Mathais 21:1-6
Nqe cim:
“Cov neeg hauv Xi-oos, nej cia li zoo siab, cia li zoo siab! Cov neeg hauv Yeluxalees, nej cia li qw zoo siab hlo! Saib lauj, nej tus vajntxwv tabtom los cuag nej lawm! Nws yog tus ncaj ncees thiab coj kev muaj yeej los, tiamsis nws txo hwjchim thiab caij ib tug neesluav los.” (Xakhaliyas 9:9)
Lus nug rau sawvdaws xav:
- Thaum mus yuav txog lub nroog Yeluxalees, Tswv Yexus txib ob tug thwjtim mus ua dabtsi?
- Tswv Yexus caij nees luav mus rau hauv lub nroog qhia tias Nws yog tus txo hwjchim licas?
- Peb yuav tau txais dabtsi yog peb kawm raws li Tswv Yexus kev txo hwjchim?
Tswv Yexus mus lawm nram lub nroog Yeluxalees ua Kevcai Hla Dhau, thaum mus txog lub zos Npethanis kem Yeluxalees deb kwvlam peb daim phiaj zeb, Nws txib ob tug thwjtim mus lawm hauv lub zos Npefakhes, nkawd yuav pom ob niamtub neesluav khi cia qhov ntawd. Tswv Yexus kom nkawd cab ob tug nees luav ntawd los rau Nws, thaum tus tswv neesluav nug txog, nkawd tsuas teb tias tus Tswv xav siv, ces luag yuav cia nkawd cab los. Txawm tias cov thwjtim tsis tau nkag siab tias vim licas Tswv Yexus ho txib nkawd mus ua li ntawd, tiamsis nkawd yeej mloog lus thiab ua raws nraim li Tswv Yexus tej lus, coj ob niam tub neesluav los rau tus Tswv. Nkawd hle nkawd ob lub tsho ntev los pua tus menyuam neesluav nraubqaum rau Yexus caij.
Tus neesluav yog yam tsiaj uas tej vajntxwv kheev caij (I Vajntxwv 1:33), Tswv Yexus yuav mus hauv nroog Yeluxalees zoo li ib tug Vajntxwv. Nws ua tiav raws nraim li tus Cevlus Xakhaliyas tej lus cev tseg 500 xyoo ua ntej (Xakhaliyas 9:9). Tus Cevlus Xakhaliyas piav qhia rau peb txog Vajntxwv Yexus tus cwjpwm, ntawd yog tus Vajntxwv “ncajncees,” txhais tau tias Nws los ua kom tiav txojcai ncajncees ntawm Vajtswv kom tagnrho neeg ntiajteb tej kev txhaum tau zam. Lub homphiaj uas Tswv Yexus los hauv ntiajteb yog los cawm tibneeg dim, Nws yog tus Vajntxwv uas coj kev zoo los rau Nws haivneeg. Tsis thooj li lwm tus vajntxwv hauv ntiajteb, Tswv Yexus tsis los nrog lub hwjchim, kev quabyuam, kev tswjkav, tiamsis los nrog kev “txo hwjchim”, mos muag, txaus siab tuag txhiv tibneeg. Tswv Yexus mus lawm hauv lub nroog los ntawm kev txo hwjchim, uas yog caij tus menyuam nees luav, Nws yog kev xaiv raws li Vajtswv lub siabnyiam; yog tus txaus siab los hauv ntiajteb ua lub luag haujlwm Cawmseej, Nws los hauv Vajtswv lub nroog dawbhuv nrog kev txo hwjchim, caij ib tug tsiaj ris nra ua yamntxwv rau qhov uas Nws yuav ris tagnrho neeg ntiajteb tej kev txhaum.
Pawg Ntseeg niaj hnub nimno tseem nco txog zaj uas Tswv Yexus mus hauv nroog Yeluxalees zoo li lub cim uas pib lub limtiam Tswv Yexus Raug Txomnyem. Daim duab Tswv Yexus caij tus menyuam nees luav, pab peb nco txog qhov uas peb txhua tus yuav tsum kwv Tswv Yexus tus quab thiab kawm raws Nws tus qauv ua siab mos muag, txo hwjchim, peb tus ntsujplig thiaj tau so li Tswv Yexus hais tias: “Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so” (Mathais 11:29). Thaum ua neej txo hwjchim li Tswv Yexus, peb thiaj nrhiav tau kev kaj siab, tau so sab ntsujplig.
Thov Vajtswv,
Tus Tswv, nyuam yaus ua Koj tsaug vim Koj ua qauv zoo hauv kev txo hwjchim, ua siab mos muag thiab qhia nyuam yaus kwv Koj tus quab. Thov qhia nyuam yaus nco ntsoov tias nyuam yaus yog Koj li thiab yuav tsum qhia tshwm lubneej txo hwjchim rau lwm tus txhua hnub. Nyuam yaus tuav Tswv Yexus Khetos lub npe thov, Amees.
Peb puas tabtom ua lub neej txo hwjchim nrog cov neeg nyob ib ncig?
Nyeem Vajluskub hauv peb lub xyoos: Yaxayas 58
Kênh Youtube BHKTHN:
