Mathais 28:5-7
Nqe cim:
“Nws tsis nyob ntawm no, nws twb sawv raws li nws qhia tseg lawm.” (Mathais 28:6a)
Lus nug rau sawvdaws xav:
– Peb pom cov pojniam mus saib tus Tswv lub ntxa ua zoo li cas?
– Qhov uas Tswv Yexus sawv raws li Nws qhia tseg muaj lub ntsiab li cas rau cov thwjtim thaud thiab peb tamsim no?
Tus Tswv cov thwjtim nyuaj siab kawg nkaus thiab hlub thaum pom lawv tus xibhwb raug ntsia saum ntoo khaublig, raug ua saib tsis taus zoo ib yam li tus neeg txhaum loj. Thaum hnub Xanpataus dhau mus, cov pojniam sib coj mus saib tus Tswv lub ntxa vim lawv tshua tus Tswv heev. Lawv ntxhov siab hnyo. Lawv txhawj thiab tsis paub tias ntsug kev lawv mus yuav zoo li cas.
Thaum mus txog chaw, lawv pom daim lag zeb npog rooj ntxas qhib rau ib cag, lawv pom Vajtswv tus timtswv hnav tsho dawb paug thiab muaj tshwjchim sawv ntawd (Mathais 28:2-3). Tus timtswv hais rau cov pojniam ntawd tias, “Neb tsis txhob ntshai” (nqe 5). Lawv tsis txhob ntshai, vim txhua yam nimno twb txawv lawm: Tswv Yexus twb sawv hauv qhov tuag los, kev tuag kav tsis tau Nws lawm.
“Nws tsis nyob ntawm no, Nws twb sawv raws li Nws qhia tseg lawm” (nqe 6). Qhov uas Tswv Yexus sawv tsis yog timkhawv qhia paub Nws kovyeej kev tuag xwb, tseem qhia paub tias txhua yam Nws qhia puavleej ua tiav lawm. Lub sijhawm uas Nws ua haujlwm, tus Tswv twb hais ua ntej ntau zaus txog zaj no (saib Mathais 16:21). Tiamsis tej zaum txojkev nyuaj siab uas pom Tswv Yexus raug ntsia saum ntoo khaublig ua rau cov thwjtim hnov qab tej lus uas Nws qhia tseg. Yog li, qhov uas rov hais txog zaj Tswv Yexus sawv, raws li Nws qhia tseg yuav pab tau kom lawv tsis ntshai, tiamsis muaj kev cia siab kev ntseeg.
Ua koob tsheej nco txog Tswv Yexus raug txomnyem ua rau peb txhua tus nyuaj siab, hlub tshua Nws. Vim peb tej kev txhaum, tus Tswv muab Nws lub cev rau luag ntsia saum ntoo khaublig this peb. Txojkev nyuaj siab tseeb yuav ua rau peb muaj lub siab lees txim, ua tus Tswv tsaug vim Nws txojkev tuag txhiv. Tiamsis hais txog tus Tswv sawv raws li Nws qhia tseg ua rau peb muaj kev zoo siab, cia siab thiab ruaj siab. Tswv Yexus kovyeej txojkev tuag, ces cov neeg uas nrog Nws mus kuj yuav tau kev tabpov nyob mus ibtxhis, kev tuag tsis kav peb lawm. Tus Tswv tej lus cog tseg puavleej yuav tiav hauv cov neeg uas ntseeg Nws lub neej. Txawm yog tamsim no yuav zoo li cas, txawm yog ntsug kev nrog tus Tswv mus muaj kev sim siab li cas, thov Vajtswv pub rau peb txhua tus rau siab ntseeg, tus Tswv hais li cas Nws ua li ntawd: “nej yuav muaj txojsia nyob, rau qhov kuv muaj txojsia nyob” (Yauhas 14:19).
Thov Vajtswv,
Thov qhuas Tswv Yexus, rau qhov Koj sawv rov los raws li Koj tau qhia tseg, hnub no nyuam yaus thiaj tseem muaj txojsia thiab muaj kev cia siab mus ibtxhis. Thov Koj lub hwjchim pab kom nyuam yaus muaj zog tiv taus dhau tej kev sim siab thaum nrog Koj mus, ua tau tus ntseeg ncaj ncees thiab ua Koj tes haujlwm, vim paub tias Koj yog tus Tswv ciaj sia thiab yuav ua raws li Koj hais. Nyuam yaus tuav Tswv Yexus lub npe thov, Amees.
Peb puas ruaj siab thaum paub tias tus Tswv muaj hwjchim thiab ua raws li Nws hais? Peb tabtom nrog tus Tswv zoo li cas?
Nyeem Vajluskub hauv peb lub xyoo: II Vajntxwv 12
Kênh Youtube BHKTHN:
