Klei Aê Diê Blŭ: Y-Yakơ 1:19-21
Êlan kliăng: “…leh anăn brei diih mă tŭ hŏng ai tiê êdu êun klei blŭ pla leh hlăm diih. Klei blŭ anăn dưi bi mtlaih mngăt diih” (Y-Yakơ 1:21)
Klei êmuh ksiêm mĭn: Si knuih phung đăo mă tŭ Klei Aê Diê Blŭ? Si bruă Klei Aê Diê Blŭ hlăm klei hdĭp phung đăo kơ Krist? Si drei ngă čiăng dưi mă tŭ nanao Klei Aê Diê Blŭ?
Y-Yakơ mtă kơ phung đăo: “djăl hmư̆, amâo ruăt blŭ, amâo djăl ăl” (êlan 19). Mrâo dlăng, anei jing klei bhiăn djŏ kơ klei bi blŭ hrăm. Ƀiădah tinei Y-Yakơ amâo čiăng lač kơ klei hmư̆ yang đar ôh ƀiădah čiăng kñăm kơ klei hmư̆ “klei blŭ pla leh hlăm diih. Klei blŭ anăn dưi bi mtlaih mngăt diih” (êlan 21). “Klei Blŭ” lač tinei jing klei sĭt nik, jing Klei Blŭ Aê Diê. Tơdah mă tŭ Klei Aê Diê Blŭ, Y-Yakơ brei ngă dŭm mta snei: tal sa, brei “djăl hmư̆”. Anăn jing knuih khăp čiăng, kăp răng leh anăn mă tŭ mtam tơdah mâo mmông găl. Tal dua, “amâo ruăt blŭ”, čiăng lač kơ klei mđing bi nik kơ klei pô dôk hmư̆, amâo djŏ ôh knŏng mĭn kơ klei pô mĭn leh anăn ruăt blŭ. Tal tlâo, “amâo djăl ăl”, čiăng lač bi êdah klei gưt kơ Klei Aê Diê Blŭ wăt tơdah hlăm anăn mâo klei drei amâo mâo khăp amâodah klei blŭ anăn amâo djŏ hŏng ai tiê drei ôh. Knŏng tơdah amâo djăl ăl, brei Klei Aê Diê Blŭ ktrâo brei klei soh, klei wê, snăn kơh drei “dưi lui hĕ jih klei čhŏ mrŏ leh anăn klei măk ƀai”, leh anăn snăn kơh drei dưi hdĭp bi mơak kơ Khua Yang tui si klei kpă ênô Ñu. Anăn yơh jing knuih “mă tŭ hŏng klei êdu êun” (êlan 21), mă tŭ hŏng ai tiê mơak leh anăn brei Klei Aê Diê Blŭ mă bruă hŏng klei êngiê.
Boh klă gơ̆ Klei Aê Diê Blŭ “pla” leh hlăm grăp čô phung đăo, čiăng lač drei mă tŭ leh klei sĭt nik leh anăn bi knal leh klei bi mtlaih tơdah drei mă tŭ hŏng klei đăo. Ƀiădah amâo djŏ knŏng mjưh mă tăp anăn ôh, Klei Aê Diê Blŭ ăt jing mnơ̆ng ƀơ̆ng huă kơ mngăt mơh, đru čiêm rông klei hdĭp myang drei ƀrư̆ hruê ƀrư̆ đĭ hriê kơ prŏng, čiăng kơ drei mâo klei bi mlih leh anăn jing msĕ si Khua Yang hĭn grăp hruê. Klei Aê Diê Blŭ “pioh mtô, ƀuah, mkra, leh anăn bi hriăm arăng klei kpă ênô, čiăng kơ mnuih Aê Diê dưi jing klă, mâo klei mprăp leh dưi ngă djăp mta bruă jăk” (II Y-Timôthê 3:16-17). Tơdah mă tŭ Klei Aê Diê Blŭ, klei drei bi mguôp hŏng Aê Diê srăng sĭt suôr hĭn, drei srăng thâo săng klei Aê Diê čiăng leh anăn hdĭp bi mơak kơ Ñu.
Brei drei mă tŭ Klei Aê Diê Blŭ grăp hruê, mă tŭ nanao jêñ jêñ leh anăn sĭt suôr. Brei grăp čô drei pioh sa mmông leh anăn sa bĭt anôk amâo mâo mlih ôh, tui si mmông grăp čô dăp leh čiăng dlăng leh anăn hriăm Klei Aê Diê Blŭ. Êngao tinăn, klei dlăng hră klei hriăm Klei Aê Diê Blŭ, hriăm hlăm adŭ hriăm Klei Aê Diê Blŭ, amâodah hriăm Klei Aê Diê Blŭ hŏng êpul đơ điêt…, jih jang jing êlan tŭ dưn pioh kơ drei mă tŭ Klei Aê Diê Blŭ sơăi. Klei yuôm jing brei drei mâo ai tiê êpa mhao khăp hriăm leh anăn mă tŭ Klei Aê Diê Blŭ hlăm jih jang mmông găl Aê Diê brei.
Si ngă drei dôk êpa mhao mă tŭ Klei Aê Diê Blŭ?
Wah lač: Ơ Khua Yang, đru kâo hmư̆ leh anăn mă tŭ Klei Ih Blŭ hŏng klei êdu êun leh anăn gưt asăp. Brei Klei Ih Blŭ jing Klei Blŭ pla leh hlăm kâo, dưi đĭ hriê kơ prŏng, bi mlih klei hdĭp kâo grăp hruê, bi mnga leh anăn mboh, čiăng klei hdĭp kâo jing mnơ̆ng hưn bi sĭt kơ klei myang Klei Ih Blŭ. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Rôm 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
