2 Vajntxwv 6:15-17
Nqe cim:
“Tus TSWV thov koj qhib nws lub qhov muag kom nws pom!” (2 Vajntxwv 6:17a)
Lus nug rau sawvdaws xav:
– Tus cev lus Elisas tau thov Vajtswv rau nws tubtxib li cas?
– Vim li cas nws yuav thov Vajtswv rau yam ntawd?
– Lo lus thov Vajtswv pab no cheemtsum rau peb li cas?
Thaum Elisas tus tubtxib ntshai heev, Elisas txhawb nws lub zog hais tias: “Tsis txhob ntshai” tus tubtxib no yuav tsuas muaj kev kaj siab thaum yeebncuab cov tub rog vij puag ncig yog nws pom tej uas Elisas pom, ntawd yog; “Peb tog muaj coob dua lawv tog” thiab “pom tej nees huab cua, tej tsheb nees nplaim taws nyob puv toj roob hauv pes ibncig Elisas” (nqe 16-17). Hais rau lwm seem, Elisas tsis yog saib pom tej uas lwm tus pom xwb, tiamsis nws tseem pom yam uas Vajtswv xav kom nws pom, yam uas muaj tseeb tiamsis lwm tus saib tsis pom. Elisas saib pom Vajtswv tabtom tswj txhua yam thiab tseem nrog “Vajtswv tus neeg nyob”.
Ua li cas tus tubtxib no thiaj saib pom tej uas Elisas saib pom? Tsuas yog thaum uas tau Vajtswv qhib nws qhovmuag xwb! Ntawd yog qhov vimchiv uas Elisas tsis hais kom tus tubtxib ua ib yam dabtsi li tiamsis tsuas yog thov Vajtswv qhib nws qhovmuag xwb. Tus tubtxib tsis digmuag sab nqaij tawv tiamsis nws tabtom digmuag hauv kev zeem paub Vajtswv, digmuag rau sab ntsujplig.
Tus cev lus Elisas lo lus thov Vajtswv rau tus tubtxib no tsis pab kom nws muaj peevxwm tshwjxeeb ua tau ib yam dabtsi twg, tiamsis yog thov Vajtswv pab kom nws muaj qhov saib pom tshiab. Vajtswv teb Elisas tej lus thov, thaum qhia rau tus tubtxib pom hais tias yeebncuab tsis yog lub zog loj tshwjxeeb uas tabtom muaj nyob, tiamsis muaj tej yam tabtom muaj nyob sab nraum uas nws yuav saib tsis pom los ntawm lub qhovmuag qaij tawv, muaj tej txoj haukev daws teebmeem uas los saum Tswv ntuj los pab nws hla dhau txojkev poob siab, muaj ib tug Vajtswv muaj hwjchim ibtxwm nyob nrog thiab tiv thaiv Nws haivneeg. Tsuas yog thaum uas tus tubtxib no saib pom tej uas Elisas saib pom ces nws thiaj li tsis ntshai thiab kaj siab tso siab rau Vajtswv.
Peb pheej thov Vajtswv rau peb cov kwvtij nkauj muam lossis cov uas peb hlub kom muaj kev kaj siab, lossis sawv taus ruaj khov tabmeeg tej kev sim siab kuj ib yam li hauv kev ua Vajtswv haujlwm, tiamsis peb tsis nco qab hais tias, lawv tsuas kaj siab thiab sawv ruaj khov thaum uas lawv tau Vajtswv qhib lub qhovmuag saib pom Vajtswv thiab Nws tes haujlwm xwb. Vim li ntawd, yam uas tsimnyog peb thov Vajtswv rau peb cov kwvtij nkauj muam hauv pawg ntseeg lossis yus tsev neeg ces yog, thov Vajtswv qhib lawv qhovmuag kom pom tej yam uas muaj tseeb ntawm sab ntsujplig tamsim no, kom lawv pom Vajtswv thiab Nws kev tswj lawv lub neej. Yog peb xav kom lawv ua tau yam zoo ces cia li tas siab thov Vajtswv rau lawv kom lawv pom thiab paub Vajtswv. Vim thaum sab ntsujplig nyob tsis zoo, ces lub qhovmuag sab ntsujplig yuav saib tsis pom tseeb, thaum ntawd muaj kev txhawj ntshai, nyob tsis kaj siab los kav lawv lub neej.
Thov Vajtswv,
Vajtswv, thov qhib nyuam yaus thiab nyuam yaus cov kwvtij nkauj muam lub qhovmuag kom saib pom Vajtswv Koj thiab Koj tes haujlwm. Txawm lub neej yuav zoo li cas los xij, thov pab nyuam yaus sawv ruaj khov thiab tso siab rau Vajtswv Koj. Nyuam yaus tuav Tswv Yexus Khetos lub npe thov. Amees.
Yam cheemtsum peb thov Vajtswv pab rau cov ntseeg, tsev neeg, thiab tus kheej yog dabtsi?
Nyeem Vajluskub hauv peb lub xyoos: 1 Xwmtxheej Vajntxwv 27
Kênh Youtube BHKTHN:
