Klei Aê Diê Blŭ: Klei Bi Hriêng 22:24-25
Êlan kliăng: “Đăm ngă mah jiăng ôh hŏng mnuih krêñ, kăn nao rei mbĭt hŏng mnuih djăl ăl” (Klei Bi Hriêng 22:24).
Klei êmuh ksiêm mĭn: Ya klei Mtao Y‑Salômôn ghă anak leh anăn ya ngă brei anak ngă klei ghă anăn? Ya jing boh jhat kơ klei ngă mah jiăng hŏng mnuih jhat? Si ngă drei ngă čiăng thâo dôk dơ̆ng ƀơ̆ng huă hŏng klei răng tơdah bi tlă anăp hŏng mnuih krêñ leh anăn djăl ăl?
Mtao Y‑Salômôn kăm anak amâo dưi ngă mah jiăng hŏng mnuih jhat ôh, boh nik nak hŏng mnuih krêñ, mnuih djăl ăl čiăng weh đuĕ mơ̆ng klei srăng jing mnuih jhat msĕ si phung anăn. Pruê̆ blŭ “ngă mah jiăng” hlăm êlan 24 lŏ mblang jing “bi mguôp”, čiăng lač mâo klei bi hmăi kơ bruă klam hdơ̆ng mah jiăng. Mnuih krêñ leh anăn mnuih djăl ăl jing msĕ knuih diñu dua, diñu amâo dưi krơ̆ng ôh klei jing diñu, atăt truh kơ klei luč jih klei thâo mĭn, amâo lŏ thâo săng ôh kơ klei ư̆ ăn klei hlơr, atăt truh kơ klei amâo thâo blŭ klei jăk leh anăn ngă klei djŏ hnơ̆ng ôh. Êjai krêñ, kŏ dlô phung anei amâo lŏ mâo klei thâo săng ôh, amâo lŏ mĭn bi nik ôh kơ boh jhat mơ̆ng klei diñu blŭ leh anăn bruă diñu ngă.
Klei Mtao Y‑Salômôn ghă anak ñu khut khat čiăng kơ anak weh đuĕ leh anăn răng tơdah ngă mah jiăng hŏng mnuih krêñ leh anăn djăl ăl kyuadah anak yơh jing pô srăng mă tŭ boh jhat mơ̆ng klei ngă mah jiăng anăn. Klei đoh ktŭng mơ̆ng phung anak ngă mah jiăng anăn srăng atăt anak kơ klei jhat snăk hlăm klei hdĭp. Kyuadah phung jhat khăng mgô̆ anak tui hlue leh anăn ngă bruă soh msĕ si diñu. Khua ƀĭng kna Y‑Pôl lač, “Phung mah jiăng jhat bi rai knuih jăk” (I Kôrantô 15:33). Boh jhat kjham jing “mngăt ih djŏ kđông” (êlan 25). Hlô mnơ̆ng djŏ kđông amâo thâo êlâo ôh. Msĕ snăn mơh, tơdah ngă mah jiăng hŏng mnuih krêñ, mnuih djăl ăl, anak srăng tŭ klei bi hmăi kjham snăk êlâo kơ anak pô thâo săng klei anăn. Leh anăn huĭ hĭn mơh, tơdah anak djŏ kđông, dleh snăk anak tlaih mơ̆ng klei djiê.
Pô čih hră Y‑Yakơ mtă: “Ơ phung ayŏng adei kâo khăp, brei diih thâo klei anei: brei jih jang mnuih djăl hmư̆, amâo ruăt blŭ, amâo djăl ăl, kyuadah klei mnuih ăl amâo dưi bi truh ôh klei kpă ênô Aê Diê. Kyuanăn lui hĕ jih klei čhŏ mrŏ leh anăn jih klei măk ƀai, leh anăn brei diih mă tŭ hŏng ai tiê êdu êun klei blŭ pla leh hlăm diih. Klei blŭ anăn dưi bi mtlaih mngăt diih” (Y‑Yakơ 1:19-21). Akâo Khua Yang đru grăp čô drei thâo săng kơ boh yuôm hlăm klei krơ̆ng klei drei hlơr. Đăm ngă tui si klei thâo mĭn drei pô ôh, ƀiădah brei drei thâo bi luă gŭ drei pô leh anăn mă tŭ Klei Aê Diê Blŭ, ngă klei kpă ênô tui si klei Khua Yang mtă, bi wir mngăt drei kơ klei hdĭp hlŏng lar. Mâo Klei Aê Diê Blŭ mtrang mngač, drei thâo răng hlăm klei dôk dơ̆ng ƀơ̆ng huă amâodah ngă mah jiăng hŏng mnuih krêñ, mnuih djăl ăl čiăng kơ mngăt drei amâo srăng djŏ kđông ôh.
Drei weh đuĕ mơ̆ mơ̆ng mnuih krêñ leh anăn djăl ăl?
Wah lač: Ơ Khua Yang, kâo lač jăk kơ Ih brei leh Klei Ih Blŭ čiăng kơ klei hdĭp kâo mâo klei hơ̆k mơak, klei êđăp ênang. Đru kâo hŏng klei luă gŭ mă tŭ Klei Ih Blŭ čiăng kơ kâo thâo leh anăn weh đuĕ mơ̆ng êlan phung jhat. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
