Yakaunpaus 1:19-21
Nqe cim:
“…Nej cia li ua raws li Vajtswv hais thiab khaws Vajtswv tej lus uas nws muab cog rau hauv nej lub siab lawm cia. Tej lus ntawd yuav pab tau kom nej dim nej lub txim.” (Yakaunpaus 1:21)
Lug nug rau sawvdaws xav:
– Tus ntseeg yuav tsum txais yuav Vajtswv Txojlus los ntawm tus cwjpwm zoo licas?
– Vajtswv Txojlus muaj qabhau licas hauv tus ntseeg lubneej?
– Yuav ua cas peb thiaj txais tau Vajtswv Txojlus txhua hnub?
Yakaunpaus ntuas cov ntseeg “yuav tsum kub siab lug mloog, tiamsis tsis txhob maj hais thiab tsis txhob chim sai” (nqe 19). Saib dhau plhawv cuag li ntawd yog ib txojcai nyob hauv kev sib txuas lus. Tiamsis nyob ntawm no Yakaunpaus tsis hais txog kev mloog zoo li pheej pom tiamsis hais txog kev mloog Vajtswv tej lus. Nws hais tias: “Nej cia li ua raws li Vajtswv hais thiab khaws Vajtswv tej lus uas nws muab cog rau hauv nej lub siab lawm cia. Tej lus ntawd yuav pab tau kom nej dim nej lub txim” (nqe 21). “Tej lus” uas hais txog ntawm no yog qhov tseeb, yog Vajtswv tej lus ntag.
Thaum txais yuav Vajtswv tej lus, Yakaunpaus hais tawm qee yam yuav tsum cim nco. Thib ib, yuav tsum “kub siab lug mloog”. Ntawd yog tus cwjpwm ntshaw rwg, npaj siab ntsoov thiab maj nroos mloog thaum muaj sijhawm. Thib ob, “txhob maj hais”, ntawd yog tsom ntsees mloog lub ntsiab ntawm tej lus yus hnov, tsis txhob tsuas xav txog tus kheej li kev xav thiab hais tamsid. Thib peb, yuav tsum “tsis txhob chim sai”, txhais tau hais tias yuav tsum hwm Vajtswv Txojlus txawm yog tej lus ntawd muaj tej yam uas yus tsis nyiam lossis tej lus ntawd chob yus tus kheej lub siab. Tsuas yog thaum tsis chim sai, cia Vajtswv Txojlus taw qhia tej kev txhaum, yam ua yuamkev, ces peb thiaj yuav muab tau “tej kev phem kev qias” uas peb “niaj hnub ua tso povtseg huv tibsi”, thiab thiaj yuav ua tau lubneej haum tus Tswv siab raws li Nws txojkev ncaj ncees. Ntawd yog tus cwjpwm “ua siab mos siab muag” (nqe 21 HMOWSV), txais yuav los ntawm kev qhib siab, cia Vajtswv Txojlus ywjpheej ua haujlwm.
Tseeb tiag Vajtswv twb muab Nws Txojlus “cog” rau hauv txhua tus ntseeg lub siab lawm, txhais tau hais tias peb twb txais yuav qhov tseeb thiab txais tau kev cawmdim thaum peb los ntseeg. Tsis tas li ntawd xwb, Vajtswv Txojlus tseem yog tej zaub mov sab ntsujplig ua rau peb lub neej sab ntsujplig yim hnub yim loj hlob, kom peb tau pauv hloov thiab zoo thooj tus Tswv txhua hnub. Vajtswv Txojlus “yog txoj uas qhia qhov tseeb, qhuab ntuas tus uas ua txhaum, pab tau tus uas ua yuam kev, thiab qhia kom sawvdaws paub ua lub neej ncaj ncees. Vajtswv Txojlus qhia li ntawd kom tus uas ua Vajtswv txoj haujlwm thiaj paub txhij thiab txawj ua txhua yam haujlwm zoo” (II Timautes 3:16-17). Thaum txais yuav Vajtswv Txojlus, peb yuav nyob ze Vajtswv, totaub Nws lub siabnyiam thiab ua lubneej haum Nws siab.
Vajtswv Txojlus yuav tsum tau txais yuav txhua hnub, tsis tu, tsis tseg. Peb txhua tus yuav tsum tseg ib lub sijhawm thiab ib qhov chaw, raws li tus kheej npaj tseg kom tau nyeem, kawm Vajtswv Txojlus. Tsis tas li ntawd xwb, kev nyeem tej ntaub ntawv txhawb siab, mus koom tej rooj kawm Vajluskub, lossis sibtham Vajluskub nrog pab pawg me,… kuj yog txojkev pab peb txais tau Vajtswv Txojlus. Qhov tseem ceeb yog yuav tsum muaj nplooj siab ntshaw kawm thiab txais yuav Vajtswv Txojlus nyob rau txhua lub sijhawm tus Tswv pub.
Thov Vajtswv,
Tus Tswv, thov qhia nyuam yaus paub ua tib zoo mloog thiab txais yuav Koj Txojlus los ntawm nplooj siab mos muag. Thov Koj Txojlus uas tau cog hauv nyuam yaus loj hlob, pauv hloov nyuam yaus lubneej txhua hnub, thiab tawg paj txi txiv, kom nyuam yaus lubneej yog timkhawv rau Koj Txojlus lub hwjchim. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tabtom ntshaw txais yuav Vajtswv Txojlus zoo licas?
Nyeem Vajluskub hauv peb lub xyoos: Loos 5
Kênh Youtube BHKTHN:
