Klei Aê Diê Blŭ: II Klei Yăl Dliê 29:1-3
Êlan kliăng: “Ơ Yêhôwa, êjai aguah Ih hmư̆ asăp kâo; êjai aguah kâo srăng wah lač kơ Ih leh anăn dôk kăp guôn.”(Klei Mmuñ Hđăp 5:3)
Klei êmuh ksiêm mĭn: Si ngă arăng bi mni kơ Mtao Y-Hêsêkia? Ya bruă ñu ngă tal êlâo hĭn tơdah ñu dơ̆ng kiă kriê? Grăp hruê tơdah drei amâo hriê kơ Khua Yang ôh êlâo hĭn snăn si klei hdĭp leh anăn mngăt drei srăng jing?
Leh hưn mdah klei hdĭp leh anăn bruă Mtao Y-Hêsêkia ngă, pô čih hră Klei Yăl Dliê blŭ klei bi mni mtam, “Ñu ngă klei djŏ ti anăp ală Yêhôwa tui si jih jang klei aê ñu Y-Đawit ngă leh” (êlan 2). Hlăm hră Klei Yăl Dliê knŏng Mtao Y-Hêsêkia leh anăn Mtao Y-Jôsia mâo klei bi mni jing jăk msĕ si Mtao Y-Đawit kyuadah digơ̆ hdĭp tui si knuih Y-Đawit, hŏng jih ai tiê khăp leh anăn mă bruă kơ Aê Diê. Ama Mtao Y-Hêsêkia jing sa čô mtao jhat ƀai, khăp kơ klei kkuh mpŭ kơ rup yang. Wăt snăn dưn mơh, hlăm klei hdĭp myang Mtao Y-Hêsêkia amâo mâo tŭ klei bi hmăi mơ̆ng ama ñu ôh ƀiădah tŭ klei bi hmăi mơ̆ng phung huĭ mpŭ kơ Aê Diê leh anăn mơ̆ng phung dôk sĭt suôr hŏng ñu. Hră Klei Yăl Dliê amâo brei thâo ôh hlei pô bi hmăi kơ Mtao Y-Hêsêkia ƀiădah drei thâo pô anăn jing H’Abija, amĭ ñu. H’Abija jing anak mniê Y-Sakari sa čô thâo săng klei bi ƀuh mơ̆ng Aê Diê leh anăn jing pô kčĕ kơ Mtao Y-Usia, jing aê aprŏng Mtao Y-Hêsêkia (II Klei Yăl Dliê 26:5; Y-Êsai 8:2). Hlăm ênuk mmăt tĭt phung Yuđa hlăk Mtao Y-Ahas, ama ñu adôk kiă kriê leh anăn phung ƀuôn sang kkuh mpŭ kơ rup yang ƀiădah Aê Diê ăt mă bruă leh anăn dưm hlăm ai tiê Y-Hêsêkia anak êkei mtao leh anăn phung mah jiăng sĭt suôr hŏng ñu klei khăp leh anăn klei êpa mhao čiăng kkuh mpŭ kơ Aê Diê.
Hlăk mrâo dơ̆ng kiă kriê mtam, mlan tal êlâo thŭn tal sa, Mtao Y-Hêsêkia pŏk ƀăng bhă sang Aê Diê leh anăn lŏ mkra. Êlâo dih, ama ñu kđăl leh ƀăng bhă sang Aê Diê kyuanăn phung ƀuôn sang amâo lŏ kkuh mpŭ kơ Aê Diê ôh. Ară anei hin, bruă tal êlâo hĭn Mtao Y-Hêsêkia čiăng ngă jing lŏ mkŏ mjing klei kkuh mpŭ kơ Aê Diê hlăm sang Aê Diê leh anăn klei anăn jing klei ñu dưm êlâo hĭn hlăm klei hdĭp ñu.
Hŏng phung đăo, hruê tal sa hlăm hruê kăm drei nao kơ sang kkuh mpŭ čiăng kkuh mpŭ kơ Aê Diê. Bi hruê mkăn hlăm hruê kăm, kyua mñik mñak hŏng klei duah ƀơ̆ng huă kyuanăn drei kđăl krĭp ƀăng bhă ai tiê drei, amâo čiăng pŏk ngă klei bi mguôp hŏng Aê Diê leh anăn mă tŭ klei mngač mơ̆ng klei Ñu blŭ ôh. Sui thŭn, klei pŏk ai tiê ƀrư̆ hruê ƀrư̆ jing dleh hĭn, msĕ si ƀăng bhă sui hruê amâo tuôm pŏk, ƀruih gam leh anăn bring jiă pŏk dleh snăk. Hlăk anăn drei mưng leh hŏng klei amâo wah lač leh anăn dlăng Klei Aê Diê Blŭ grăp hruê, drei knŏng khăp mĭn kơ bruă lăn ala. Păt čiăng jih jang sang Aê Diê pioh sơăi mmông wah lač aguah ưm čiăng jih jang phung bi đru đăo dưi hriê mbĭt mđrăm blŭ hrăm hŏng Khua Yang, tơdah dưi prăp êmiêt snăn brei grăp čô drei gĭr hriê bi mguôp mbĭt. Pŏk ai tiê blŭ hrăm hŏng Khua Yang leh anăn brei Klei Ñu Blŭ mtrang mngač grăp hruê jing klei brei drei dưm êlâo hĭn hlăm klei hdĭp grăp čô drei.
Ya bruă drei ngă êlâo hĭn grăp blư̆ kgŭ pĭt aguah?
Wah lač: Ơ Khua Yang, tơdah kâo lui leh klei mưng hriê kơ Ih grăp hruê êjai aguah ưm, snăn đru kâo lŏ mkŏ mjing klei mưng anăn hlăm klei hdĭp kâo leh anăn dlăng kơ klei anăn jing klei dưm êlâo hĭn grăp hruê hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
