Klei Aê Diê Blŭ: Y-Mathiơ 21:1-6
Êlan kliăng: “Hơ̆k kdơ̆k êdi bĕ, Ơ Anak Mniê Ƀuôn Siôn! Ur driâo bĕ, Ơ anak mniê ƀuôn Yêrusalem! Nĕ anei, mtao ih hriê kơ ih, Ñu kpă ênô leh anăn mâo klei bi mtlaih, luă gŭ đĭ sa drei aseh dliê, sa drei êđai aseh dliê.” (Y-Sakari 9:9)
Klei êmuh ksiêm mĭn: Tơdah giăm truh ƀuôn Yêrusalem, ya bruă Khua Yang Yêsu brei dua ƀĭng kna ngă? Khua Yang đĭ aseh dliê nao hlăm ƀuôn brei ƀuh si Ñu jing Pô luă gŭ? Ya klei drei srăng mâo tơdah tui hriăm hlue si ai tiê klei mĭn Khua Yang luă gŭ?
Tơdah Khua Yang Yêsu nao ti ƀuôn Yêrusalem hlăm knăm Klei Găn, truh ti ƀuôn Bethani kbưi hŏng ƀuôn Yêrusalem tlâo km, Ñu tiŏ nao dua čô ƀĭng kna nao ti ƀuôn Betphajê, tinăn diñu srăng ƀuh sa ana aseh dliê leh anăn sa drei êđai. Khua Yang čiăng diñu đoh ba dua drei aseh dliê anăn kơ Ñu, tơdah arăng êmuh kơ diih, brei diih lač, Khua Yang čiăng kơ digơ̆ leh anăn pô anăn srăng brei đoh ba dua drei aseh dliê anăn. Wăt tơdah phung ƀĭng kna ka thâo săng ôh ya ngă Khua Yang Yêsu tiŏ nao diñu ngă snăn leh anăn ya klei srăng truh, ƀiădah diñu ăt gưt asăp Khua Yang leh anăn ngă djŏ hlue si klei Ñu mtă, ba aseh dliê ana leh anăn êđai kơ Khua Yang. Diñu lang ao pô ti rŏng aseh leh anăn Khua Yang đĭ.
Rup aseh dliê jing mnơ̆ng mtao khăng đĭ (I Bruă Mtao 1:33), Khua Yang Yêsu srăng nao ti ƀuôn Yêrusalem hŏng klei jing sa čô Mtao. Ñu srăng bi sĭt kluôm dhuôm klei blŭ mơ̆ng Khua pô hưn êlâo Y-Sakari 500 thŭn êlâo (Y-Sakari 9:9). Khua pô hưn êlâo Y-Sakari lač thiăm kơ drei knuih Mtao Yêsu, anăn jing Mtao “kpă ênô”, jing Ñu hriê čiăng ngă klei kpă ênô mơ̆ng Aê Diê čiăng kơ klei soh jih jang anak mnuih dưi pap brei. Klei kñăm Khua Yang Yêsu hriê jing čiăng bi mtlaih anak mnuih, Ñu jing Mtao ba klei tŭ dưn kơ phung ƀuôn sang pô. Amâo msĕ hŏng mtao ti lăn ala ôh, Khua Yang Yêsu hriê amâo djŏ hŏng klei dưi kiă kriê leh anăn gĭt gai ôh, ƀiădah Ñu hriê hlăm klei “luă gŭ”, bi ti gŭ pô, êdu êun, săn asei, tŭ klei luč liê. Khua Yang Yêsu mŭt hlăm ƀuôn prŏng hŏng klei luă gŭ, đĭ aseh dliê êđei, jing êđai aseh dliê ana mâo knông, jing klei ruah hlue si klei Aê Diê čiăng; jing Pô hriê ti lăn ala hlăm bruă klam jing Khua Yang Pô Bi Mtlaih, nao hlăm ƀuôn prŏng Aê Diê hŏng klei luă gŭ đĭ ti rŏng sa mnơ̆ng mâo knông bi hmô kơ bruă Ñu srăng klam brei knông klei soh jih lăn ala.
Phung Sang Aê Diê hruê anei ăt mñă kơ klei Khua Yang Yêsu nao hlăm ƀuôn Yêrusalem bi knăl kơ hruê kăm Ñu Tŭ Klei Knap Mñai. Rup Khua Yang luă gŭ đĭ êđai aseh dliê, đru drei bi mĭn kơ klei grăp čô drei brei klam knông mơ̆ng Khua Yang Yêsu leh anăn tui hriăm klei Ñu bi hmô luă gŭ, bi ti gŭ pô čiăng kơ mngăt drei dưi mdei msĕ si Klei Aê Diê Blŭ čih leh: “Brei diih đua knông kâo leh anăn hriăm mơ̆ng kâo, kyuadah kâo jing ênang leh anăn mâo ai tiê luă gŭ; leh anăn mngăt diih srăng mdei” (Y-Mathiơ 11:29). Tơdah hdĭp luă gŭ hlue si klei Khua Yang bi hmô, drei srăng mâo klei êđăp ênang, jăk mơak hlăm mngăt ai tiê.
Drei dôk hdĭp knuih hdĭp luă gŭ hŏng phung riêng gah mơ̆?
Wah lač: Ơ Khua Yang, bi mni kơ Ih bi hmô leh knuih hdĭp luă gŭ, bi ti gŭ pô leh anăn mtô kâo klam knông mơ̆ng Ih. Akâo kơ Ih đru kâo hdơr kâo jing dŏ Ih leh anăn grăp hruê brei bi êdah knuih hdĭp luă gŭ hŏng phung riêng gah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 58
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
