Klei Aê Diê Blŭ: Y-Yakơ 5:13-15
Êlan kliăng: “Ñu pap brei kơ jih jang klei soh ih; Ñu bi hlao jih jang klei ruă duam ih;”(Klei Mmuñ Hđăp 103:3)
Klei êmuh ksiêm mĭn: Ya klei Y-Yakơ mtô kơ phung đăo brei ngă hlăk đuĕ hiu bru bra, tơdah êjai ruă duam amâodah êjai mâo klei hơ̆k mơak? Ya klei ñu mñă kơ klei ngă soh? Ya klei brei drei ngă êjai mâo klei ruă duam, amâodah tuôm hŏng klei knap mñai, rŭng răng hlăm klei hdĭp?
Wah lač jing msĕ si klei bi êwa leh anăn klei ktang klei hdĭp mngăt myang kơ phung đăo kơ Krist. Wah lač amâo djŏ jing sa mta bruă klei đăo, bruă ngă čuăn ruah tui si klei brei kơ pô ôh, ƀiădah jing klei bi mguôp hŏng Ama hlăm adiê hlăm djăp mmông hlăm djăp anôk hŏng klei bhiăn jing, msĕ si klei drei hrip angĭn bi êwa jih hruê mlam yơh. Hlăm hră čih mơĭt kơ pluh dua găp djuê hiu đuĕ bru bra, Y-Yakơ bi mđĭ ai phung dôk tŭ klei knap mñai kyua boh klei jing dôk hlăm ƀuôn sang êgar, knap mñai hlăm lu mta klei, msĕ snei, brei wah lač bĕ, čiăng mâo klei ktang dưi dôk kjăp êjai klei knap mñai. Hlei pô mâo klei đăo ktang hĭn, dlăng kơ “klei lông dlăng lu mta, brei diih yap klei anăn jing klei hơ̆k mơak sơăi” (Y-Yakơ 1:2) brei wăt wah lač hŏng klei mmuñ mpŭ mni kơ Khua Yang mơh. Hlei mnuih dôk ruă brei ñu iêô phung khua mduôn hlăm Phung Sang Aê Diê hriê trôč êa boh ôliwơ leh anăn wah lač. Klei trôč êa boh ôliwơ amâo djŏ jing êlan hdră mdrao klei ruă ôh, ƀiădah klei bi knăl kơ klei pap brei klei soh leh anăn bi doh kơ Khua Yang (Klei Kbiă 30:26-29). Khua Yang yơh srăng bi hlao leh anăn kơrŭ pô anăn lŏ kgŭ.
Êlan 15 kñăm kơ klei hdĭp myang mnuih ruă, Khua Yang srăng “bi mtlaih pô ruă”, “tơdah ñu ngă soh leh, Aê Diê srăng pap brei kơ ñu” . Y-Yakơ yua boh blŭ “tơdah” tinei brei ƀuh, amâo djŏ ôh jih jang klei ruă duam kbiă hriê mơ̆ng klei ngă soh sơăi, msĕ si boh klei truh kơ sa čô mnuih bum ală mơ̆ng tian amĭ, amâo djŏ kyua klei soh amĭ ama gơ̆ ôh (Y-Yôhan 9:1-3), amâodah boh klei ruă ngă kơ Y-Yôp amâodah kơ khua ƀĭng kna Y-Pôl, anăn jing klei lông dlăng, ƀiădah sĭt nik, sa klei hdĭp amâo mâo klei dưi ôh hlăm klei hdĭp myang khăng ngă klei soh yơh. Hdruôm hră Klei Aê Diê Blŭ Klei Bi Mguôp Hđăp lač leh, mâo klei bi djŏ tuôm ti krah klei ruă leh anăn klei soh (Klei Mmuñ Hđăp 38:3; Y-Mika 6:12-13; Y-Sôphôni 1:17). Khua Yang Yêsu ăt bi klă klei anăn msĕ mơh êjai Ñu bi hlao sa čô mnuih êwiên (Y-Yôhan 5:14). Klei Y-Yakơ mtô, brei ƀuh klei wah lač ba klei bi hlao kơ mnuih ruă hlăm asei mlei kđeh leh anăn mâo klei pap brei klei soh čiăng kơ klei hdĭp myang ktang kjăp.
Wah lač, hưn klei soh jing sa hlăm lu mta klei yuôm kơ knhuah klei hdĭp phung đăo kơ Krist, čiăng dưi mă tŭ klei pap brei klei soh leh anăn klei bi hlao hlăm asei mlei kđeh wăt hlăm mngăt ai tiê. Tơdah drei mâo klei ruă duam, amâodah klei jhat truh, klei rŭng răng hlăm klei hdĭp, êlâo hĭn brei ksiêm drei pô si ngă drei ngă soh mơ̆, amâo mpŭ kơ Khua Yang amâodah amâo ngă djŏ tui si klei Khua Yang čiăng. Hưn bĕ leh anăn lui hĕ, hŏng klei đăo myơr klei wah lač kơ Khua Yang. Sĭt yơh Khua Yang amâo bi hlao nanao klei ruă hlăm asei mlei kđeh ôh, ƀiădah sĭt nik tơdah mâo klei Khua Yang pap brei klei soh, mngăt ai tiê drei srăng lŏ bi mrâo, leh anăn drei srăng mâo klei bi hlao kluôm ênŭm hlăm hruê bi tuôm hŏng Khua Yang, dôk mbĭt hŏng Ñu.
Ya mta klei drei ƀuăn hŏng Khua Yang tơdah mâo klei pap brei klei soh leh anăn klei bi hlao?
Wah lač: Ơ Ama Pô jăk, kâo ngă soh leh hŏng Ama hlăm klei mĭn, klei blŭ leh anăn bruă ngă. Kâo amâo khăp kơ Ama hŏng jih ai tiê, amâo khăp kơ phung riêng gah msĕ si kơ kâo pô, leh anăn ka wah lač hŏng jih ai tiê ôh tơdah mâo klei ruă hlăm asei mlei kđeh amâodah hlăm mngăt ai tiê. Akâo kơ Ama pap brei klei soh kâo, bi hlao leh anăn brei klei êđăp ênang kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
