II Lu Pơtao 6:16-17
“Ơ Kră Yang, apinh Ih Tơ’bôh kơ inh trong Ih, Păng bơtho inh băt dôm trong gơlong Ih.” (Hơriso 25:4)
Nơ̆r jet tơchĕng pơwao:
– Yua kơ kiơ ‘Bok khan lê̆ adrol Ê-li-sê gơh krao khan ăn kơ đĭch đam sư?
– Tơdrong ‘noh wă tơ’bôh bu jơ̆ bơngai lu bơ̆n kăl kơ krao khan adrol hloh?
– Lu bơ̆n kăl kơ krao khan apinh Kră Yang tơdrong kiơ?
‘Bok khan lê̆ adrol ÊliSê gơh pơma hăm đĭch đam sư: “’Nĕ kơ hli” păng krao khan tơgŭm kơ sư yua kơ sư đei ‘bôh khul linh ‘Bok Kei-Dei lơ oei tăp pang kơ sư. Thoi noh, sư krao khan kơ bơngai nai “’bôh”, adrol hloh athei bơngai noh gơh “’bôh” dômtơdrong đei tơ’bôh, wă khan athei đei măt lăng gah bơhngol. Hơdrol kơ wă krao khan kơ bơngai nai wă kơ gơh pơih măt , lu bơ̆n athei apinh Kră yang pơih măt bơ̆n kơdih, yuih hŭt lê̆ che pĕng pơgăn, thoi dur pĕng pơm kơ bơ̆n ưh kơ ‘bôh dôm tơdrong wă kơ lăng ‘bôh gah bơhngol. Ưh kơ đei kiơ khan trŏ kơ hli hăm bơngai măt tol ngeh kơdih măt hơdah păng wă kơ bơngai nai athei yak năm mă trŏ thoi bơ̆n yak năm, mă loi sư lu bơ̆n jơ̆ bơngai wei pơgơ̆r dah bơ̆n bơngai bơtho đe nai (Mathiơ 15:14). Kư̆m ưh kơ đei hli kơ kiơ thoi hăm minh ‘nu bơngai ‘bơ̆r ling lang pơma khan đei đon lui mă lei kơplah đei tơdrong truh ưh kơ ,hơmet hăm đon lui mă; lei hơmet hăm tơdrong kĕ pran kơdih păng tơdrong gơh hơgei lăm teh đak.
Lu bơ̆n athei krao khan kơ kon hơ’lơ̆p, buăl juăt…gơh pơih măt wă kơ lăng ‘bôh chăl arih ưh kơ sĭ lăm teh đak âu đĕch mă lei lăm chăl ling lang mơ̆n, lăng ‘bôh tơdrong tôch đon kon bơngai ưh kơ đei Kră yang, pă[ng lăng ‘bôh Kră Yang Yêsu wă kơ sơng iŏk Tơdrong ‘Nao ‘Lơ̆ng Dŏng pơklaih.
Apinh Kră yang ăn kơ bơ̆n ling lang lăng ‘bôh tơdrong Kră yang oei hơdai păng pơgơ̆r hăm tơdrong mơsêh mơyang tơdrong tơpăt, gơh hơgei, păng tơdrong hiôk ‘lơ̆ng đơ̆ng Sư. Đei thoi noh bơ̆n huay kơ rơ du bơ̆l hăl kơ lăng ‘bôh tơdrong rơ du tơ răn kơdih, huay kơ pơang yua kơ gơneh gơnơm kơdih akâu. Kơplah lăng ‘bôh Kră yang ‘Bok Kei-Dei pơgơ̆r lăm tôm tơdrong, lu bơ̆n kư̆m băt kơnăl tơdrong Kră Yang hơmet wă kơ kĕ chơ̆n yak năm lăm Nơ̆r Kră Yang, băt chơ̆n jơhngơ̆m răp gô Kră Yang chông anhăk trŏ kơ jơ năr Sư mă khan tơdrong truh thoi yơ hĭ.
Apinh Kră Yang ăn kơ bơ̆n lăng ‘bôh tơdrong kơnhăm lăm chăl arih noh ưh kơsĭ kơ jên tơmam , tơdrong jang tih, tơdrong ‘lơ̆ng guăng, tơdrong hŏk gơh hơgei, tơdrong đe pơyom mălei noh tơdrong gĭt găl gah bơhngol oei kơjăp ling lang păng gĭt găl hloh (II Kôrintô 4: 18; I Pêtrôs 1:3-6).
Apinh Kră yang ăn kơ lu bơ̆n lăng ‘bôh chăl arih jơ̆ tơdrong tơblah gah bơhngol lu ayăt tơblah gah bơhngol noh đei tơpă, păng lu bơ̆n gơh đei tơblah hăm lu ayăt gah bơhngol hăm phao kơtoang gah bơhngol (Êphêsô 6:12-13). Apinh Kră yang ăn ‘bar pah măt lu bơ̆n gơh lar măt ‘bôh tơdrong yoch noh jơ̆ tơdrong yoch, păng ‘bôh tơdrong kơnê̆ noh ưh kơ layơ khan‘lơ̆ng, nơ̆r pơma hơlĕnh ưh kơ la yơ khan tơpăt, păng blơ̆ blah Kră yang ưh kơ đei layơ đei ba trong truh tơdrong pŭn hiôk (Tơdrong Pơđơ̆k 1:10-15).
Ơ Kră yang, apinh pơih măt bơhngol inh wă kơ inh ‘bôh tơdrong Ih pơgơ̆r lăm chăl arih inh. Apinh ăn kơinh ling lang chơ̆n jơhngơ̆m krao khan tang păng tơgŭm lu bơngai jum dăr kơ inh gơh pơih măt wă kơ lăng băt kơ Ih. Yua anăn Kră yang Yêsu Krist, Amen.
Bơ̆n krao khan adrol lu bơ̆n ngăl krao khan apinh Kră Yang ăn tơdrong kiơ?
Gơh ‘bôh tơdrong yoch bơ̆n kơdih
Đei iŏk tơdrong mơnat ăn, jơhngơ̆m hơdah hơdong
Hơpơi apinh kiơ̆ Kră Yang đĭ chăl arih
Mă đei pơmat tat jơhngơ̆m oei hiôk hơđơ̆ng
Đŏk Sơ̆p Hla ar ‘Bok Kei- Dei pêng sơnăm: I Hơ’mon 28
Kênh Youtube BHKTHN:
