Klei Aê Diê Blŭ: Y‑Mathiơ 21:6-11
Êlan kliăng: “Phung lu êbat ti anăp leh anăn ti tluôn Yêsu ur kraih, “Hôsana kơ Anak Y‑Đawit! Aê Diê mpŭ mni kơ Pô hriê hlăm anăn Khua Yang! Hôsana kơ Pô Ti Dlông Hĭn!” (Y‑Mathiơ 21:9)
Klei êmuh ksiêm mĭn: Si phung ƀuôn sang hlăm ƀuôn Yêrusalem drông leh Khua Yang Yêsu? Ya klei diñu čang hmăng Khua Yang srăng ngă kơ diñu? Ya klei mmuñ drei dôk mmuñ kơ Khua Yang Yêsu?
Tơdah phung ƀĭng anăn atăt aseh dliê ana leh anăn êđai gơ̆ kơ Khua Yang Yêsu, diñu siap ao diñu pô ti rŏng aseh êđai leh anăn Khua Yang đĭ (Y‑Markôs 11:7), anăn jing aseh dliê ka mâo knông leh anăn ka mâo pô đĭ ôh. Tơdah mŭt hlăm ƀuôn Yêrusalem, Khua Yang Yêsu dưi drông msĕ si sa čô mtao kyua lu mnuih mơ̆ng djăp anôk wĭt ti ƀuôn Yêrusalem nao hlăm knăm Klei Găn, hlăm anăn mâo lu mnuih thâo kral Khua Yang. Phung ƀuôn sang mă leh ao amâodah adhan kyâo siap ti êlan drông Khua Yang Yêsu, anei ăt jing klei bhiăn drông sa čô mtao (II Bruă Mtao 9:13).
Sa klei mơak prŏng snăk mơ̆ng êpul mnuih ƀuôn sang. Diñu bi ur driâo hơêč hmưi kơ Khua Yang, “Hôsana kơ Anak Y‑Đawit! Aê Diê mpŭ mni kơ Pô hriê hlăm anăn Khua Yang! Hôsana kơ Pô Ti Dlông Hĭn!” (êlan 9). “Hôsana” jing “akâo kơ Ih đru”, mnuih ƀuôn sang mă hlăm Klei Mmuñ Hđăp 118:25-26 čiăng bi mni kơ Khua Yang, diñu bi êdah klei čang hmăng dôk čang guôn Pô Bi Mtlaih hriê, leh anăn diñu čang hmăng snăk Khua Yang Yêsu jing Pô Bi Mtlaih, ƀiădah amâo djŏ bi mtlaih mngăt ôh, jing bi mtlaih diñu mơ̆ng klei Mtao Rôm kiă kriê. Klei phung lu ngă kơ jih ƀuôn prŏng bi kdjăt, leh Khua Yang Yêsu mŭt leh hlăm ƀuôn prŏng snăn diñu bi êmuh, “Hlei pô anei?” Phung lu lŏ wĭt lač, “Pô anei jing Yêsu, khua pô hưn êlâo mơ̆ng ƀuôn Nasaret čar Galilê.” (êlan 10-11). Tơdah leh ai tiê phung ƀuôn sang hrŏ leh, diñu amâo lŏ iêô Khua Yang jing Anak Mtao Đawit amâodah bi mni kơ Khua Yang jing Pô Bi Mtlaih yuôm bhăn ôh, ară anei Khua Yang amâo mdê ôh hŏng sa čô khua pô hưn êlâo.
Phung ƀuôn sang ur driâo Khua Yang jing Mtao Đawit, jing Yang Mêsi, jing Pô bi mtlaih, ƀiădah diñu lŏ čiăng Khua Yang bi mtlaih hlue si klei diñu čiăng. Diñu mpŭ mni kơ Khua Yang ƀiădah knŏng mđing Khua Yang bi mtlaih diñu hlăm klei hdĭp kđeh amâo mđing ôh kơ mngăt. Hruê anei, lu mnuih hlăm phung drei ăt nao sang Aê Diê, mmuñ bi mni kơ Aê Diê ƀiădah knŏng hŏng klei čang hmăng Khua Yang bi mtlaih mơ̆ng klei dleh dlan hlăm klei hdĭp. Kăp răng huĭdah drei msĕ si êpul mnuih ƀuôn sang dôk jŭm dar Khua Yang hlăk đưm, hơêč hmưi bi mni Khua Yang hruê anei leh anăn tơdah ƀuh djăp bruă truh amâo msĕ si klei pô čiăng snăn bi mlih ai tiê ƀuah Khua Yang. Aê Diê tuôm lač hŏng phung ƀuôn sang Ñu snei:
“Kyuadah phung ƀuôn sang anei hriê giăm kâo leh anăn mpŭ kơ kâo hŏng ƀăng êgei leh anăn êlah diñu, ƀiădah ai tiê diñu kbưi mơ̆ng kâo; leh anăn klei diñu huĭ mpŭ kơ kâo knŏng jing klei mnuih mtă diñu hriăm răk leh” (Y‑Êsai 29:13). Khua Yang amâo čiăng ôh kơ drei knŏng mpŭ mni kơ Ñu ti êngao ƀiădah hlăm ai tiê snăn čiăng kơ Khua Yang hlue ngă klei pô čiăng. Brei kriăng hriăm Klei Aê Diê Blŭ čiăng thâo kral Khua Yang klă hĭn leh anăn mơ̆ng anăn, drei kkuh mpŭ, bi mni kơ Khua Yang djŏ hĭn.
Drei mpŭ kơ Khua Yang hŏng jih ai tiê thâo kơ klei pap leh anăn klei myang Ñu mơ̆?
Wah lač: Ơ Khua Yang, kâo hdơr knga kơ Ih kyua Ih săn asei yuôm bhăn ti kyâo bi kal čiăng bi mtlaih kâo. Akâo kơ Ih đru kâo bi mni kơ Ih nanao jing Pô Bi Mtlaih hŏng jih ai tiê leh anăn knuih hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
