Klei Aê Diê Blŭ: Y-Mathiơ 20:29-34
Êlan kliăng: “Ƀiădah Aê Diê, Pô mdrŏng hŏng klei pap, kyua klei Ñu khăp kơ drei prŏng snăk” (Êphêsô 2:4)
Klei êmuh ksiêm mĭn: Mơ̆ng ya klei dua čô bum ală mâo Aê Diê bi hlao ală? Ya klei hriăm kơ drei mơ̆ng klei Khua Yang Yêsu dôk hĕ bi hlao ală kơ dua čô bum ală ti djiêo êlan? Ya klei mñă kơ drei kơ ai tiê klei mĭn mă bruă?
Tơdah Khua Yang Yêsu leh anăn phung ƀĭng kna kbiă mơ̆ng ƀuôn Yêrikô, sa êpul lu mnuih ƀuôn sang tui hlue Ñu. Mâo dua čô bum ală ti djiêo êlan, tơdah diñu hmư̆ kơ Yêsu găn tinăn, diñu ur kraih, “Ơ Khua Yang, Anak Y-Đawit, pap mñai kơ hmei đa!” (êlan 30). Wăt tơdah phung lu ghă diñu brei diñu dôk ñăt; ƀiădah diñu lŏ ur kraih hĭn êjai. Khua Yang Yêsu dôk tinăn leh anăn iêo diñu êmuh ya klei diñu čiăng Khua Yang ngă kơ pô, diñu akâo kơ Khua Yang bi hlao ală diñu dưi ƀuh mngač. Khua Yang pap ruêh ală diñu, snăn ală diñu ƀuh mngač mtam, leh anăn diñu tui hlue Yêsu.
Dua čô bum ală hlăm klei yăl dliê anei mdê hjăn snăk, amâo msĕ si phung mkăn ôh. Ală diñu amâo ƀuh êlan ôh ƀiădah ală hlăm mngăt mngač, diñu lač Khua Yang Yêsu jing “Anak Y-Đawit” brei ƀuh hŏng klei jing bum ală, diñu knŏng hmư̆ sa kdrêč kơ Khua Yang ƀiădah diñu ăt thâo Khua Yang jing Yang Mêsi hriê leh, Pô mâo klei myang dưi bi mngač ală diñu. Kyua anăn diñu gĭr ur kraih hŏng Khua Yang wăt tơdah arăng gang dưn mơh, arăng ăl dưn mơh ăt kăn êdu ai, dlăng phă anôk kñăm nao truh. Phung ƀuôn sang Yuđa thâo klă Yang Mêsi srăng hriê jing anak Mtao Đawit ƀiădah diñu amâo đăo ôh anăn jing Khua Yang Yêsu. Dua čô bum ală anei wăt tơdah klei thâo săng điêt, klei đăo ka kluôm ênŭm ôh ƀiădah knŏng čiăng nao kơ Khua Yang hŏng jih klei đăo pô mâo, diñu mâo klei Khua Yang pap brei, wĭt lač leh anăn dưi brei ƀuh klei mngač kơ ală. Tơdah ală ƀuh leh, diñu tui hlue Khua Yang Yêsu. Klei anei brei ƀuh klei đăo diñu hriê kơ prŏng leh thâo klei myang bi hlao yuôm bhăn mơ̆ng Khua Yang, diñu čuăn ai tiê mtam Khua Yang Yêsu jing Pô diñu srăng myơr jih klei hdĭp čiăng tui hlue.
Khua Yang Yêsu mrâo mtô kơ phung ƀĭng kna kơ klei mă bruă hlăm ai tiê jing dĭng buăl, duah klei yuôm bhăn mơ̆ng Ƀuôn Ala Mtao Adiê, amâo djŏ hŏng klei mă klei dưi kiă kriê ôh ƀiădah hŏng klei jing dĭng buăl kơ grăp čô mnuih; amâo djŏ hŏng klei duah klei arăng mpŭ ôh ƀiădah bi ti gŭ pô mă bruă leh anăn dlăng kơ pô mkăn năng mpŭ hĭn kơ pô. Leh anăn mtam, Ñu dôk hĕ čiăng mă bruă kơ sa čô bum ală dôk ti djiêô êlan hlăk êjai jih jang mnuih dlăng hơăi mang, ăl ngêñ leh anăn gang hĕ. Khua Yang amâo djŏ knŏng mtô kơ klei hriăm ôh ƀiădah Ñu bi hmô leh hŏng bruă ngă kơ phung ƀĭng kna tui hlue. Anei jing klei grăp čô drei brei tui hriăm leh anăn ngă hlăm klei mă bruă kơ Khua Yang. Brei drei nao kơ Khua Yang, kjăp ai tiê tui hlue Ñu wăt tơdah mâo klei bi kgăn, arăng ngă jhat dưn. Brei gĭr tui hlue Khua Yang kyua Ñu ăt bi hlao kơ mngăt drei. Mă bruă bĕ kơ Khua Yang leh anăn kơ ayŏng amai adei pô hŏng jih ai tiê.
Drei thâo kral mơ̆ kơ klei pap Khua Yang bi hlao leh mngăt ai tiê drei čiăng ƀuăn rơ̆ng tui hlue Khua Yang leh anăn mă bruă kơ Ñu?
Wah lač: Ơ Khua Yang, bi mni kơ klei pap Ih kyua Khua Yang bi mtlaih leh kâo mơ̆ng klei bum hlăm mngăt. Akâo kơ Ih đru kâo đăo knang nanao êbat tui hlue Ih, jao jih klei hdĭp leh anăn myơr kơ Khua Yang jih klei hdĭp kâo čiăng mă bruă hlăm ai tiê jing dĭng buăl tui si klei Ih bi hmô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 57
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
