Klei Aê Diê Blŭ: II Bruă Mtao 6:15-17
Êlan kliăng: “Ơ Yêhôwa, kâo akâo kơ ih mblang ală ñu čiăng kơ ñu dưi ƀuh.” (II Bruă Mtao 6:17a)
Klei êmuh ksiêm mĭn: Si klei Khua pô hưn êlâo Y-Êlisê wah lač brei leh kơ dĭng buăl ñu? Ya ngă ñu wah lač klei anăn? Si klei wah lač anei jing čiăng hĭn kơ drei?
Ti anăp klei dĭng buăl dôk huĭ snăk, Khua pô hưn êlâo Y-Êlisê lač: “Đăm huĭ ôh!” Pô dĭng buăl knŏng mâo klei êđăp ênang ti krah klei phung kahan roh dôk wang jŭm dar, tơdah ñu thâo ƀuh ya klei Khua pô hưn êlâo Y-Êlisê dôk ƀuh, anăn jing “phung dôk mbĭt hŏng drei jing lu hĭn kơ phung dôk mbĭt hŏng diñu” leh anăn “čư̆ bŏ hŏng aseh leh anăn êdeh aseh pui jŭm dar Y-Êlisê” (êlan 16-17). Blŭ mdê, Khua pô hưn êlâo Y-Êlisê amâo knŏng ƀuh klei mnuih mkăn ƀuh ôh, ƀiădah ñu ƀuh wăt klei Khua Yang čiăng kơ ñu ƀuh, ñu ƀuh leh klei truh myang dôk mbĭt êjai mnuih mkăn amâo ƀuh ôh, ñu ƀuh Aê Diê dôk kiă kriê leh anăn Ñu hlăk dôk mbĭt hŏng “mnuih Aê Diê”.
Si čiăng kơ pô dĭng buăl anei thâo ƀuh jih klei Khua pô hưn êlâo Y-Êlisê ƀuh? Knŏng tơdah ñu mâo Aê Diê mblang brei ală! Anăn yơh jing phŭn knhal kơ klei Khua pô hưn êlâo Y-Êlisê amâo mtă kơ dĭng buăl ñu ngă ya mta klei ôh, ƀiădah ñu akâo kơ Khua Yang mblang brei ală kơ gơ̆. Pô dĭng buăl anei amâo bum ală hlăm kđeh ôh ƀiădah gơ̆ bum ală hlăm klei thâo kral Khua Yang, bum ală myang.
Klei Khua pô hưn êlâo Y-Êlisê wah lač brei kơ dĭng buăl anei amâo djŏ čiăng đru kơ gơ̆ mâo klei dưi mdê yuôm hĭn, čiăng dưi ngă ya mta klei ôh, ƀiădah ñu akâo kơ Khua Yang brei gơ̆ mâo klei thâo ƀuh mrâo mrang. Aê Diê hmư̆ leh anăn wĭt lač leh kơ Khua pô hưn êlâo Y-Êlisê tơdah brei pô dĭng buăl ƀuh, amâo djŏ knŏng mâo hjăn phung kahan roh ôh, ƀiădah wăt mâo lu klei jing mkăn dôk mbĭt, êngao kơ klei ñu dưi ƀuh hŏng ală yang đar, mâo lu hdră êlan mgaih mkra myang đru kơ gơ̆ dưi găn gao klei luč čang hmăng, mâo sa Aê Diê ktang myang dôk mbĭt kăp kiă kriê răng mgang phung ƀuôn sang Ñu. Knŏng tơdah pô dĭng buăl ƀuh jih ya klei Khua pô hưn êlâo Y-Êlisê ƀuh kơh, ñu amâo lŏ huĭ ôh, leh anăn mâo klei êđăp ênang đăo knang kơ Khua Yang.
Drei khăng wah lač brei kơ ayŏng amai adei amâodah kơ phung drei khăp hơiêng mâo klei êđăp ênang, amâodah dôk kjăp ti anăp klei lông dlăng dleh dlan wăt hlăm klei mă bruă kơ Aê Diê, ƀiădah wơr bĭt hĕ, digơ̆ knŏng mâo klei êđăp ênang leh anăn dôk kjăp tơdah mâo Khua Yang mblang brei ală čiăng thâo ƀuh Aê Diê leh anăn bruă kngan Ñu. Kyuanăn, mta klei čiăng drei wah lač brei kơ ayŏng amai adei hlăm Phung Sang Aê Diê amâodah kơ mnuih hlăm sang drei, anăn jing klei akâo kơ Khua Yang mblang ală, čiăng thâo ƀuh mâo wăt klei jing myang dôk mbĭt, thâo ƀuh Khua Yang leh anăn Ñu yơh kiă kriê klei hdĭp digơ̆. Tơdah drei hmăng hmưi čiăng klei jăk siam kơ digơ̆, snăn brei drei wah lač hŏng jih ai tiê čiăng kơ Khua Yang brei digơ̆ thâo ƀuh Khua Yang leh anăn thâo kral Khua Yang. Kyua tơdah mngăt ai tiê ka mâo klei bi hlao, ală myang digơ̆ ka dưi ƀuh ôh, snăn klei huĭ, klei rŭng răng ăt dôk kiă kriê hlăm ai tiê digơ̆.
Ya jing klei čiăng yuôm hĭn kơ drei wah lač brei kơ phung anak ƀuôn sang Aê Diê, kơ phung drei khăp hơiêng leh anăn kơ drei pô?
Wah lač: Ơ Khua Yang, akâo Ih mblang ală myang kơ kâo leh anăn kơ ayŏng amai adei kâo, čiăng thâo ƀuh nanao Khua Yang leh anăn bruă prŏng prĭn Ih ngă. Brei kâo dôk kjăp leh anăn đăo knang kơ Khua Yang hŏng jih ai tiê wăt tơdah ya klei truh dưn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
