Mathais 20:29-34
Nqe cim:
“Tiamsis Vajtswv hlub peb kawg nkaus li.” (Efexus 2:4)
Lus nug rau sawvdaws xav:
- Vim licas ob tug neeg digmuag thiaj tau Tswv Yexus kho pom kev?
- Qhov uas Tswv Yexus nres los kho ob tug neeg digmuag zaum thov khawv ntawm ntug kev qhia peb ib zaj kawm licas?
- Zaj no ceebtoom peb txog yam dabtsi hauv kev ua haujlwm pab lwm tus?
Thaum Tswv Yexus thiab cov thwjtim tabtom tawm hauv lub nroog Yelikaus mus, muaj ib pab neeg coob coob raws Nws qab. Muaj ob tug neeg digmuag zaum ntawm ntug kev, thaum nkawd hnov tias Tswv Yexus tabtom dhau kev los, nkawd txawm qw nrov nrov hais tias, “Daviv tus Tub! Thov koj hlub wb!” (nqe 30). Txawm muaj neeg cheem thiab txwv, los nkawd hajyam qw nrov heev dua qub. Tswv Yexus thiaj nres thiab hu nkawd los nug tias nkawd xav kom Nws pab yam dabtsi, nkawd thov kom tau pom kev. Tswv Yexus hlub nkawd, thiaj cev Nws txhais tes mus kov nkawd ob lub qhov muag. Ces nkawd txawm pom kev thiab nrog Tswv Yexus mus.
Ob tug neeg digmuag hauv zaj no tshwjxeeb heev, tsis zoo thooj lwm tus. Nkawd ob lub qhov muag nqaij tawv tsis pom kev tiamsis qhov muag sab ntsujplig ho pom kev, nkawd muab Tswv Yexus hu ua “Daviv tus Tub!”, qhov no qhia tias txawm yog nkawd tsuas tau hnov txog Tswv Yexus ib mentsis xwb, tiamsis nkawd paub tias Tswv Yexus yog tus Mexiyas uas los lawm, Nws muaj hwjchim kho tau nkawd. Vim li ntawd nkawd thiaj ua siab tawv qhawv hu Tswv Yexus, txawm raug luag cheem, luag txwv los yeej tsis tso tseg. Cov neeg Yudais yeej paub tias Tus Mexiyas yug los ntawm Vajntxwv Daviv cajces, tiamsis lawv tsis ntseeg tias Tswv Yexus yog tus ntawd. Ob tug digmuag no txawm nkawd paub tsis tau ntau, kev ntseeg tsis tau txaus, tiamsis nkawd los cuag tus Tswv ntawm tagnrho txojkev ntseeg nkawd muaj, thiaj tau tus Tswv hlub, teb lus thov thiab pub rau nkawd pom kev. Thaum pom kev lawm, nkawd txiav txim siab nrog Tswv Yexus mus. Qhov no qhia tias nkawd txojkev ntseeg loj hlob tomqab uas tau Tswv Yexus lub hwjchim kho zoo, nkawd txiav txim siab kiag hais tias Tswv Yexus yog tus uas nkawd yuav tsum raws qab mus tas nkawd simneej .
Tswv Yexus nyuam qhuav qhia cov thwjtim txog kev ua haujlwm zoo li ib tug tub qhe, nrhiav kev ua tus loj hauv Vajtswv Lub Tebchaws, tsis yog los ntawm kev siv hwjchim tswjkav, tiamsis yog ua qhev rau lwm tus; tsis yog nrhiav tau luag hwm, tiamsis yog txo hwjchim ua haujlwm thiab saib lwm tus siab dua yus tus kheej. Tsis ntev xwb, Tswv Yexus twb nres pab ob tug neeg digmuag zaum thov khawv ntawm ntug kev uas raug lwm tus saib tsis taus, cem thiab cheem. Tswv Yexus tsis yog tsuas qhia ntawm ncauj lus xwb, tiamsis Nws ua qauv los ntawm tes haujlwm tiag tiag kom cov thwjtim ua raws. Qhov no yog yam uas peb txhua tus yuav tsum kawm thiab coj los siv hauv kev ua Vajtswv haujlwm. Cia li los cuag Tswv Yexus, ua lub siab tawv qhawv txawm yuav raug luag cheem lossis raug tsimtxom. Cia li txiav txim siab nrog Tswv Yexus mus vim Nws twb kho peb sab ntsujplig lawm. Cia li ua Vajtswv haujlwm thiab pab lwm tus kawg siab kawg ntsws.
Thov Vajtswv,
Tus Tswv, thov ua tsaug rau Koj txoj kev hlub cawm nyuam yaus dim ntawm kev digmuag sab ntsujplig. Thov pab nyuam yaus niaj hnub nrog Koj mus, cia siab rau Koj thiab siv lubneej ua Koj tes haujlwm los ntawm nplooj siab ua qhev raws li Tswv Yexus tus qauv. Nyuam yaus tuav Tswv Yexus Khetos lub npe thov, Amees.
Peb puas zeem paub tus Tswv tej koob hmoov kho peb sab ntsujplig kom txiav txim siab nrog tus Tswv mus thiab ua Nws tes haujlwm lawm tau?
Nyeem Vajluskub hauv peb lub xyoos: Yaxayas 57
Kênh Youtube BHKTHN:
