Rôm 12:9-21
“Bơ̆n ‘mêm kơ bôl athei ‘mêm mă tơpă, areh kơ tơdrong kơnê̆, athei adrin chă tơdrong ‘lơ̆ng.” (Rôm 12:9)
Nơ̆r jet tơchĕng pơwao:
– Lu tơdrong ayơ pơm kơ chăl arih ‘nao bơngai lui?
– ‘Bok Pôl tơblang tơdrong arih ‘mêm mơnat đơ̆ng tơdrong pơm tơ’bôh thoi yơ?
– Lu bơ̆n kăl kơ pơm kiơ wă kơ chăl arih ‘nao ‘mêm mơnat lăm Kră Yang?
‘Bok Pôl đei bơtho minh ‘bar tơdrong arih ‘nao lăm Kră Yang. Mă minh, tơdrong gĭt tơm sư noh ‘mêm kơ bôl buăl athei ‘mêm mơnat (trong 9-10; 15-16). Tơdrong ‘mêm âu ưh kơ đei dơ̆ng ‘bơ̆t nơ̆r pơma khan ‘mêm đĕch ôh. Pơdrŭt băl păng pơ’lơ̆ng mălei tơchĕng jrŭ ‘biơ̆, noh pơm tơ’bôh hloi, tơgŭm băl wơ̆ ‘lŏ lăm Kră Yang. Tơdrong ‘mêm sĭt tơpă ưh kơ tơmơ̆t hơdai hăm tơdrong yoch mălei tơgŭm băl weh ataih đơ̆ng tơdrong kơnê̆ na pơm tơdrong ‘lơ̆ng. tơdrong ‘mêm đei iơ̆m dim, minh jơhngơ̆m hơđơ̆ng, băt pơyom dih băl, pơma dơnuh dih băl thoi ‘nhŏng oh lăm hnam dơnŏ Kră Yang. Tơdrong ‘mêm tơgŭm bơ̆n băt mơnat hăm bơngai cheng bơ̆n, ‘bôh đe hiôk chơt bơ̆n dai wang chơt hiôk ‘bôh đei sơ’ngon hơdai wă sơ’ngon. Lăm tơdrong ‘mêm Kră Yang đĕch, na lu bơ̆n gơh arih minh jơhngơ̆m đon. Bơngai lui băt dôm tơdrong hiôk ‘lơ̆ng păng dôm tơdrong gơh hơgei đơ̆ng Kră Yang ăn. Thoi noh, na bơ̆n ‘nĕ kơ pơang kơ đe khan bơ̆n bơngai hơgei, hlôh wao mălei bơ̆n ling lang athei iŏk jơhngơ̆m dim na mơ̆ng đe pơma.
Mă ‘bar, bơngai lui athei pơnam kơ jang na đei tơmam tơgŭm kơdih akâu hnam dơnŏ, tơgŭm tơdrong jang Kră Yang (trong 11, 13, 17). Bơngai lui kơ Kră Yang ưh kơ gơh ling lang krao khan apinh Kră Yang ăn ‘bĕng mana đĕch, mălei athei băt yua jơhngơ̆m pran păng jơ năr Kră Yang ăn wă bơ̆jang băt sơng iŏk tơmoi, băt tơgŭm tơmam kơ ‘nhŏng oh bơngai lui kăl, ‘maih pơm tơdrong ‘lơ̆ng ‘bơ̆t anăp bơngai tơpôl noh kư̆m tơ’bôh wă kơ băt ‘noh bơngai lui. Lu bơ̆n gô arih ‘lơ̆ng đei ‘bơm truh tơ bơngai nai păng ưang kơ Kră Yang.
Mă pêng, bơngai lui ưh kơ wer ôh tơdrong pơmat tat truh (trong 2). Thoi noh, na lu bơ̆n athei lui gơnang kơ Kră Yang, Tơ’ngla mă ăn kơ lu bơ̆n tơmam kăl yua păng hơđơ̆ng lăm jơhngơ̆m. Lăm chăl arih, lu bơ̆n athei hơmet ming chăl arih lui yom wă kơ wơ̆ ‘lŏ gah bơhngol. (Rôm 12:12).
Mă puăn, minh tơdrong arih ‘nao ‘noh athei ‘mêm kơ bơngai pơm kơnê̆ kơ bơ̆n “Đe pơm kơnê̆ kơ bơ̆n, bơ̆n ‘nĕ pơm tơwih kơ đe, bơ̆n athei pơm ‘lơ̆ng pơm trŏ, pơm kiơ̆ kơ tơdrong bôl buăl mă lăp đon; bơ̆n pơm thoi noh đĕch ‘lơ̆ng. Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ đăng bơngai. Ơ ‘nhŏng oh mă inh ‘mêm kơeng, bơ̆n ‘nĕ kơ pơm tơwih kơ đe tơdrong kơnê̆ hŏ, gô mơ̆ng kơ ‘Bok Kei-Dei pơm tơwih đĕch ‘bơ ‘bang. Yua kơ tơdrong noh sơ̆ ‘Bok Kei-Dei đei khan thoi âu: Lê̆ kơ Inh pơm tơwih kơ bơngai pơm kơnê̆ noh; Inh gô phak sư yua kơ sư pơm kơnê̆. Yua kơ thoi noh na bơ̆n huay kơ kăl pơm kơnê̆ kơ đe. Lăm hla bơar ‘Bok Kei-Dei kư̆m đei khan dơ̆ng thoi âu: Bu pơm kơnê̆ kơ bơ̆n, kơnh pơgê bơ̆n ‘bôh sư pơngot dah kơ’bah tơmam kiơ, bơ̆n rai tơgŭm bơngai noh; dah sư ol kơ đak bơ̆n ăn nhă. Dah bơ̆n pơm kơ sư thoi noh, noh sư huay pơm kơnê̆ kơ bơ̆n, sư wih mơlâu kơ bơ̆n dơ̆ng. Thoi noh na bơ̆n ‘nĕ pơm tơwih kơ sư tơdrong kơnê̆; bơ̆n pơm ‘lơ̆ng kơ sư đĕch wih jei bơ̆n.” (trong 14, 17-21). Bơ̆n ‘nĕ pơm tơwih, gô mơ̆ng kơ ‘Bok Kei-Dei đĕch. Arih băt mơnat, băt klah asong păng pơm ‘lơ̆ng hăm bơngai nai, ‘noh bơih plei đơ̆ng lăm chăl arih wơ̆ ‘lŏ, ‘bĕnh blai Yang Bơhngol ‘Lơ̆ng.
Wă kơ đei tơdrong arih ‘nao lăm Kră Yang, tơdrong ‘mêm bơih pơm hơnă, tơdrong ‘mêm mă Kră Yang ăn đei pơtrŭt lu bơ̆n arih đei yua păng ưang kơ Kră Yang.
Ơ Kră Yang! Apinh Ih tơgŭm inh arih ‘nao rim năr yua đơ̆ng Ih ăn jơhngơ̆m pran păng tơdrong ‘mêm Ih ăn. Kơplah inh ‘bôh anat dêh wă ‘mêm bơngai ayơ ‘noh, apinh Ih tơ’blŏk kơ inh. Đơ̆ng tơdrong ‘mêm păng tơdrong ‘lơ̆ng Ih ăn na inh gơh tơplih truh dang ei, krao khan yua anăn Kră Yang Yêsu Krist, Amen!
Lu bơ̆n oei tơblah hăm tơdrong kiơ lăm tơdrong arih ‘nao?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 7
Kênh Youtube BHKTHN:
