Mathais 21:6-11
Nqe cim:
“Cov neeg coob coob uas mus ua Yexus ntej thiab cov uas raws Yexus qab qw nrov nrov hais tias: Cia li qhuas Daviv tus Tub! Thov Vajtswv foom koob hmoov rau tus uas Vajtswv txib los! Cia li qhuas Vajtswv tus uas nyob saum ntuj ceebtsheej!” (Mathais 21:9)
Lus nug rau sawvdaws xav:
– Cov pejxeem hauv nroog Yeluxalees txais tos Tswv Yexus zoo li cas?
– Lawv cia siab tias Tswv Yexus yuav ua dabtsi rau lawv?
– Peb tabtom hu zaj nkauj dabtsi hais txog Tswv Yexus?
Thaum cov thwjtim coj ob niam tub nees luav los rau Tswv Yexus, lawv muab lawv tej ris tsho pua rau saum tus menyuam nees luav rau Tswv Yexus caij (Malakaus 11:7), ntawd yog tus menyuam nees luav uas tsis tau ris nra thiab tsis tau muaj neeg caij dua li. Thaum mus lawm hauv nroog Yeluxalees, Tswv Yexus tau cov pejxeem txais tos yam li ib tug vajntxwv, vim muaj neeg coob heev nyob qhov txhia chaw tuaj hauv Yeluxalees ua Kevcai Hla Dhau, thiab muaj coob leej twb paub Tswv Yexus lawm. Cov pejxeem muab lawv tej ris tsho lossis txiav ceg ntoo los pua rau hauv kev txais tos Tswv Yexus, ntawd kuj yog ib txoj kevcai txais tos ib tug vajntxwv (II Vajntxwv 9:13).
Muaj kev zoo siab heev hauv cov pejxeem. Lawv hu nkauj xyivfab qhuas Vajtswv hais tias: “Hauxana rau Davi tus tub. Thov cia peb yawg koob Davi lub tebchaws uas yuav los tau koob hmoov. Hauxana rau saum ntuj uas siab kawg nkaus” (nqe 9,10 HMOWSV). Lo lus “Hauxanas” txhais hais tias “thov cawm peb”, cov pejxeem tau siv tej lus hauv Ntawv Nkauj 118:25-26 los qhuas Tswv Yexus, lawv qhia tshwm nplooj siab nqhis nqhawv tos ntsoov Tus Cawmseej los, thiab lawv cia siab heev hais tias Tswv Yexus yuav yog Tus Cawmseej uas tsis yog los cawm lawv tus ntsujplig, tiamsis yog los cawm lawv dim ntawm tebchaws Loos kev tswjhwm. Cov neeg coob coob ntawd kev xyivfab ua rau tagnrho lub nroog xav tsis thoob, tomqab uas Tswv Yexus nkag mus hauv lub nroog lawm, lawv sib nug zom zaws hais tias: “Tus no yog leejtwg?” Tej neeg teb hais tias: “Tus no yog Yexus uas yog ib tug cev Vajtswv lus, nws tuaj pem lub nroog Naxales uas nyob hauv lub xeev Kalilais tuaj” (nqe 10–11). Thaum cov pejxeem lub siab txias lawm, lawv tsis hu Tswv Yexus ua Daviv tus Tub lossis tsis hu nkauj qhuas tias Nws yog Tus Cawmseej, nimno Tswv Yexus tsuas yog ib tug cev Vajtswv lus lawm xwb.
Cov neeg coob coob qhuas hais tias Tswv Yexus yog Daviv tus Tub, yog Tus Mexiyas, yog Tus Cawmseej, tiamsis lawv tsuas xav kom Tswv Yexus cawm lawv raws li lawv lub siabnyiam xwb. Lawv txhawb nqa Tswv Yexus, tiamsis tsuas xav kom Tswv Yexus cawm lawv dim sab nqaij tawv xwb tsis quavntsej txog sab ntsujplig. Niaj hnub nimno, muaj coob leej hauv peb yeej mus pehawm hauv Tuamtsev, hu nkauj qhuas Vajtswv, tiamsis tsuas yog xav kom Vajtswv daws lawv tej teebmeem hauv lubneej xwb. Yuav tsum ceevfaj, nyob tsam peb zoo li pab neeg coob coob thaum ub, hnub no qhuas Tswv Yexus, tiamsis thaum muaj yam tshwmsim tsis raws li peb siab nyiam ces rov thuam tus Tswv. Vajtswv twb hais rau nws haivneeg hais tias: “Cov neeg no lub ncauj qhuas kuv, tiamsis lawv lub siab tsis npuab kuv, tej lus uas lawv qhuas kuv tsis muaj qabhau li. Qhov uas lawv pehawm kuv tsuas yog ua raws li kevcai thiab neeg qhia xwb” (Yaxayas 29:13). Vajtswv tsis xav kom peb tsuas qhuas Nws raws li ib txojcai tiamsis lub siab ho niaj hnub ntshaw kom Nws ua raws peb lub siabnyiam. Peb yuav tsum nquag kawm Vajtswv Txojlus thiaj yuav paub Nws heev ntxiv thiab dhau qhov ntawd yuav ua rau peb pehawm thiab qhuas Nws kom tsimnyog.
Thov Vajtswv,
Tswv Yexus, nyuam yaus ua Koj tsaug uas Koj tau los hauv ntiajteb thiab tuag txhiv nyuam yaus saum tus ntoo khaublig. Thov pab nyuam yaus kom niaj hnub qhuas Koj yog Tus Cawmseej los ntawm nyuam yaus nplooj siab thiab lubneej. Nyuam yaus tuav Yexus Khetos lub npe thov, Amees.
Peb puas qhuas tus Tswv kawg siab kawg ntsws los ntawm nplooj siab zeem paub Nws txojkev hlub thiab Nws lub hwjchim lawm tau?
Nyeem Vajluskub hauv peb lub xyoos: I Xwmtxheej Vajntxwv 12
Kênh Youtube BHKTHN:
