Klei Aê Diê Blŭ: II Klei Yăl Dliê 29:12-19
Êlan kliăng: “Diñu bi kƀĭn phung ayŏng adei diñu leh anăn bi doh hĕ diñu pô, leh anăn mŭt hlăm sang yang tui si mtao mtă leh, tui si klei Yêhôwa blŭ, čiăng bi doh sang Yêhôwa” (II Klei Yăl Dliê 29:15)
Klei êmuh ksiêm mĭn: Leh hmư̆ Mtao Y‑Hêsêkia mtă snăn ya klei phung Lêwi ngă? Ya ngă digơ̆ gưt asăp kơ mtao? Ya mnơ̆ng čiăng drei mă hwiê hĕ mơ̆ng klei hdĭp drei?
Leh hmư̆ klei Mtao Y‑Hêsêkia mtă brei diñu bi doh hĕ diñu pô leh anăn bi doh sang Aê Diê, snăn phung Lêwi ngă mtam, ruah pluh pă čô kăp gai jih jang bruă. Phung gĭt gai anei ngă tui si klei mtao mtă, kdlưn hĭn kơ anăn jing ngă djŏ tui si klei Yêhôwa blŭ, diñu bi kƀĭn phung ayŏng adei diñu, êlâo hĭn diñu bi doh hĕ diñu pô hŏng klei bhiăn mnei hŏng êa. Leh anăn diñu dơ̆ng bi doh sang Aê Diê. Phung khua ngă yang mŭt ti lam sang Aê Diê čiăng bi doh gơ̆, kyuadah knŏng hjăn phung khua ngă yang yơh dưi mŭt hlăm lam. Bi phung Lêwi mă jih jang mnơ̆ng čhŏ ba tuh ti hnoh êa Sêdrôn, jing anôk arăng čuh rup yang (II Klei Yăl Dliê 15:16).
Sa păn hruê tal êlâo, diñu bi doh ƀrư̆ ƀrư̆ mơ̆ng êngao mŭt ti lam, ƀrư̆ hruê ƀrư̆ truh kơ anôk doh jăk hĭn. Digơ̆ bi doh mơ̆ng wăl truh kơ adring leh anăn hlăm lam sang Aê Diê. Klei bi doh sang Aê Diê ngă truh kơ pluh năm hruê brei ƀuh sang Aê Diê čhŏ snăk hlăm ênuk Mtao Y‑Ahas kiă kriê. Tơdah bruă bi doh ruĕ leh, diñu mŭt hlăm sang mtao čiăng hưn kơ mtao. Tal êlâo hĭn, diñu hưn mthâo diñu bi doh jih leh sang Aê Diê hlăm anăn mâo knưl čuh mnơ̆ng myơr čuh wăt jih jang mnơ̆ng yua kơ ñu, jhưng dưm kpŭng myơr kơ Aê Diê wăt jih jang mnơ̆ng yua kơ ñu. Tal dua, digơ̆ lŏ mkra, bi doh leh anăn dưm ti anăp knưl Aê Diê jih jang mnơ̆ng yua hlăm sang Aê Diê êlâo dih Mtao Y‑Ahas hwiê hĕ leh (II Klei Yăl Dliê 28:24).
Bruă Mtao Y‑Hêsêkia bi doh sang Aê Diê brei drei ksiêm mĭn, phung đăo ăt jing phung khua ngă yang kơ Khua Yang mơh (Klei Bi Êdah 5:9-10). Brei drei bi doh hĕ drei pô, mă hwiê hĕ mơ̆ng klei hdĭp drei jih jang mnơ̆ng čhŏ leh anăn rup yang lăn ala anei. Tơdah đăo kơ Khua Yang Yêsu, êrah Ñu bi doh leh jih jang klei soh leh anăn klei čhŏ mrŏ drei. Ƀiădah êdei tinăn hlăm klei hdĭp drei ăt lŏ ngă soh, kyuanăn, Khua ƀĭng kna Y‑Pôl mtă kơ drei “brei drei bi doh hĕ drei pô mơ̆ng jih jang klei čhŏ mrŏ” (II Kôrantô 7:1). Msĕ mơh ñu brei phung drei lui jih rup yang, klei phĭ, klei ăl, klei krêñ mbĭt hŏng jih jang klei ƀai hlăm klei hdĭp drei (Êphêsô 4:31). Mâo mnơ̆ng čhŏ dôk hlăm ai tiê leh anăn hlăm klei hdĭp drei sui hruê brei drei akâo kơ Khua Yang bi mtlaih brei. Đăm mâo pô mĭn ôh jih jang klei krêñ, klei phĭ hlăm ai tiê drei jing điêt dhiêt kyuanăn amâo guôn lui ôh, ƀiădah hŏng jih ai tiê brei drei mă hwiê hĕ jih klei anăn mơ̆ng klei hdĭp drei kyuadah anăn jing klei Khua Yang čiăng čih leh hlăm Klei Ñu Blŭ. Leh anăn yuôm hĭn mơh jing jih jang klei čhŏ mrŏ anăn bi hmăi kơ klei bi mguôp drei hŏng Khua Yang Yêsu, Pô djiê hrô leh kơ drei.
Mâo mơ̆ mnơ̆ng čhŏ hlăm klei hdĭp drei brei drei bi doh hĕ, leh anăn jih jang rup yang brei drei čuh hĕ?
Wah lač: Ơ Khua Yang, akâo Ih mtrang mngač čiăng kâo ƀuh jih jang klei čhŏ mrŏ dôk hlăm ai tiê leh anăn klei hdĭp kâo. Akâo Khua Yang pap brei leh anăn bi doh jih klei anei mơ̆ng klei hdĭp kâo čiăng kơ klei hdĭp kâo mâo boh tŭ dưn kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
