Luka 18:1-8
“Klaih kơ noh Yêsu pơma pơtih gia kơ lu sư thoi âu wă kơ lu sư băt kơ krao khan ling lang huay kơ hăl” (Luka 18:1).
Nơ̆r jet tơchĕng pơwao:
– Tơdrong Hơ’mon ‘nâu chih roi kơ minh ‘nu bơngai hơpơi tơdrong kiơ wă apinh Kră Yang?
– Pơm hơnă ayơ wă kơ lu bơ̆n adrin krao khan?
– Yua kơ kiơ Kră Yang wă kơ lu bơ̆n krao khan ling lang, huay kơ bơ̆l hăl”
Kiơ̆ kơ jơhngơ̆m đon tơchĕng kơ minh ‘nu bơngai krao khan đĭ jơhngơ̆m hăm Kră Yang wă kơ Kră Yang tơl tơwih hrĕnh tĕnh lăm tơdrong kăl wă, tơ’bơ̆p tơdrong anat Kră Yang kư̆m wă kơ thoi noh păng hloh kơ ‘noh dơ̆ng (trong 7-8)! Hăm lu bơngai lui kơ Kră Yang, tơdrong krao khan nhen thoi hmă đĕch thoi bơ̆n dui jơhngơ̆m. Mălei wă kơ đei jơhngơ̆m pran liĕm akâu ‘lơ̆ng, phŏ phŏ đei năr bơ̆n dai hơdrin đĭ jơhngơ̆m, hơdrin wă kơ dui jơhngơ̆m pơm kơ kơsoh bơ̆n wơ̆ tôch ai. Noh bơih tơdrong Kră Yang bơtho, “athei krao khan ling lang, huay kơ bơ̆l hăl”. wă kơ akâu jăn ‘lơ̆ng hơbŏ, lu bơngai tih pran ưh kơsĭ pơ tơ̆p păng sŏng sa tôm mah lăm minh ‘bar năr đĕch, mălei sư adrin lăm dôm khei. Wă kơ jing bơngai krao khan pơnam, lu bơ̆n athei adrin tơ’bưh hăm Kră Yang.
Wă pơlung lu bơ̆n adrin krao khan, Kră Yang Yêsu đei pơma pơtih gia ăn kơ lu bơ̆n gah tơdrong yua kơ kiơ Kră Yang wă kơ bơ̆n krao khan ling lang hăm Sư. Đei minh ‘nu sek tơlang ưh kơ chu yom Kră Yang păng ưh kơ hli kơ đe, mălei tuch luch sư oei tơdŏng yă adro noh đĕch yua kơ yă adro noh apinh ‘bơ’bel. Kră Yang yua tơdrong phara băl minh ‘nu ‘bok sek tơlang ưh kơ hiơ̆k bơngơ̆t kơ đe păng hăm ‘Bok Kei-Dei Yang mă ling lang hiơ̆k bơngơ̆t kơ lu bơngai mă Sư rơih iŏk, wă tơgŭm hơmet tơdrong hơmĕng lu bơ̆n đei nơ̆r tơl trŏ, trŏ kơ jơ gơh tam hloi. Nơ̆r apinh ‘bơ’bel đơ̆ng yă adro ei pơm kơ ‘bok sek tơlang jah tơdŏng sư hloi, na pơma kiơ kơ ‘Bok Kei-Dei mă ‘mêm kơ bơ̆n tơpă, wei lăng bơ̆n, na Sư gơh achăng bơngai mă Sư rơih iŏk mơ̆n hă? Thoi yơ ‘Bok Kei-Dei achăng lê̆ lu bơngai mă oei krao khan măng năr” (trong 7)?
Krao khan huay kơ bơ̆l hăl gô tơgŭm lu bơ̆n wơ̆ ‘lŏ lăm đon lui ding truh kơ bơ̆n wơ̆ tơ̆l wă tơ’bơ̆p hăm ŭnh tŏ tơpơh wơ̆t, dah nhen thoi bơ̆n tơ’bơ̆p dăm brang sư pơngot đĭ đunh năr bơih thoi Đaniel păng pêng ‘nu bôl sư! ‘Bok Abraham bơih pơm kơmĭl lăm tơdrong adrin krao khan bơ̆n kăl kơ pơhrăm iŏk, sư chang gô nơ̆r Kră Yang pơkă ding truh 25 sơnăm păng sư krao apinh Kră Yang ‘Bok Kei-Dei wă kơ krao khan tơdrâu wơ̆t kơ pơlei Sôđôm ding truh Kră Yang tơl tơwih! (Blŭng a 18:17-32). Mălei ‘bok Pôl sư krao khan pêng măng apinh Kră Yang “pơklaih sư đơ̆ng tơdrong noh” (II Kôrintô 12:7-10) na sư pơm kơ bơ̆n ‘bôh hlĭch dêh yua kơ ưh pă đei krao khan tơdrong noh bơih! Mălei ưh kơsĭ yua kơ sư bơ̆l hăl ôh, mălei sư pơdơh kơ krao khan yua kơ ‘Bok Kei-Dei tơl nơ̆r sư apinh bơih.
Đơ̆ng Kră Yang Yêsu bơtho tơ’bôh kơ lu bơ̆n Sư wă kơ lu bơ̆n adrin ding truh năr tuch luch na Sư oei ‘bôh đon lui lu bơ̆n oei adrin kơjăp tơ ala teh âu. Wă kơ gơh thoi ei, rim ‘nu lu bơ̆n athei adrin krao khan ling lang huay kơ bơ̆l hăl.
Ơ Kră Yang ‘lơ̆ng rơgoh, inh băt kơ Ih wă kơ inh krao khan ling lang, păng lui gơnang kơ Ih. Apinh Ih tơgŭm đon lui inh pran wă kơ inh krao khan hăm Ih păng chang gô Ih tơl nơ̆r inh krao khan, yua anăn Kră Yang Yêsu Krist, Amen!
Lu bơ̆n gô krao khan hăm ‘Bă bơ̆n tơ plĕnh ti ding dang yơ?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 1
Kênh Youtube BHKTHN:
