Klei Aê Diê Blŭ: Klei Bi Hriêng 22:26-27
Êlan Kliăng: “Đăm jing ôh phung ƀuăn ngă klei bi mguôp amâodah đăm jing pô rơ̆ng kơ nư arăng ôh” (Klei Bi Hriêng 22:26)
Klei êmuh ksiêm mĭn: Ya jing rơ̆ng kơ nư arăng? Si boh jhat srăng mâo mơ̆ng bruă rơ̆ng kơ nư arăng? Si drei ngă čiăng amâo lĕ hlăm klei huĭ hyưt mơ̆ng bruă rơ̆ng kơ nư arăng?
Rơ̆ng kơ nư jing klei yuôm bhăn snăk hlăm bruă kriê dlăng ngăn prăk. Mtao Y‑Salômôn lu blư̆ mñă kơ anak ñu kơ klei rơ̆ng kơ nư (Klei Bi Hriêng 6:1-5; 11:15; 17:18; 20:16) kñăm đru kơ anak ñu mâo klei mĭn leh anăn klei bi mklă djŏ, thâo mĭn. Pruê̆ blŭ “phung ƀuăn ngă klei bi mguôp” amâodah “rơ̆ng kơ nư arăng” lač kơ bruă ƀuăn rơ̆ng amâodah rơ̆ng. Tơdah hlei pô rơ̆ng kơ nư arăng, brei pô anăn mâo bruă klam hlăm bruă hlue ngă klei kuôl kă lĭng čan. Lŏ lač jing, diñu jing leh msĕ si pô klam nư mơh.
Boh jhat mơ̆ng bruă klam nư jing tơdah pô čan nư amâo tla, pô rơ̆ng kơ nư srăng tla brei, tơdah amâo tla ôh nư snăn wăt “jhưng pĭt” ăt pô nư mă mơh čiăng tla nư. Wăt tơdah pô rơ̆ng kơ nư khăng mâo ngăn prăk tơdah rơ̆ng kơ nư, ƀiădah tăp năng kyua bruă mă toh hroh, ngăn prăk dleh dlan srăng ngă kơ pô anăn amâo dưi tla ôh nư ñu rơ̆ng leh. Boh blŭ “jhưng pĭt” bi hmô jing ngăn drăp yuôm hĭn knhal tuč kơ sa čô mnuih. Tơdah pô nư mă hĕ “jhưng pĭt”, jing ñu srăng đih ti tur sang, jing luč jih ngăn drăp. Tơdah bruă kriê dlăng ngăn prăk amâo tŭ jing snăn pô amâo lŏ dưi kriê dlăng ôh kơ pô, ka lač ôh kơ amĭ ama, mô̆ anak amâodah pô mkăn, kyua anăn phung ƀuôn sang Aê Diê brei jih ai tiê thâo răng hlăm bruă rơ̆ng kơ nư.
Mtao Y‑Salômôn lŏ mñă wĭt kơ klei huĭ hyưt hlăm bruă rơ̆ng kơ nư, kyua ñu thâo phung mda asei ênưih snăk soh hlăm bruă kriê dlăng ngăn prăk. Hruê anei, klei lĭng čan mnêč snăk leh anăn lu mta. Lu phung mda asei yua hră mă prăk yua êlâo, bruă mă, amâodah wăt ngăn drăp amĭ ama čiăng đuôm nư amâodah rơ̆ng nư kơ ƀĭng găp, pô khăp. Lu mnuih lŏ bi jak ƀĭng găp hmư̆ klei phung jhat mplư, lĕ hlăm nư blei hlăm bruă mnia blei prăk kăk amâodah brei čan mă mnga, leh anăn nư lŏ đuôm nư, amâo mâo êlan tlaih. Huĭ hyưt hĭn, lu mnuih mjhua klei khăp ayŏng amai adei hlăm Sang Aê Diê čiăng mplư ngăn prăk, lu blư̆ mplư wăt kơ phung mda asei, amâodah phung mniê ênưih mplư čan brei kơ diñu. Khua ƀĭng kna Y‑Pôl mñă kơ phung ƀuôn sang Aê Diê hlăm Rôm 13:8-10, đăm đuôn nư hlei pô ya mta klei ôh, êngao kơ nư klei khăp, leh anăn ñu ăt mñă wĭt “Brei diih khăp kơ phung riêng gah msĕ si khăp kơ diih pô”. Tơdah drei thâo khăp kơ pô snăn kơh thâo khăp kơ pô mkăn djŏ leh anăn bi guh kơang Anăn Aê Diê. Đăm brei ôh bruă đuôm nư kă hĕ drei, leh anăn brei bi mĭn bi nik hlăm bruă čan brei đru kơ pô mkăn.
Si klei hdĭp thâo mĭn, thâo khăp brei drei mâo hlăm bruă rơ̆ng kơ nư arăng?
Wah lač: Ơ Khua Yang, Pô khăp leh anăn ăt jing Pô kpă ênô, thâo mĭn. Akâo kơ Ih brei kơ kâo klei thâo mĭn hlăm bruă kriê dlăng ngăn prăk, boh nik hlăm bruă rơ̆ng kơ nư arăng čiăng mâo nanao klei hdĭp bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
