Galati 5:22-26
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Plei Yang Bơhngol ‘Lơ̆ng kiơ̆ kơ Sơ̆p Hla bơar ‘Bok Kei-Dei Galati 5:22-26.
22 Mă-lei plei Yang Bơhngol ‘Lơ̆ng đei: ‘Mêm mơnat, chơt hiôk, hơđơ̆ng, kĕ chơ̆n, gơh tơgŭm, iơ̆m dim, tơnăp, 23 iŏk đon ala, gơh gơ̆t; dôm tơdrong ‘lơ̆ng ‘noh yua kơ đơ̆ng Yang Bơhngol ‘Lơ̆ng tơgŭm bơ̆n ngăl. Tơdrong juăt ‘Bok Kei-Dei ưh kơ đei găn khă ôh dôm lu tơdrong ‘lơ̆ng noh. 24 Lu bơ̆n bơngai lui kơ Kră Yang Yêsu Krist đĭ hŭt lê̆ boih dôm lu tơdrong mă đon bơ̆n juăt kơ tơchĕng pơm tơdrong kơnê̆, dang lĕ kơ bơ̆n pơ̆ng dôm tơdrong noh tơ ‘long pơglang. 25 Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n. 26 Bơ̆n ‘nĕ pơang akâu bơ̆n kơdih. Bơ̆n ‘nĕ chă tơdrong wă tơhil dih băl păng ‘nĕ kơ ‘nhĕng dih băl.
Trong tơm ‘bai pơhrăm ‘nâu:
“Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n.” (Galati 5:25)
Nơ̆r jet tơchĕng pơwao:
– “Plei” jơ̆ đei yua lăm tơdrong awih awăn kơ Kră Yang phara hăm “Plei Yang Bơhngol ‘Lơ̆ng” thoi yơ?
– Bu jơ̆ bơngai đei dôm tơdrong ‘lơ̆ng đơ̆ng Plei Yang Bơhngol ‘Lơ̆ng?
– Pơm thoi yơ wă kơ Plei Yang Bơhngol ‘Lơ̆ng đei thim păng wơ̆ ‘lŏ lăm chăl arih bơ̆n?
Kơkuh kơ đĭ đăng,
Hla bơar nơ̆r ‘Bok Kei-Dei năr ‘nâu pơtơm hăm chư “Mălei” yua kơ đei dan đơ̆ng rŏng tơplơ̆ hăm dôm tơdrong pơm kiơ̆ kơ sĕch akar dan adrol. “Plei” lăm âu jơ̆ krao anăn kơsô̆ tŏ sĕt, lăp minh tŏ Plei Yang Bơhngol ‘Lơ̆ng đei tôm tơsĭn tơdrong ‘lơ̆ng đơ̆ng Yang Bơhngol ‘Lơ̆ng pơjing păng wơ̆ tŏk lăm tơdrong arih bơngai lui kơ Kră Yang. Plei Yang Bơhngol ‘Lơ̆ng tơ lăm bơ̆n oei pơjing hơnơ̆ng đĕch mă đơ̆ng tơdrong kiơ noh, kăl kơ đei bơngai nai bơwei. Phara hăm “Plei” dah “đei yua” lăm tơdrong jang awih awăn, bơtho ră roi jơ̆ dôm tơdrong tơ gah ‘nguaih kơ bơ̆n. Plei ei đei yua lăm dôm lu bơngai gah Kră Yang, thoi lu bơngai bơtho hơlĕnh lăm năr tôch ning mônh, lu sư khan kơ Kră Yang: “Ơ Kră Yang, nhôn yua anăn Ih pơtruh nơ̆r ‘Bok Kei-Dei, nhôn yua anăn Ih pơpuh yang kơnê̆ lĕch đơ̆ng akâu bơngai, păng nhôn pơm lơ tơdrong mơsêh mơyang nai yua anăn Ih” Bơ̆n đei tơchĕng khan ‘nâu bơih lu bơngai đei “Plei” yua tơpă, mălei Kră Yang khan: “Inh ưh kơ băt kơ lu iĕm âu ôh. Weh tơ nai năm, iĕm bơngai kơnê̆ ngăl.” (Mathiơ 7:22-23).
Thoi noh, Plei Yang Bơhngol ‘Lơ̆ng tơbăt kơ bơ̆n jơ̆ bơngai thoi yơ, ưh kơ trŏ khan bơ̆n pơm kiơ. Lei na bơngai bu đei Yang Bơhngol ‘Lơ̆ng? Trong 24 tơbăt ăn noh jơ̆ “lu bơngai gah ‘Bok Krist”. Adrol kơ noh, ‘bok Pôl bơtho khan noh jơ̆ lu bơngai đei Yang Bơhngol ‘Lơ̆ng dŏng pơklaih păng yak năm kiơ̆ Yang Bơhngol ‘Lơ̆ng (Galati 5:16).
‘Bok Pôl roi dôm tơdrong Plei Yang Bơhngol ‘Lơ̆ng tơdrong juăt ‘Bok Kei-Dei ưh kơ đei găn khă ôh dôm lu tơdrong ‘lơ̆ng noh (trong 23). Đơ̆ng noh sư khan: “lu bơ̆n bơngai lui kơ Kră Yang Yêsu Krist đĭ hŭt lê̆ bơih dôm lu tơdrong mă đon bơ̆n juăt kơ tơchĕng pơm tơdrong kơnê̆, dang lĕ kơ bơ̆n pơ̆ng dôm tơdrong noh tơ ‘long pơglang. Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n.” (trong 24, 25). Kơplah lui sơng iŏk Kră Yang Yêsu, sĕch akar păng dôm tơdrong pơm kiơ̆ kơ sĕch akar lu bơ̆n dang lĕ kơ pơ̆ng tơ ‘long pơglang bơih, tơdrong arih ‘nao đơ̆ng Yang Bơhngo ‘Lơ̆ng tuh ‘bĕnh blai lăm jơhngơ̆m, thoi noh athei yak kiơ̆ Yang Bơhngol ‘Lơ̆ng wă kơ đei dôm tơdrong ‘lơ̆ng đơ̆ng Yang Bơhngol ‘Lơ̆ng pơjing păng wơ̆ ‘lŏ lăm chăl arih bơ̆n.
Đei lơ bơngai thuơk trong tơm Galati 5:22, mălei ưh kơ trŏ kơ thuơk đĕch ôh athei arih păng yak kiơ̆ Yang Bơhngol ‘Lơ̆ng. Mă đơ̆ng bơ̆n tơ’bơ̆p tơdrong thoi yơ, liĕm akâu dah jĭ jăn, oei bơ̆jang lăm tơdrong jang kiơ noh, apinh Kră Yang ăn kơ lu bơ̆n ling lang băt kơ bơngai so bơ̆n pơ̆ng hơdai Yêsu tơ ‘long pơglang bơih, athei gơnang kơ Yang Bơhngol ‘Lơ̆ng wă kơ lơ bơngai ‘bôh Kră Yang lăm tơdrong arih lu bơ̆n.
Bơ̆n minh jơhngơ̆m đon lăm nơ̆r krao khan,
Ơ Yang Bơhngol ‘Lơ̆ng, apinh Ih tơgŭm inh pơ̆ng kơđinh bơngai so inh hơdai hăm Kră Yang rim năr. Apinh Kră Yang ăn kơ inh đei jơhngơ̆m pran đơ̆ng Yang Bơhngol ‘Lơ̆ng wă kơ Plei Yang Bơhngol ‘Lơ̆ng rim năr đei yua lăm chăl arih inh. Yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Chăl arih bơ̆n hăm đei tơ’bôh dôm tơdrong ‘lơ̆ng đơ̆ng Plei Yang Bơhngol ‘Lơ̆ng ưh? Yua kơ kiơ?
Mă tơ’bơ̆p tơdrong thoi yơ
Oei hơnơ̆ng đei yua, đơ̆ng Yang Bơhngol ‘Lơ̆ng tơgŭm
Chăl arih wơ̆ tŏk, ming ‘nao rim năr
Tơ’bôh tơdrong Kră Yang mơnat, ư-ang Anăn Sư
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 10
Kênh Youtube BHKTHN:
