Klei Aê Diê Blŭ: Y‑Tit 2:9‑10
Êlan kliăng: “Mtă kơ phung hlŭn đup gưt kơ khua diñu, bi mơak kơ phung khua hlăm djăp mta klei,…” (Y‑Tit 2:9a)
Klei êmuh ksiêm mĭn: Si Khua ƀĭng kna Y‑Pôl lač kơ Y‑Tit mtă kơ phung hlŭn hdĭp leh anăn brei ñĕ kơ ya klei? Si boh tŭ knuih hdĭp anăn? Si drei yua klei hriăm anei kơ pô?
Boh blŭ “hlŭn” tinei lač kơ phung hlŭn ênuk Rôm kiă kriê, pô khua mâo klei dưi jih hnơ̆ng hŏng phung hlŭn, jing phung mă bruă kơ pô. Khua ƀĭng kna Y‑Pôl mtô Y‑Tit brei mâo klei mtô “mtô mta klei đăo djŏ sĭt” (Y‑Tit 2:1) čiăng kơ phung hlŭn jing phung đăo mâo knuih hdĭp “dưi bi guh kơang mta klei đăo kơ Aê Diê, Pô Bi Mtlaih drei” (êlan 10).
Phung hlŭn ênuk êlâo lu jing phung tŭ klei phung khua ktư̆ juă, ngă jhat hŏng lu hdră. Hrô kơ lŏ bi kdơ̆ng, brei diñu bi êdah knuih hdĭp phung đăo hŏng khua. Brei diñu ngă tlâo mta klei. Tal sa, brei đup gưt. “Phung hlŭn đup gưt kơ khua diñu”, jing phung gưt asăp, hlue ngă wăt tơdah si ngă khua ngă kơ pô ăt brei bi êdah knuih phung đăo jing đup gưt. Tal dua, brei diñu ăt “bi mơak kơ phung khua hlăm djăp mta klei”. Phung hlŭn brei jih ai tiê bi leh bruă khua jao čiăng kơ khua mơak. Tal tlâo, brei sĭt suôr. “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23).
Êngao anăn, phung hlŭn ăt hmư̆ klei mtô brei ñĕ kơ dua mta. Tal sa, “amâo blŭ bi kdơ̆ng ôh”. Hlăm ênuk anăn phung hlŭn dưi dlăng jing mnơ̆ng jing dŏ khua. Dôk ti anăp sa čô khua kpĭ đei, ngă jhat ênưih ngă kơ phung hlŭn čiăng lŏ bi kdơ̆ng hĭn kơ đut gưt. Hlŭn jing phung đăo brei bi êdah knuih gưt asăp, amâo mâo lŏ bi kdơ̆ng ôh kyua klei anăn amâo ba klei tŭ dưn ôh. Tal dua, “amâo tlĕ ôh”. Đa đa phung hlŭn ngă bruă kriê dlăng kơ khua. Lu mnuih ênưih mâo klei khăp kơ ngăn drăp hĭn kơ ai tiê sĭt suôr răng kriê kơ khua. Ƀiădah tơdah sa čô mnuih đăo tlĕ, wăt tơdah hŏng ya mta phŭn dưn snăn klei anăn amâo bi mơak kơ Aê Diê ôh kyua ngă soh hŏng klei bhiăn “Đăm tlĕ dŏ dô arăng ôh” (Klei Kbiă 20:15).
Boh tŭ tơdah phung hlŭn hdĭp djŏ hlue si klei mtô mơ̆ng “klei đăo djŏ sĭt” jing klei đăo Aê Diê mâo klei mpŭ, guh kơang hlăm djăp boh klei, phung khua srăng ƀuh klei mdê hlăm klei hdĭp phung hlŭn jing phung đăo. Kơ kdrêč phung hlŭn srăng amâo hơăi mang ôh tơdah hdĭp djŏ tui si Klei Aê Diê Blŭ mtô kyua Aê Diê jing Pô srăng brei klei mưn kơ diñu (Hêbrơ 11:6).
Klei hriăm anei ăt djŏ kơ grăp čô drei hruê anei, kyua jih jang phung đăo mâo leh êrah Khua Yang bi tui čiăng drei tlaih mơ̆ng klei jing hlŭn kơ yang jhat jing dĭng buăl Aê Diê. Akâo kơ Khua Yang đru drei hdĭp đup gưt kơ Ñu, sĭr suôr hŏng Ñu čiăng kơ Anăn Khua Yang leh anăn klei đăo kơ Khua Yang mâo klei mpŭ mni leh anăn mâo lu mnuih thâo.
Drei dôk hdĭp djŏ hŏng bruă jing phung dĭng buăl kơ Aê Diê mơ̆?
Wah lač: Ơ Khua Yang, bi mni kơ Ih bi tui leh kâo čiăng kâo jing dĭng buăl Ih. Ƀuăn jih klei hdĭp kâo hdĭp čiăng kơ klei đăo kơ Aê Diê mâo klei mpŭ hlăm djăp êlan, leh anăn mơ̆ng kâo mâo lu mnuih thâo leh anăn đăo kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
