Titus 2:9-10
Nqe cim.
“Koj qhia cov tubqhe kom lawv nyias mloog nyias tus tswv lus…” (Titus 2:9a)
Lus nug rau sawvdaws xav.
– Timthawj Paulus qhia Titus ntuas cov tubqhe yuav tsum ua lubneej licas thiab tsis txhob ua tej yam twg?
– Koob hmoov thaum ua neej zoo li ntawd yog dabtsi?
– Peb siv yoom zaj no licas?
Lo lus “tubqhe” ntawm no yog hais txog cov raug ua qhev nyob tiam cov neeg Loos kav, tus tswv muaj hwjchim tswjkav tagnrho cov qhev, lawv yog nws cov tub txib tub txuas xwb. Timthawj Paulus qhia Titus yuav tsum “qhia raws li tej zaj tseemceeb uas yog txojkev ntseeg” (Titus 2:1) kom cov tubqhe ntseeg thiaj muaj lubneej ua rau “sawvdaws yuav saib taus Vajtswv tus uas yog peb tus Cawmseej tej lus qhia” (nqe 10).
Cov tubqhe tiam thaum ub feem ntau raug cov tswv quabyuam, caij tsuj. Tsis txhob ua pauj los ntawm kev tawmtsam, tiamsis lawv yuav tsum ua neej qhia tshwm kev ntseeg rau lawv tus tswv pom. Cov qhev ntseeg Tswv Yexus yuav tsum ua peb yam. Thib ib, mloog tus tswv lus. Cov tubqhe yuav tsum “nyias mloog nyias tus tswv lus”, muaj lub ntsiab hais tias ua raws, hwm, txawm tus tswv yuav ua licas los yuav tsum ua li tus ntseeg tus cwjpwm uas yog mloog lus. Thib ob, lawv kuj yuav tsum “ua txhua yam kom haum tus tswv siab tsis txhob cav ncauj”. Tubqhe yuav tsum ua tej haujlwm tus tswv muab cob kawg siab kawg ntsws kom tus tswv txaus siab. Thib peb, ncaj ncees rau tus tswv. Cov tubqhe yuav tsum “ua lawv lub neej rau sawvdaws pom hais tias lawv yog cov tubqhe uas ncaj ncees”. Tus tubqhe yuav tsum ua tiav nws tes haujlwm zoo li Vajtswv Txojlus qhia hais tias: “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg” (Kaulauxais 3:23).
Tsis tas li ntawd xwb, cov tubqhe yuav tsum qaij tsis txhob ua ob yam. Thib ib, “tsis txhob cav ncauj”. Nyob tiam ntawd, tubqhe raug saib zoo li lawv tus tswv ib yam khoom xwb. Yog muaj ib tug tswv coj nruj, ua limhiam, yoojyim ua rau tus qhev raug dagntxias rau kev cav ncauj heev dua mloog lus. Cov qhev ntseeg Tswv Yexus yuav tsum qhia tshwm tus cwjpwm mloog lus, txhob cav ncauj, vim ua li ntawd tsis muaj qabhau. Thib ob, “tsis txhob qee tus tswv tug”. Muaj ib txhia qhev tau cob ua tes haujlwm saibxyuas tus tswv lub cuab txheej cuab tam. Muaj coob leej ntshaw tus tswv tug heev dua qhov uas ncaj ncees saibxyuas rau tus tswv. Tiamsis thaum ib tug ntseeg ua tubsab, txawm ua los ntawm lub vimchiv twg los qhov ntawd kuj tsis haum tus Tswv siab vim ua txhaum nqe kevcai: “Tsis txhob ua tub sab” (Khiavdim 20:15).
Koob hmoov thaum cov qhev ua lubneej raws li “txojkev ntseeg” yog Vajtswv yuav tau koob meej, cov tswv yuav pom kev coj txawv ntawm cov qhev ntseeg Tswv Yexus. Tshuav cov ua qhev yuav tsis raug poob ib yam dabtsi thaum ua neej raws nraim li Vajtswv Txojlus qhia vim Vajtswv yog tus yuav muab nqi zog pub rau lawv (Henplais 11:6).
Zaj kawm hnub no kuj siv rau peb tiam no thiab, vim txhua tus ntseeg puavleej tau tus Tswv cov ntshav tsim txiaj muas los, pub rau peb txij li ua qhev rau dab ntxwsnyoog tau los ua qhev rau Vajtswv. Thov tus Tswv pub rau peb ua neej mloog tus Tswv lus, muab siab npuab tus Tswv, kom tus Tswv tau koobmeej thiab Txojmoo Zoo nrhov ncha mus rau coob leej tau hnov.
Thov Vajtswv,
Tus Tswv, thov ua Koj tsaug vim Koj cawm nyuam yaus los ua koj tus tubtxib. Thov kom nyuam yaus lubneej ua rau Koj tau koobmeej thiab coj tau coob leej los txais yuav Koj ua lawv tus Tswv. Nyuam yaus tuav Yexus Khetos lub npe thov, Amees.
Peb puas tabtom ua neej tsimnyog lub meejmom ua tus Tswv haujlwm lawm tau?
Nyeem Vajluskub hauv peb lub xyoos: Lukas 24
Kênh Youtube BHKTHN:
