Rôma 10:4-12
Trong tơm: “’Noh wă khan dah ‘bơ̆r bơ̆n ră-roi kơ đe khan bơ̆n lui kơ Yêsu Krist Kră Yang bơ̆n, noh jơhngơ̆m đon bơ̆n lui kơ ‘Bok Kei-Dei tơiung arih Yêsu đơ̆ng lôch boih, dôm noh đĕch bơ̆n klaih boih đơ̆ng tơdrong yoch.” (Rôma 10:9)
Nơ̆r jet tơchĕng pơwao:
– ‘Bok Pôl đei pơting tơdrdong jô̆ ‘lơ̆ng tơpăt yua đơ̆ng khôi juăt păng jô̆ ‘lơ̆ng tơpăt yua đơ̆ng đei đon lui kơ Kră Yang Yêsu thoi yơ?
– Lu bơ̆n chơ chă ‘bôh tơdrong sĭt hơyơ đơ̆ng lăm ‘bai pơhrăm năr ‘nâu?
Lăm trong 5, ‘bok Pôk pơma kiơ̆ kơ lăm Lêwi 18:5 “Thoi noh lu iĕm athei wei răk Tơdrong Juăt Inh păng nơ̆r Inh tơtă, bu mă pơm kiơ̆ tơdrong noh, sư gô arih, Inh bơih Kră Yang”. Sư băt hơđăl nơ̆r Kră Yang lăm Pah so gơh pơma. Yua kơ adrol kơ noh ‘bok Pôl đei tơblang: “’Bok Krist bơih pơtôch kơ tơdrong juăt” (trong 4), thoi noh chih đơ̆ng lăm Bơtho khôi juăt 30:12-14 Sư chih tơplih kơ nơ̆r “Khôi juăt” jing “’Bok Krist” (trong 6-8). ‘Nâu bơih tơdrong jô̆ ‘lơ̆ng tơpăt yua đơ̆ng đon lui mă sư păng lu bôl buăl sư mă oei adrin năm chă bơtho.
Lăm tơdrong jô̆ ‘lơ̆ng tơpăt yua đơ̆ng đei đon lui lăm ‘Bok Krist, kon bơngai ưh kơ sĭ jang hloh kơ tơdrong bơ̆n gơh jang thoi kơ tŏk tơplĕnh chông ba ‘Bok Krist jur dah jur tơ sơlŭng jrŭ chông ba ‘Bok Krist tŏk đơ̆ng anih lôch (trong 6-8). Yua kơ ‘Bok Krist đơ̆ng kơpal plĕnh jur hăm lu bơ̆n păng đei iung arih bơih. Yua kơ tơdrong ‘mêm mơnat păng mơnat ăn đĕch, Kră Yang ‘Bok Kei-Dei đei pơchoh trong ăn kơ kon bơngai minh trong đĕch mă ‘bônh dêh mă bu bu kư̆m sơng iŏk tơdrong dŏng pơklaih. Tơdrong lui, Nơ̆r Kră Yang trong dŏng pơklaih tơ jê̆ hăm rim ‘nu lu bơ̆n, đei lăm ‘bơ̆r, lăm jơhngơ̆m lu bơ̆n. Trong sơng iŏk dŏng pơklaih âu lăp minh tơdrong yua đơ̆ng đei đon lui; lui gơnang lăm jơhngơ̆m păng ‘bơ̆r bơ̆n ră roi kơ đe. “’Noh wă khan dah ‘bơ̆r bơ̆n ră roi kơ đe khan bơ̆n lui kơ Yêsu Krist Kră Yang bơ̆n, noh jơhngơ̆m đon bơ̆n lui kơ ‘Bok Kei-Dei tơiung Yêsu Krist đơ̆ng lôch bơih, dôm noh đĕch bơ̆n klaih bơih đơ̆ng tơdrong yoch. Dah jơhngơ̆m đon bơ̆n lui thoi noh, ‘Bok Kei-Dei jô̆ bơ̆n bơngai ‘lơ̆ng hăm Sư. ‘Bơ̆r bơ̆n ră roi kơ đe thoi noh, Sư pơklaih bơ̆n đơ̆ng tơdrong yoch” (trong 9-10).
Đơ̆ng rŏng kơ kon bơngai pơm yoch, Kră Yang ‘Bok Kei-Dei lăp jô̆ ‘lơ̆ng tơpăt ăn kơ lu bơngai đei đon lui lăm ‘Bok Krist đĕch. Yua đei đon lui, ‘bok Abel pơyơ̆r kơ ‘Bok Kei-Dei tơmam soi ‘lơ̆ng hloh kơ ‘bok Kain, păng jô̆ sư ‘lơ̆ng tơpăt (Blŭng a 4:4; Hêbrơ 11:4). Kră Yang ăn kơ lu bơngai Isơrael khôi juăt pơm mă ‘blep trŏ wă pơjing tơdrong tơ’bưh băl ‘lơ̆ng hơiă hăm Kră Yang, tơduă, păng kăl hloh kơ ‘noh dơ̆ng, wă kơ lu sư kơdih ưh kơ kĕ pơm ‘lơ̆ng tôm tơdrong yua kơ ưh kơ đei bu wei răk ‘blep trŏ tôm tơdrong khôi juăt wă kơ ‘Bok Kei-Dei ‘lơ̆ng rơgoh tôch bơneh gơh jô̆ ‘lơ̆ng tơpăt. Kră Yang pơchoh trong dŏng pơklaih yua đơ̆ng tơmam soi. Yua kơ đei đon lui, rim sơnăm lu bơngai Isơrael bơwei pơm phĕt tih wă dŏng pơklaih. Triu kon blŭng a đơ̆ng ‘bok Abel, tơmam soi lăm năr Phĕt tih tơdrong dŏng pơklaih lu bơngai Isơrael noh tơm tơdrong wă pơtih kơ ‘Bok Krist, ‘Bok mă tuh pham wă dŏng pơklaih yoch kon bơngai.
Bơnê kơ Kră Yang, yua kơ Sơ̆p hla bơar ‘Bok Kei-Dei pơsĭt ăn kơ lu bơ̆n bơngai lui kơ Yêsu Krist păng jô̆ bơ̆n bơngai lui ưh kơdơ̆ mơlâu ‘bơ̆t anăp ‘Bok sek tơlang. Khan ưh kơ đei yoch! Năm bĕ tơ Kră Yang yua đơ̆ng đei đon lui.
Lu bơ̆n năm tơ Kră Yang yua đơ̆ng đei đon lui dah yua đơ̆ng tơdrong bơ̆n pơm ‘lơ̆ng?
Ơ Kră Yang! Inh bơnê kơ Ih yua kơ Ih jô̆ inh jing bơngai ‘lơ̆ng tơpăt yua đơ̆ng tơdrong mơnat ăn đĕch đơ̆ng Ih păng gơh klaih đơ̆ng Kră Yang Yêsu. Apinh Ih tơgŭm inh arih băt bơnê kơ Ih, ling-lang băt gơnang păng chu yom Ih. Yua anăn Kră Yang Yesu Krist, Amen.
Đŏk Sơ̆p hla bơar ‘Bok Kei-Dei lăm pêng sơnăm: I Samuel 11
Kênh Youtube BHKTHN:
