Pajlug 22:26-27
Nqe cim:
“Tsis txhob coglus them lwm tus tej nuj nqi.” (Pajlug 22:26).
Peb saib ntxiv hauv Phau Txhais Tshiab,
“Koj tsis txhob ua tus uas qhwv luag thiab nrog luag coglus ris luag nuj luag nqi.” (Pajlug 22:26 HMOWSV).
Lus nug rau sawvdaws xav:
– Coglus them nuj nqi txhais tau li cas?
– Qhov uas coglus them lwm tus nuj nqi yuav tau nqi zog li cas?
– Peb cheemtsum ua dabtsi kom tsis txhob poob mus rau qhov kev raug ua tus them nuj nqi?
Coglus them lwm tus nuj nqis yog yam uas tseemceeb hauv kev tuav nyiaj txiag. Vajntxwv Xalumoos qhia ntau zaus rau nws cov menyuam txog qhov uas coglus them lwm tus nuj nqi (Pajlug 6:1-5; 11:15; 17:18; 20:16) kom ua rau cov menyuam muaj kev paub thiab txiav txim siab ua tej uas tsimnyog. Sob lus “tus uas qhwv luag” lossis “nrog luag coglus” yog xav hais txog kev coglus lossis ua tabpov. Thaum ib tug neeg twg sawv los ua tus tabpov coglus them lwm tus nuj nqi, tus neeg ntawd yuav tsum muaj feem xyuam nyob hauv daim ntawv qiv txais nyiaj. Hais ua lwm seem lus, lawv twb yog ib tug uas tshuav luag nqi thiab.
Nqi zog ntawm qhov uas coglus them lwm tus nuj nqi yog tus neeg qiv nyiaj tsis them rov, tus neeg coglus them lwm tus nuj nqis yuav tsum tau sawv los them hloov chaw, yog tsis them ces “lub txaj pw” luag kuj yuav tuaj nqa mus. Txawm yog tus uas coglus them lwm tus nuj nqis muaj txaus peevxwm nyiaj txiag them los qee zaus vim poob kev ua haujlwm, txomnyem nyiaj txiag ua rau nws them tsis tau cov nqi uas nws twb tau coglus nrog them thiab. Lo lus “lub txaj” txhais hais tias yog yam khoom muaj nqis kawg nkaus ntawm ib tug neeg. Thaum lawv raug cov neeg txais nyiaj tuaj nqa “lub txaj pw” mus, ces txhais hais tias nws yuav tau pw hauv plag tsev; qhia tau tias nws lub cuabyig puas tas. Thaum tuav nyiaj txiag tsis zoo, ces yus kuj pab tsis tau yus tus kheej lawm, yuav ua li cas kom mus pab tau niamtxiv, pojniam menyuam lossis lwm tus, tus Tswv haivneeg yuav tsum yog cov neeg uas ua tib zoo saib qhov uas coglus them lwm tus nuj nqis.
Vajntxwv Xalumoos hais mus hais los txog qhov uas txaus ntshai ntawm tes haujlwm coglus them lwm tus nuj nqi, vim Xalumoos paub cov hluas yoojyim yuam kev rau kev tuav nyiaj txiag. Nimno muaj ntau txojkev qiv nyiaj txiag. Cov hluas muab tej ntawv tso nyiaj, ua haujlwm, lossis khoom ntawm niamtxiv coj mus txais nyiaj lossis coglus them tej phoojywg cov nuj nqis. Ntau leej tseem yaum tej phoojywg mus mloog cov neeg phem tej lus dag, dhau mus ua neeg tshuav nuj nqis ntau hauv tej chaw twv txiaj lossis txais nyiaj yuav paj lim siab, thaum kawg tshuav tsheej tog nuj nqis them tsis taus. Qhov uas txaus ntshai dua thiab, yog ntau leej ntxab ntxawm coj cov kwvtij ntseeg hauv Pawg Ntseeg txojkev hlub mus dag nyiaj txiag, ntxias cov hluas, cov pojniam siab yau mus txais nyiaj rau lawv. Timthawj Paulus qhia rau tus Tswv cov menyuam hauv Loos 13:8-10 hais tias, tsis txhob tshuav lwm tus nqi, thov kom ib leeg tshuav ib leeg nqi kev hlub xwb, thiab Paulus kuj hais ntxiv tias;“hlub koj tej kwvtij zej zog ib yam li koj hlub koj lub cev.” Thaum peb paub hlub peb tus kheej yog ces peb kuj paub hlub lwm tus yog thiab ua rau Vajtswv tau ntsejmuag. Tsis txhob cia qhov kev tshuav nqi khi peb, thiab kuj yuav tsum ua tib zoo saib qhov uas nrog lwm tus txais nyiaj txiag.
Thov Vajtswv,
Vajtswv, Koj yog tus uas muaj kev hlub thiab kuj yog tus uas ncaj ncees, txawj ntse. Thov Koj pub kom nyuam yaus muaj tswvyim rau tes haujlwm tuav nyiaj txiag thiab ua rau Koj tau ntsejmuag. Nyuam yaus tuav Tswv Yexus lub npe thov, Amees.
Peb cheemtsum ua qhov twg kom peb muaj tswvyim, kev hlub rau tes haujlwm coglus them lwm tus nuj nqis?
Nyeem Vajluskub hauv peb lub xyoo: I Xamuyees 29
Kênh Youtube BHKTHN:
