Klei Aê Diê Blŭ: Y‑Yôhan 11:40-44; Y‑Markôs 14:35-36
Êlan kliăng: “Leh anăn Ñu lač, ‘Aba, Ơ Ama ơi, jih jang mnơ̆ng Ih dưi ngă sơăi. Mă mđuĕ hĕ atŏ anei mơ̆ng Kâo. Amâo djŏ tui si klei Kâo čiăng ôh, ƀiădah tui si klei Ih pô čiăng.’ ” (Y‑Markôs 14:36)
Klei êmuh ksiêm mĭn: Si Khua Yang Yêsu wah lač êlâo kơ iêô Y‑Lasar kbiă lŏ hdĭp? Si Khua Yang wah lač leh hlăm war djam Gêtsêmanê? Ya klei drei hriăm mơ̆ng jar bi hmô wah lač mơ̆ng Khua Yang Yêsu?
Klei hdĭp Khua Yang Yêsu jing klei hdĭp wah lač. Leh anăn jar bi hmô wah lač Khua Yang jing rup bi hmô brei grăp čô đăo kơ Krist tui ngă. Ktuê jih thŭn mlan jing mnuih ngă bruă ti lăn ala, Khua Yang Yêsu wah lač nanao čiăng tui duah klei Aê Diê Ama čiăng leh anăn ktrâo atăt êlâo kơ jih jang bruă Ñu ngă, hlăm jih jang klei truh Khua Yang tlă anăp.
Hlăm klei yăl dliê Khua Yang iêô Y‑Lasar kbiă lŏ hdĭp, Ñu lač klă Ama hmư̆ nanao klei Ñu wah lač. Klei kñăm Khua Yang bi êdah klei anăn kyuadah Ñu čiăng kơ phung mâo ƀô̆ mta tinăn đăo kơ Ama jing Pô tiŏ hriê Anak ti lăn ala: “Snăn diñu bi klŭng hĕ boh tâo anăn. Yêsu angưi ală leh anăn lač, “Ơ Ama, Kâo bi mni kơ Ih kyuadah Ih hmư̆ leh Kâo. Kâo thâo leh kơ Ih hmư̆ Kâo nanao, ƀiădah Kâo lač klei anei kyua phung mnuih dôk giăm, čiăng kơ diñu dưi đăo kơ Ih Pô tiŏ hriê Kâo leh.”” (Y‑Yôhan 11:41-42). Leh anăn Aê Diê Ama hmư̆ klei Khua Yang wah lač tơdah Ñu ur hŏng asăp kraih ktang, Ơ Y‑Lasar, kbiă bĕ mơ̆ng msat, mnuih djiê kbiă yơh, jơ̆ng kngan gơ̆ arăng păn leh hŏng čhiăm, wăt tơdah arăng dơr gơ̆ pă hruê leh (Y‑Yôhan 11:17).
Hlăm war djam Gêtsêmasê, Khua Yang Yêsu wah lač leh hŏng knuih luă gŭ, kwưh akâo jih ai tiê leh anăn đup gưt. Khua Yang thâo êlâo klei ruă knap tơl hnơ̆ng dơ̆ng truh, Ñu akâo kơ Ama “mă mđuĕ hĕ atŏ anei mơ̆ng kâo”, ƀiădah amâo djŏ tui si klei Anak čiăng ôh, ƀiădah tui si klei Ama pô čiăng. Sa klei wah lač brei ƀuh Khua Yang hmiêt mkăp khut khat đup gưt, wăt tơdah klei anăn amâo djŏ msĕ si ai tiê hmăng hmưi ôh. Anei jing jar bi hmô wah lač brei drei tui hriăm grăp blư̆ akâo kơ Khua Yang ya mta klei.
Phung čih hră Klei Mrâo Mrang Jăk brei ƀuh leh Khua Yang Yêsu wah lač jêñ jêñ ktuê jih hruê Ñu mă bruă ti lăn ala. Ñu bi mguôp sĭt suôr hŏng Aê Diê Ama hlăm klei khăp, klei đup gưt, êlâo kơ mnĭt mmông čuăn ai tiê ngă leh anăn hlăm jih jang bruă yuôm, boh nik nak hlăm mnĭt mmông knhal tuč ti kyâo bi kal: “Ơ Ama, Kâo jao mngăt Kâo hlăm kngan Ih!” (Y‑Luk 23:46). Ñu brei leh sa klei bi hmô dôk gĭr leh anăn sĭt suôr wah lač hŏng Pô Ñu kwưh akâo.
Jar bi hmô wah lač Khua Yang Yêsu jing sa rup bi hmô brei grăp čô drei tui ngă. Phung anak ƀuôn sang Aê Diê hruê anei dưi mâo klei pap bi mguôp klă anăp hŏng Ama hlăm adiê ƀiădah amâo lŏ guôn mâo pô ti krah ôh. Tơdah nao kơ Khua Yang hlăm klei wah lač, bi mguôp, brei drei hriăm tui jar bi hmô wah lač mơ̆ng Khua Yang Yêsu, luă gŭ thâo kral klei awăt pô, leh anăn tui duah klei thiăm klei ktang, klei đru mơ̆ng Aê Diê, Pô drei dôk kwưh akâo.
Si ngă drei wah lač tui si jar bi hmô Khua Yang Yêsu mtô?
Wah lač: Ơ Ama hmei dôk hlăm adiê, bi mni lač jăk kơ Ama brei leh kơ kâo mâo klei dưi nao kơ Ama klă anăp. Akâo Khua Yang brei kâo tui hlue jar bi hmô wah lač mơ̆ng Khua Yang Yêsu, čiăng thâo khăp huĭ mpŭ, luă gŭ, đup gưt Khua Yang kluôm dhuôm, đăo kjăp Khua Yang hmư̆ wĭt lač nanao leh anăn brei kơ phung anak Ih klei jăk hĭn tui si klei Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
