Klei Aê Diê Blŭ: II Klei Yăl Dliê 31:20-21
Êlan kliăng: “Ñu ngă klei jăk leh anăn djŏ hŏng klei sĭt suôr ti anăp Yêhôwa Aê Diê ñu” (II Klei Yăl Dliê 31:20)
Klei êmuh ksiêm mĭn: Hŏng si ai tiê Mtao Hêsêkia ngă jih jang bruă? Hŏng ya hdră êlan drei srăng mâo klei čăt đĭ, klei hơ̆k mơak leh anăn klei êđăp ênang?
Dua êlan Klei Aê Diê Blŭ anei čih bi klă kơ klei hdĭp Mtao Hêsêkia leh anăn klah čŭn kơ kdrêč 29 truh kơ kdrêč 30 hră II Klei Yăl Dliê. Mơ̆ng kŏ kdrêč 29 brei thâo Y‑Hêsêkia dơ̆ng kiă kriê tơdah ñu mâo dua pluh êma thŭn, leh anăn kiă kriê dua pluh dua păn thŭn hlăm ƀuôn Yêrusalem leh anăn “ngă klei djŏ ti anăp ală Yêhôwa.” Bi ruê̆ kdrêč 31 ăt brei thâo ñu “ngă klei jăk leh anăn djŏ hŏng klei sĭt suôr ti anăp Yêhôwa Aê Diê ñu.” Knŏng tlâo kdrêč anei čih yăl dliê kơ klei jăk, klei djŏ ñu ngă, hlăm anăn mâo klei bi rai hĕ rup phung yang, lŏ mjing klei kkuh mpŭ hlăm sang Yêhôwa, iêô jak phung ƀuôn sang lŏ wĭt kơ Aê Diê leh anăn hdơr mpŭ kơ Knăm Klei Găn, lŏ bi mbha phung mă bruă kơ Aê Diê hlăm Sang Aê Diê, lŏ ngă klei myơr čiăng čiêm rông phung khua ngă yang leh anăn phung Lêwi.
Klei Mtao Hêsêkia uêñ mĭn prŏng hĭn čih yăl dliê leh hlăm tlâo kdrêč anei amâo djŏ klei dưi mơ̆ng klei kđi čar amâodah klei hing ang ôh, ƀiădah jing klei ñu ngă klei jăk, klei djŏ leh anăn dôk sĭt suôr ti anăp Aê Diê. Dua êlan bi ruê̆ anei brei ƀuh klei ñu kñăm čiăng wăt hdră ñu ngă leh boh tŭ dưn ñu mă tŭ leh msĕ mơh. Klei ñu kñăm čiăng prŏng hĭn jing duah Aê Diê, hdră ñu ngă leh jing ngă bruă kơ Aê Diê hŏng jih ai tiê, leh anăn boh tŭ dưn ñu mă tŭ leh jing klei “čăt đĭ”, jih jang bruă ñu ngă jing sơăi. Hlăm klei duah Aê Diê, ñu gưt kơ klei Aê Diê čiăng bi êdah leh hlăm Klei Bhiăn leh anăn Klei Aê Diê Mtă čiăng atăt phung ƀuôn sang lŏ wĭt kơ Aê Diê. Ñu gĭr hŏng jih ai tiê čiăng atăt phung ƀuôn sang lŏ wĭt kkuh mpŭ kơ Aê Diê hlăm Sang Aê Diê, jih jang bruă ñu ngă Aê Diê brei jing sơăi, phung ƀuôn sang ngă hŏng klei hur har.
Mtao Hêsêkia thâo knŏng ngă tui si klei bhiăn leh anăn gưt kơ klei Aê Diê mtă, duah Aê Diê hŏng jih ai tiê yơh srăng mâo klei čăt đĭ hlăm klei hdĭp myang wăt kơ klei hdĭp kđeh (êlan 20-21). Hdruôm hră Klei Yăl Dliê klah čŭn kơ klei hdĭp Mtao Hêsêkia ăt jing klei Aê Diê dlăng kơ klei hdĭp ñu msĕ mơh, anăn jing klei hdĭp bi mơak kơ Aê Diê, mâo klei jăk jĭn Aê Diê brei. Boh mơ̆ng klei ñu huĭ mpŭ kơ Aê Diê leh anăn klei ñu hlơr kơ bruă Aê Diê ba hriê klei jăk jĭn êbeh dlai kơ phung ƀuôn sang msĕ mơh. Anei ăt jing klei Mtao Đawit bi hriăm Mtao Salômôn mơh; Mtao Salômôn hlue ngă leh anăn mâo klei jing leh anăn čăt đĭ. Jing phung đăo, brei drei ăt hdĭp hŏng klei jăk, klei djŏ leh anăn sĭt suôr mơh ti anăp Aê Diê, ngă tui si klei Ñu mtă, wăt tơdah hdĭp msĕ snăn drei srăng tuôm hŏng lu klei mplư leh anăn klei bi kgăn drei. Klei kñăm čiăng prŏng hĭn kơ klei hdĭp drei jing duah Aê Diê, amâo djŏ duah dŏ ngăn, klei hing ang ôh, leh anăn – anăn yơh jing hdră êlan drei srăng mâo klei čăt đĭ, klei hơ̆k mơak leh anăn klei êđăp ênang.
Drei dôk hdĭp leh anăn mă bruă kơ Khua Yang hŏng jih ai tiê, hŏng klei djŏ leh anăn hŏng klei sĭt suôr mơ̆?
Wah lač: Ơ Khua Yang, brei kâo ngă klei jăk, klei djŏ leh anăn klei sĭt suôr ti anăp Ih, duah Ih jih hruê kâo dôk hdĭp čiăng kơ Ih mơak yua kâo hlăm bruă Sang Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 3-4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
