II Xwmtxheej Vajntxwv 31:20-21
Nqe cim:
“Vajntxwv Hexekiyas ua nws tes haujlwm ncaj ncees, thoob plaws lub tebchaws Yudas thiaj ua haum tus TSWV uas yog nws tus Vajtswv siab.” (II Xwmtxheej Vajntxwv 31:20)
Lus nug rau sawvdaws xav:
– Vajntxwv Hexekiyas tau ua txhua yam los ntawm tus cwjpwm zoo licas? Qhov txiajntsig yog dabtsi?
– Lub tswvyim pab kom peb muaj kev vammeej, kev zoo siab thiab kev kaj siab yog dabtsi?
Ob nqe Vajluskub no hais sau zog txog Vajntxwv Hexekiyas lubneej thiab yog nqe lus xaus rau tshooj 29 mus txog tshooj 31 hauv phau ntawv II Xwmtxheej Vajntxwv. Pib txij tshooj 29 peb pom hais tias Vajntxwv Hexekiyas tau los ua vajntxwv thaum nws muaj 25 xyoos thiab kav hauv Yeluxalees tau 29 xyoos thiab nws “ua lub neej raws li tus TSWV lub siab nyiam.” Thaum xaus tshooj 31, kuj rov hais dua hais tias vajntxwv “ua nws tes haujlwm ncaj ncees, thoob plaws lub tebchaws Yudas thiaj ua haum tus TSWV uas yog nws tus Vajtswv siab.” Peb tshooj no feem ntau yog piav txog tej haujlwm zoo thiab ncaj ncees uas vajntxwv tau ua, xws li: rhuav tshem tej mlom, rov txhim tsa kev pehawm Vajtswv hauv lub Tuamtsev Yeluxalees, nqua hu cov pejxeem rov los cuag Vajtswv thiab ua Kevcai Hla Dhau, rov txhim tsa cov neeg ua haujlwm hauv Tuamtsev, thiab txhim tsa kev fij khoom kom muaj txaus rau cov povthawj thiab cov Levis tau siv.
Qhov uas Vajntxwv Hexekiyas saib tseemceeb tshaj plaws hauv peb tshooj no tsis yog kev muaj hwjchim tswj teb kav chaw lossis kev nto npe, tiamsis tseemceeb yog ua yam zoo, ua ncaj thiab raug cai tabmeeg Vajtswv. Ob nqe lus xaus no qhia meej txog lub homphiaj uas vajntxwv tsom thiab txojkev uas nws ua, nrog rau qhov txiaj ntsig uas nws tau txais. Nws lub homphiaj tseemceeb tshaj yog nrhiav tus Tswv, txojkev uas nws ua yog ua txhua yam kawg siab kawg ntsws, thiab tej txiaj ntsig nws tau yog ua tiav txhua yam thiab “vammeej”. Nyob hauv kev nrhiav tus Tswv, vajntxwv mloog thiab ua raws li tus Tswv lub siabnyiam uas tau qhia hauv tus Tswv Txoj Kevcai kom coj tau cov pejxeem rov los cuag tus Tswv. Vajntxwv tau siv zog kawg siab ua kom cov pejxeem rov qab los pehawm tus Tswv hauv lub Tuamtsev, thiab txhua yam uas nws ua tus Tswv puavleej pub ua tiav thiab tau cov pejxeem kub siab lug ua raws.
Vajntxwv Hexekiyas to taub hais tias kev vammeej tseeb, tsis hais hauv sab nqaij tawv thiab sab ntsujplig, tsuas muaj thaum coj raws li Vajtswv Txoj Kevcai, nrog rau kev nrhiav Vajtswv kawg siab kawg ntsws (nqe 20-21). Nqe lus xaus ntawm phau Xwmtxheej Vajntxwv hais txog Vajntxwv Hexekiyas lub neej kuj yog tej uas Vajtswv saib pom hauv nws lub neej, ntawd yog ib lub neej uas haum Vajtswv siab, tau Vajtswv foom koob hmoov. Qhov txiaj ntsig ntawm vajntxwv kev hwm thiab lub siab kub lug rau Vajtswv kuj coj tau koob hmoov loj los rau cov pejxeem huv tibsi. Qhov no kuj yog tej lus uas Vajntxwv Daviv tau qhia rau Vajntxwv Xalumoos; Vajntxwv Xalumoos tau ua raws thiab tau kev vammeej. Yog Vajtswv cov menyuam, peb kuj yuav tsum muaj lub neej zoo, ncaj ncees thiab raug cai tabmeeg ntawm Vajtswv xubntiag thiab ua raws li Vajtswv Txojlus qhia txawm tias ua neej zoo li ntawd yuav muaj ntau yam kev dag ntxias thiab kev nyuaj. Lub homphiaj tseemceeb hauv peb lub neej yuav tsum yog kev nrhiav Vajtswv, tsis yog nrhiav nyiaj txiag los sis koob meej thiab ntawd thiaj yog lub tswvyim uas coj peb mus rau kev vammeej, kev zoo siab thiab kev kaj siab.
Thov Vajtswv,
Tus Tswv, thov pab nyuam yaus niaj hnub ua yam zoo, ncaj ncees thiab raug cai tabmeeg Koj, nrhiav Koj kawg siab kawg ntsws kom nyuam yaus tau Koj siv ua Koj tes haujlwm. Nyuam yaus tuav Yexus Khetos lub npe thov, Amees.
Peb puas tabtom ua neej thiab ua tus Tswv tes haujlwm kawg siab kawg ntsws, ua zoo thiab ncaj ncees lawm tau?
Nyeem Vajluskub hauv peb lub xyoos: I Xwmtxheej Vajntxwv 3-4
Kênh Youtube BHKTHN:
https://www.youtube.com/c/bhkthn
