Markôs 6:34-44
“Na Yêsu khan kơ lu sư: Iĕm đei hơdôm tŏ ‘bĕng mi? Iĕm năm lăng. Lu sư lăng ‘bôh boih, na lu sư khan: Lăp pơđăm tŏ ‘bĕng mi păng ‘bar hlak ka.” (Markôs 6:38)
Nơ̆r jet tơchĕng pơwao:
– Kră Yang Yêsu pơm ăn tơmam sŏng sa kơ lu kon pơlei hăm tơdrong kiơ?
– Đơ̆ng lăm tơdrong đei roi ‘nâu tơ ‘blŏk ăn kơ bơ̆n kơ dih đei tơgŭm tơdrong kiơ lăm tơdrong klah song tơdrong ‘mêm Kră Yang ăn kơ bơngai nai?
– Lu bơ̆n đei kơ nhăm tơdrong kiơ lăm sơnăm ‘nao âu?
Dơ̆ng ƀơ̆t lăm tơdrong hơnat yua kơ đei loi kơ pơđăm rơbâu kiơ̆ Kră Yang, lu sư đei mơ̆ng Kră Yang bơtho ding truh tơ gơsơ̆ tơ anih chơ ngue, ưh kơ đei tơmam sa kiơ. Mălei Kră Yang đei khan kơ lu bơngai pơhrăm păng Sư thoi âu: “trŏ kơ lu iĕm athei đei tơmam sa kơ lu sư”, kơplah lu bơngai pơhrăm păng sư ưh kơ ‘băt wă ăn kơ kon pơlei sa kiơ na Kră Yang apinh lu bơngai pơhrăm păng Sư thoi âu: “Lu iĕm đei dôm tŏ ‘bĕng? năm lăng lăng.” Lu sư chu mơ̆ng nơ̆r Kră Yang na lăng hơlen na lu sư đei tơl Kră Yang lu sư đei đăm tŏ ‘bĕng păng ‘bar hlak ka. Kră Yang Yêsu iŏk đăm tŏ ‘bĕng păng ‘bar hlak ka păng pơm tơdrong mơsêh ăn kơ lu kon pơlei sa phĭ mah păng đei rơkah truh tơ mơjĭt ‘bar bai. Lăp đăm tŏ ‘bĕng păng ‘bar hlak ka ră mă lei đei pơyơ̆r ăn kơ Kră Yang, na đơ̆ng noh lăm tơpang ti Kră Yang đơ̆ng tơmam sa tŏ sĕt sot ‘noh jing tơmam sa mah rơkah rơkai kơ pơđăm rơbâu ‘nu bơngai sa.
Sơnăm âu đei lơ tơdrong truh lơ anih lăm dêh char bơ̆n, lơ bơngai đơ̆ng rŏng kơ kial hơbŭt păng đak lơ̆p ưh pă đei tôm mah kơ tơmam sa, băn ao hrŭk, mă lei bơngai lui mơnah khan inh ưh kơ đei kiơ wă tơgŭm ăn kơ lu bơngai ‘nhŏng oh bơ̆n mă đei tơdrong anat pat thoi noh. ‘Bai pơhrăm năr âu wă kơ lu bơ̆n đei pơwao hơdai lăm khei wă đĭ sơnăm âu, lu bơ̆n athei lăng lăng bơ̆n hăm đei tơgŭm kơ khŭl bơngai lui kơ Kră Yang wă ba ăn kơ lu bơngai oei lăm tơdrong hơnat pơmat. Pơđăm tŏ ‘bĕng păng ‘bar hlak ka tơdah ưh kơ đei pơyơ̆r ăn kơ Kră Yang lei jê̆ lăp ăn kơ minh ‘nu dah ‘bar ‘nu sa đĕch. Tơdah lu bơ̆n wei răk ăn kơ bơ̆n kơ dih đĕch lei jê̆ lu kon pơlei ưh kơ đei sa păng ưh kơ đei thim ăn rơkah ôh. Mă lei kơ plah đei pơyơ̆r kơ Kră Yang, ưh kơ trŏ hơdrô̆ kon pơlei sa đĕch na kŭm dai đei rơkah lơ hloi mơ̆n. Lăm kơthơ Êphêsô 2:10, ‘Bok Pôl đei roi tơbăt ăn kơ bơ̆n lu bơ̆n âu jơ̆ tơmam đơ̆ng ‘Bok Kei-Dei pơjing lăm Kră Yang Yêsu Krist wă kơnhăm kơ bơ̆n pơm tơdrong ‘lơ̆ng, păng đĭ jơhngơ̆m tơpă wă tơgŭm bơngai nai. Lu bơ̆n athei đĭ jơhngơ̆m pơyơ̆r kơ Kră Yang dôm tơdrong bơ̆n đei, na Kră Yang gô yua păng pơm ăn tơdrong tih kơ lăm tơdrong jang Sư.
Lăm năr wă đĭ sơnăm, rim ‘nu bơ̆n, rim hnam dơnŏ kăl kơ lăng hơlen lăm sơnăm hlôi bơih lu bơ̆n đei tơgŭm tơdrong kiơ bơih? Athei mơ̆ng Nơ̆r Kră Yang khan, “Lu iĕm đei dôm tŏ ‘Bĕng”? Kră Yang ưh kơ apinh lu bơ̆n ăn hloh kơ dôm tơdrong bơ̆n đei mălei Kră Yang wă kơ bơ̆n ăn dôm tơdrong mă bơ̆n đei noh, athei chu nơ̆r Kră Yang “năm lăng lăng” dang ei hloi na pơyơ̆r kơ Kră Yang lăm sơnăm nao âu.
Lu bơ̆n đei pơkă tơdrong kiơ hăm Kră Yang lăm tơdrong klah song băl tơdrong ‘mêm lăm tuch luch sơnăm âu?
Ơ Kră Yang, apinh ih ăn kơ inh đĭ jơhgơ̆m pơyơ̆r kơ Ih dôm tơdrong inh đei hăm bơngai lui kơ Ih na tơgŭm bơngai nai. Apinh Ih thim ăn kơ inh jơhngơ̆m pran ‘nao păng hiôm hơiă yua inh lăm sơnăm ‘nao âu. Yua a-năn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 23
Kênh Youtube BHKTHN:
