Klei Aê Diê Blŭ: II Klei Yăl Dliê 32:1-3
Êlan kliăng: “Amâo djŏ knŏng dŭm anăn ôh, drei hơ̆k mơak mơh êjai drei tŭ klei knap mñai, kyuadah drei thâo klei knap mñai anăn bi truh klei gĭr; klei gĭr bi truh klei Aê Diê tŭ; leh anăn klei Aê Diê tŭ bi truh klei čang hmăng” (Rôm 5:3-4)
Klei êmuh ksiêm mĭn: Leh ruê̆ jih bruă sĭt suôr Mtao Hêsêkia ngă, ya klei truh? Ya ngă Aê Diê brei klei dleh dlan anăn truh lĕ? Ya klei tŭ dưn drei mâo mơ̆ng klei lông dlăng?
Leh ruê̆ jih bruă sĭt suôr Mtao Hêsêkia ngă čih yăl dliê leh hlăm II Klei Yăl Dliê mơ̆ng kdrêč 29-31, snăn hlăm thŭn tal pluh pă Mtao Hêsêkia kiă kriê (II Bruă Mtao 18:13), si tô hmô hlăm brô thŭn 701 êlâo kơ Krist, Y‑Sênakêrip mtao Asiri ba kahan hriê bi blah hŏng ƀuôn mâo kđông kahan čar Yuđa leh anăn čiăng mŭt bi blah hŏng ƀuôn Yêrusalem.
Tơdah dôk hlăm klei truh kơ Mtao Hêsêkia hlăk arăng mrâo hriê bi blah sĭt nik năng ai mâo lu mnuih srăng êdu ai. Tui si hră Klei Yăl Dliê, Mtao Hêsêkia hŏng jih ai tiê lŏ mjing klei kkuh mpŭ leh anăn mă bruă hlăm Sang Yêhôwa, duah Aê Diê hŏng klei gưt kơ klei bhiăn Aê Diê leh anăn klei Ñu mtă (II Klei Yăl Dliê 31:20-21) ƀiădah čar Yuđa ăt tuôm hŏng klei dleh dlan êdimima. Wăt tơdah hdruôm hră Klei Bi Mguôp Hđăp lač mbĭt leh anăn hră Klei Yăl Dliê lač mdê mñă nanao dưn kơ klei gưt asăp kơ Aê Diê srăng mâo klei jăk jĭn leh anăn klei êđăp ênang, ƀiădah amâo djŏ čiăng lač phung ngă tui si Klei Aê Diê Blŭ amâo srăng tuôm hŏng klei lông dlăng, klei dleh dlan ôh. Y‑Yôp msĕ mơh jing sa čô êkei “arăng dưi ƀuah ôh leh anăn kpă ênô, sa čô huĭ mpŭ kơ Aê Diê, leh anăn weh đuĕ mơ̆ng klei jhat” (Y‑Yôp 1:1) ƀiădah ñu ăt tuôm hŏng klei knap mñai mơh. Wăt tơdah ñu amâo thâo săng ôh ya ngă ñu tuôm hĕ hŏng klei knap mñai, ƀiădah ñu ăt lač: “Wăt tơdah Ñu bi mdjiê kâo dưn, ăt kâo srăng knang kơ Ñu” (Y‑Yôp 13:15). Mtao Hêsêkia msĕ snăn mơh, wăt ñu duah Aê Diê hŏng jih ai tiê dưn, ăt ñu tuôm hŏng klei dleh dlan, ƀiădah klei lông dlăng brei ñu knang kơ Aê Diê lu hĭn, mơ̆ng anăn hŏng klei jhŏng ñu bi mđĭ ai phung ƀuôn sang snei, “Jing ktang bĕ leh anăn dôk jhŏng. Đăm huĭ amâodah êdu ai ôh” (II Klei Yăl Dliê 32:7).
Klei hdĭp tui hlue Khua Yang amâo djŏ klei hdĭp amâo lŏ mâo klei lông dlăng ôh, ƀiădah mâo klei lông dlăng čiăng bi hriăm drei thâo knang hĭn kơ Khua Yang. Khua Yang amâo tuôm ƀuăn srăng brei kơ drei klei hdĭp amâo mâo klei lông dlăng ôh ƀiădah Ñu ƀuăn srăng dôk mbĭt hŏng drei hlăm klei lông dlăng. Mâo lu blư̆ drei duah Aê Diê hŏng jih ai tiê, kkuh mpŭ kơ Ñu nanao, hur har wah lač leh anăn dlăng Klei Aê Diê Blŭ grăp hruê, mă bruă kơ Ñu hŏng jih ai tiê, lu klei mkăn đa đa…ƀiădah hrô kơ mâo klei hdĭp êđăp ênang, snăn drei tuôm hŏng klei dleh dlan prŏng snăk. Klei dleh dlan anăn tăp năng jing klei kƀah prăk kăk, dleh dlan hlăm bruă knuă, amâodah mâo klei amâo suaih asei mlei drei pô amâodah mnuih hlăm gŏ sang drei, lu klei dleh dlan mkăn đa đa…Khua ƀĭng kna Y‑Pôl mtă, “Amâo djŏ knŏng dŭm anăn ôh, drei hơ̆k mơak mơh êjai drei tŭ klei knap mñai, kyuadah drei thâo klei knap mñai anăn bi truh klei gĭr; klei gĭr bi truh klei Aê Diê tŭ; leh anăn klei Aê Diê tŭ bi truh klei čang hmăng” (Rôm 5:3-4). Tơdah tuôm hŏng klei dleh dlan, akâo Khua Yang đru drei amâo đing ôh kơ klei khăp Ñu, ƀiădah gưt kơ klei Ñu čiăng leh anăn đăo kơ Ñu mâo hdră jăk hlăm klei lông dlăng čiăng klei đăo drei dưi đĭ hriê kơ prŏng hĭn hlăm Ñu.
Drei tŭ ư mă tŭ klei lông dlăng leh anăn ăt knang kjăp kơ Khua Yang nanao mơ̆?
Wah lač: Ơ Khua Yang, akâo Ih pap brei ya klei soh ăt adôk hlăm kâo. Brei kâo mâo ai tiê jhŏng kăp tŭ jih klei lông dlăng, klei dleh dlan leh anăn knang kơ Ih nanao hlăm djăp mta klei truh kyuadah kâo đăo sĭt nik Ih srăng brei klei jăk hĭn kơ kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 5-6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
