II Hơ’mon 31:2-5
“…Mă-lei gah inh păng hnam inh gô chu yom păng pơm kiơ̆ kơ Kră Yang.”(Jôsuê 24:15)
Nơ̆r jet tơchĕng pơwao:
– Pơtao Hesekia wơ̆t tơiung ming dơ̆ng tơdrong kiơ?
– Pơtao iŏk mŭk tơmam sư kơdih wă pơm kiơ păng roi ăn kơ kon pơlei tơdrong kiơ?
– Lu bơ̆n kăl kơ pơm kiơ ăn kơ hnam dơnŏ bơ̆n kơdih wă kơ đĭ đăng lăm hnam dơnŏ arih hăm jơhngơ̆m kơkuh kơ Kră Yang rim năr?
Đŏng rŏng kơ Giĕng Năm Brih păng Giĕng Sa ‘Bĕng ưh kơ đei ‘Buih Pông, Pơtao Hesekia tơiung ming dơ̆ng lu tơdrong jang lăm lu ‘bok soi păng bơngai Lêwi. Lu sư đei asong băl đei ‘bar jĭt puăn tơdrong jang dah asong băl wei gah kiơ̆ kơ đei asong băl đơ̆ng Pơtao Đawit (I Hơ’mon 24:1-31). Pơtao wă kơ đơ̆ng rŏng kơ kon pơlei năm akŭm năr giĕng gĭt găl wă kơ tơdrong kơkuh oei đei lăm hnam akŭm rim năr, rim giĕng, rim khei, rim sơnăm kiơ̆ thoi Kră Yang đei bơtho pơkă. Lu ‘bok soi chu pŭ tơdrong soi pơyơ̆r tơmam soi ‘buh păng tơmam soi bơnê; lu bơngai Lêwi tơgŭm lu ‘bok soi, hiơ̆k bơ̆jang lăm hnam Akŭm, bơnê păng hơri ư-ang kơ Kră Yang.
Pơtao Hesekia kư̆m hiơ̆k tơgŭm tơmam hăm tơmam sư kơdih tơgŭm lu tơmam soi ‘buh rim năr, lăm noh đei tơmam soi ‘buh rim pơge, rim kơsơ̆, rim giĕng wă khan tơmam soi ‘buh lăm năr Sa’bat, tơmam soi ‘buh rim khei wă khan tơmam soi ‘buh lăm năr mă mônh, păng tơmam soi ‘buh rim sơnăm lăm năr giĕng âu, mălei ưh kơ đei pơgŏ đơ̆ng hnam pơtao athei ăn lu tơmam sem dơrong (Lêwi 23: Jô̆ bơngai 28:29). Đơ̆ng noh đei ‘bôh pơtao Hesekia đei pơyơ̆r hơmrah. Pơtao kư̆m krao pơtơm kon pơlei wang hơdai wă kơ lu ‘bok soi păng bơngai Lêwi đĭ jơhngơ̆m bơ̆jang kơ Kră Yang. Kơplah nơ̆r athei ‘nao đei roi tơbăt, kon pơlei chĕp ba lu tơmam blŭng a lăm bơyan păng tơmam minh lăm mơjĭt mă lu sư đei.
Pơtao Hesekia ưh kơ sĭ lăp tơiung ming tơdrong kơkuh kơ Kră Yang lăm hnam akŭm lăm tơdrong hơrĭ hơrĭ wă kơ kon pơlei gơh kơkuh kơ Kră Yang đĕch ôh, mălei sư kư̆m pơm kơmĭl lăm tơdrong pơyơ̆r tơgŭm tơdrong kơkuh păng kon pơlei kư̆m pơm kiơ̆ đĭ jơhngơ̆m. Rim ‘nu lu bơ̆n athei đei jơhngơ̆m đon hiơ̆k ăn kơ chăl arih gah bơhngol lu bôl buăl wă kơ lu sư đei jơhngơ̆m ‘maih kơkuh kơ Kră Yang rim năr, rim giĕng, rim khei, rim sơnăm. Rim hnam dơnŏ kăl kơ đei jơ năr akŭm lăm hnam dơnŏ, wă kơ rim ‘nu krao khan hơdai đŏk nơ̆r Kră Yang rim năr, lăm tơdrong akŭm rim giĕng. Lu bơngai lăm hnam dơnŏ đei tơdrong jang adrin pơm kiơ̆ lăm tơdrong akŭm tơnăp lăm tơdrong akŭm lăm hnam dơnŏ păng tơnăp lăm tơdrong krao khan kơdih rim pơge păng tơdrong akŭm kơkuh kơ Kră Yang. Pơtao Hesekia sư băt tơpă lăp minh tơdrong đĕch wă kơ gơh mơnat ăn, đei Kră Yang oei hơdai păng đei pŭn hiôk noh jơ̆ athei kơkuh kơ Kră Yang rim năr. Kơplah rok kiơ̆ kơmĭl pơtao Hesekia lu bơ̆n đei tơgŭm hnam dơnŏ đei pŭn hiôk.
Ơ Kră Yang, apinh Ih ăn kơ inh lăng gĭt kăl jơ akŭm lăm hnam dơno kư̆m thoi đŏk Sơ̆p Hla bơar nơ̆r ‘Bok Kei-Dei păng krao khan rim năr, wă kơ inh gơh tơ’bơ̆p Ih păng wă kơ Ih đei bơtho tơ’bôh kơ inh rim năr. Apinh Ih ăn kơ inh chông anhăk hnam dơnŏ tơnăp tơdrong akŭm kơkuh kơ Ih rim năr. Yua anăn Kră Yang Yêsu Krist, Amen.
Lu bơ̆n tam đei jơ năr akŭm lăm hnam dơnŏ ưh? Lu bơ̆n hăm tơnăp krao khan lăng nơ̆r ‘Bok Kei-Dei rim năr?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 43
Kênh Youtube BHKTHN:
