơ̆p, bôl buăl, jang sa hơdai….tơdrong kiơ.
Yakơ 5:12 bơtho “‘nĕ kơ pơkă pơkăm” âu bơih, ‘bok Yakơ tơ’blŏk Nơ̆r Kră Yang Yêsu lăm Mathiơ 5:33-37 gah tơdrong jang “‘nĕ kơ pơma pơkăm” păng ‘nĕ pă hiap akâu kơdih kơ ‘Bok Kei-Dei, wă kơ hlôh yua kơ kiơ Kră Yang Yêsu bơtho thoi noh, lu bơ̆n kăl kơ hlôh chăl lu bơngai Juđê sơ̆ pơma pơkă pơkăm, yua kơ nơ̆r pơkă pơkăm wă tơ’bôh tơdrong gĭt kăl, pơtrŭt wă kơ lui ngeh, mă-lei bơngai pơkă pŭ iŏk ‘bơ̆t anăp Kră Yang, thoi noh lu bơngai Juđê ưh kơ pơma yua anăn ‘Bok Kei-Dei wă pơkă pơkăm. tơplih kơ tơdrong noh, lu sư pơma hăm tơdrong kiơ nai ‘bơm gah Kră Yang, thoi plĕnh, teh, Jrusalem, Hnam akŭm…wă kơnhăm huay kơ tơ wŏk kơ lu sư, đơ̆ng jơ noh nơ̆r pơkă pơkăm jing rup pơdah tơdrong jang hơlĕnh. Kră Yang Yêsu tơ’bôh tơdrong hơlĕnh hăm nơ̆r pơkă pơkăm lu sư lăm Mathiơ 23: 16-22.
Thoi noh, mă Kră Yang Yêsu păng ‘bok Yakơ ưh kơ găn pơkă pơkăm. Sơ̆p hla bơar nơ̆r ‘Bok Kei-Dei bơtho athei hli yom kơ Kră Yang păng yua anăn Sư pơkă pơkăm (Bơtho Khôi Juăt 10: 20). Hloh kơ noh dơ̆ng, đơ̆ng ‘Bok Kei-Dei kư̆m pơkă pơkăm kơplah pơjing tơdrong pơgơ̆p ‘nao păng ‘bok Abraham (Hêbrơ 6:13). Mă-lei sơ̆p hla bơar Nơ̆r ‘Bok Kei-Dei bơtho lu bơ̆n athei pơ’lơ̆ng kơplah wă lĕch nơ̆r pơma pơkă păng pơm mă trŏ nơ̆r pơkă pơkăm. ‘Bok Yakơ bơtho hloh kơ noh dơ̆ng tơ’blŏk nơ̆r Kră Yang Yêsu bơtho athei lu bơ̆n pơma mă trŏ kơ tơdrong tơpă, ‘nĕ kơ pơthim dah tŭk “wă huay kơ sek tơlang” (Yakơ 5: 12).
Tơplơ̆ hăm nơ̆r yang kơnê̆ bơih ‘bă kơ tơdrong hơlĕnh, ‘Bok Kei-Dei bơih Tơ’ngla pơm tơpăt păng lu bơ̆n jing kon Sư bơih. Sơlam minh pôm dêh char “pơkă lơ, pơm ưh kơ trŏ nơ̆r pơkă kư̆m lơ” lu bơ̆n athei đei tơdrong arih pơm mă trŏ, tơpăt hăm bơ̆n kơdih păng lu bơngai jum dăr. thoi noh, klo kăn athei wei nơ̆r pơkă ‘mêm băl oei hơdai đĭ chăl arih. Lu bơngai mơdro sa, athei wei nơ̆r pơkă kơdih hăm bơngai jang sa hơdai păng bơngai nai. Lu bơngai pơm mĕ ‘bă, athei wei nơ̆r pơkă hăm kon hơ’lơ̆p.v.v…athei đei tơdrong pơm mă trŏ, bơngai lui tơpăt tơpă wă kơ tơ’bôh ăn kơ bơngai jum dăr.
Kơkuh kơ Ih, ơ Kră Yang ‘Bok Kei-Dei Tơ’ngla pơm tơpăt, lăm Ih ưh kơ đei minh tơdrong kiơ wă hơlĕnh, inh băt mơn ơei pơm tam mă trŏ nơ̆r pơkă, apĭnh ‘Bă mơnat păng tơgŭm inh ling lang pơm mă tơpăt trŏ thoi pơma păng lăm tơdrong jang. Apĭnh hơpơi chăl arih inh tơ’bôh Nơ̆r Ih kơ lu bơngai jum dăr, krao khan yua anăn Kră Yang Yêsu Krist. Amen.
Lu bơ̆n hăm wă khŏm wei nơ̆r bơ̆n kơdih pơkă?
Pao plĕnh, pao teh pơkă pơkăm
Nơ̆r pơma glăi dôm tơdrong ưh kơ jing
Nơ̆r Kră Yang bơtho ưh kơ hiơt
Arih pơm tơpăt, kơjăp lăm đon lui
Đŏk Sơ̆p hla bơar nơ̆r ‘Bok Kei-Dei lăm pêng sơnăm: Yakơ 5
Kênh Youtube BHKTHN:
