Jô̆ Bơngai 12:10-15
“Mă-lei gah Inh bơtho iĕm thoi âu: Iĕm athei ‘mêm mơnat kơ lu bơngai mă pơm kơnê̆ kơ iĕm, krao khan apinh ‘Bok Kei-Dei tơgŭm sư” (Mathiơ 5:44)
Nơ̆r jet tơchĕng pơwao:
– Yua kơ kiơ yă Mari ‘bơm kơnê̆ jĭ chin?
– Đơ̆ng liơ Kră Yang pơklaih sư?
– Kră Yang Yêsu bơtho bơ̆n krao khan kơ lu bơngai ayăt pơm kơnê̆ kơ bơ̆n thoi yơ?
Lăm dôm khei sơnăm ‘bok Môis chông anhăk kon pơlei Isơrael năm lăm char glă, lơ wơ̆t sư tơ’bơ̆p tơdrong tơtok tơtăm, pơma jŏk păng pơm plơ̆ đơ̆ng lơ bơngai, mălei sư oei tơnăp chu nơ̆r Kră Yang chông anhăk kon pơlei Sư păng đĭ jơhngơ̆m krao khan tang kơ lu sư. (LĐ Êyiptơ 32:11-14).
Tơ âu, ‘bok Môis đei ‘nhŏng păng mŏ sư pơma kơnê̆ kơ sư păng blah plơ̆ sư yua kơ bre sư ‘maih wă pơgơ̆r mă Kră Yang ưh kơ ăn kơ bre sư. Na Kră Yang krao pêng ‘nu lu sư năm ‘bơ̆t anăp Kră Yang jur hăm hơmơ̆l dơ̆ng ‘bơ̆t Bơsŭn anih akŭm wă tơblang ăn kơ lu sư băt yua kơ kiơ Kră Yang ăn kơ ‘bok Môis pơm yŏng pơgơ̆r. Kră Yang hil mĭl dêh kơ yă Miriam ‘bok Arôn (Jô̆ bơngai 12:1-9). Kơplah Kră Yang tŏk đơ̆ng Bơsŭn anih akŭm, na yă Miriam ‘bơ̆m kơnê̆ “jĭ chin ‘bĕnh akâu tơ khôih nhen prĕl” ‘bok Arôn băt kơ tơdrong glăi bre sư na tơbral păng apinh ‘bok Môis mơnat wă kơ krao khan apinh Kră Yang mơnat ăn kơ bre sư. Mă khan ‘nhŏng păng mŏ sư pơma kơnê̆ kơ sư păng pơm plơ̆ kơ sư, mălei ‘bok Môis oei krao khan apinh Kră Yang mơnat ăn păng pơklaih ăn kơ mŏ sư. ‘Bok Kei-Dei tơl tơwih nơ̆r krao apinh ‘bok Môis păng Sư pơklaih ăn kơ yă Miriam đơ̆ng rŏng kơ tơpơh năr chĭt sư tơ ’nguaih kơ kơđông.
Tơdrong ‘lơ̆ng lăm Hla bơar ‘Bok Kei-Dei âu noh jơ̆ ‘bok Môis đei jơhngơ̆m krao khan tang. Sư ling lang kơchăng chă Kră Yang tang bơngai nai, păng Kră Yang tơl tơwih hăm tơdrong ‘mêm mơnat Sư. Kiơ̆ kơ jơhngơ̆m đon kon bơngai bơ̆n, bơ̆n ‘bônh kơ sơngah wă krao khan kơ lu bơngai mă pơm kơnê̆ kơ bơ̆n. Lăm tơdrong arih ‘bok Môis đei tơ’bơ̆p, mă khan ‘nhŏng păng mŏ sư pơm kơnê̆ kơ sư, sư oei đĭ jơhngơ̆m krao khan apinh Kră Yang pơklaih ăn kơ mŏ sư. “Môis krao khan apinh Kră Yang thoi âu: Ơ Kră Yang ‘Bok Kei-Dei! Inh hơdrĭ hơpơi kơ Ih pơklaih ăn kơ mŏ inh.” (trong 13).
‘Bok Môis đei pơm kơmĭl đĭ jơhngơ̆m krao khan apinh Kră Yang pơklaih jĭ mŏ sư mă pơm kơnê̆ kơ sư. Nơ̆r sư krao khan ưh kơ sĭ Kră Yang tơl tơwih pơklaih tơdrong jĭ gah sĕch akar đĕch ôh mă kư̆m pơklaih hloi bơhngol yă Miriam mơ̆n. Yua kơ tơdah ưh kơ gơh oei hơdai. Kră Yang Yêsu đei bơtho bơ̆n: “Mălei gah Inh bơtho iĕm thoi âu: Iĕm athei ‘mêm mơnat kơ lu bơngai mă pơm kơnê̆ kơ iĕm, krao khan apinh ‘Bok Kei-Dei tơgŭm sư. Thoi noh na iĕm gơh jing kon ‘Bok Kei-Dei bơ̆n tơ plĕnh ti, yua kơ sư kư̆m ‘mêm kơ lu bơngai noh, na Sư ăn măt ‘năr pơchrang hơdah kơ đĭ đăng bơngai, mă bơngai ‘lơ̆ng mă bơngai kơnê̆. Sư ăn đak ‘mi lei lăi mơ̆n ưh kơ ‘mêm kơ bu wă pơdê bu ôh.” (Mathiơ 5:44-45). Tơpă ưh kơ ‘bônh ôh pơm tơdrong âu, mălei jing kon ‘Bă tơ plĕnh ti, Tơ’ngla ăn tơdrong hiôk ‘lơ̆ng kơ đĭ đăng bơngai, bơ̆n athei chu yom kră Yang, băt tơchĕng ‘blŏk kơ lu bơngai oei jĭ jăn, păn hnong na krao khan tang kơ lu sư mă khan lu sư pơm anat kơ bơ̆n păng pơm kơnê̆ kơ bơ̆n, yua kơ bơ̆n băt tơpă Kră Yang gô dŏng tơgŭm bơ̆n.
Ơ Kră Yang, tơ’bơ̆p hăm lu bơngai pơm anat păng pơm kơnê̆ kơ inh, apinh Ih ăn kơ inh pơjao đĭ tôm tơdrong ăn kơ Ih. Apinh Kră Yang dŏng tơgŭm inh păng ăn kơ inh đĭ jơhngơ̆m krao khan kơ lu sư, mă loi kơplah lu sư đei tơdrong jĭ jăn, pơma tat, yua anăn Kră Yang Yêsu Krist, Amen.
Bơ̆n hăm đĭ jơhngơ̆m krao khan tang kơ lu bơngai mă pơm kơnê̆ kơ bơ̆n păng pơm plơ̆ bơ̆n ưh?
‘Mêm kơ bơngai pơm kơnê̆ pơrăm bơ̆n
‘Noh bơih pơ̆n kiơ̆ trong arih ‘lơ̆ng tơpăt kiơ̆ Yang ‘Bă
Mă đei lơ bơngai kơnê̆ tơpă
Kră Yang ling lang wă wei lăng, tơgŭm bơ̆n hơđơ̆ng
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 24
Kênh Youtube BHKTHN:
