II Xwmtxheej 29:1-3
Nqe cim:
“Koj yeej hnov kuv lub suab thov thaum sawv ntxov; thaum lub hnub tawm tuaj kuv thov koj thiab tos rawv koj teb kuv.” (Ntawv Nkauj 5:3)
Lug nug rau sawvdaws xav:
– Vajntxwv Hexekiyas tau qhuas licas?
– Yam xubthawj nws ua thaum sawv ua vajntxwv yog dabtsi?
– Txhua hnub yog peb tsis tuaj cuag tus Tswv ua ntej txhua yam ces lubneej thiab tus ntsujplig yuav zoo licas?
Tomqab uas sau qhia txog vajntxwv Hexekiyas lubneej, tus sau phau Xwmtxheej txawm sau qhuas vajntxwv tamsim ntawd hais tias: “Hexekiyas ua lub neej raws li tus TSWV lub siab nyiam, ib yam li nws yawgkoob uas yog Vajntxwv Daviv” (nqe 2). Nyob hauv phau Xwmtxheej tsuas muaj vajntxwv Hexekiyas thiab vajntxwv Yauxiyas thiaj tau qhuas hais tias zoo ib yam li vajntxwv Daviv vim nkawd tau ua lubneej raws nraim li vajntxwv Daviv tus cwjpwm, hlub thiab ua tus Tswv tes haujlwm kawg siab kawg ntsws. Vajntxwv Hexekiyas txiv yog ib tug vajntxwv uas phem heev, qaug quav rau kev pe mlom. Tiamsis, vajntxwv Hexekiyas txojkev ntseeg tsis raug cuam tshuam vim nws txiv tej kev phem, nws kev ntseeg cuamtshuam los ntawm cov neeg uas hwm tus Tswv thiab nyob ze nws. Phau Xwmtxheej tsis sau txog leejtwg yog tus muaj kev cuamtshuam rau vajntxwv tiamsis peb pom hais tias qee zaug yog Anpiyas, uas yog nws niam. Anpiyas yog Xakhaliyas uas yog vajntxwv Amaxiyas tus tuav xam tus ntxhais (II Xwmtxheej 26:5; Yaxayas 8:2). Nyob rau ntu sijhawm Ahas uas yog Hexekiyas txiv ua vajntxwv kav, tebchaws Yudas nyob tsaus ntuj nti vim nws thiab cov pejxeem pe mlom, tiamsis tus Tswv yeej tseem ua haujlwm thiab pub rau Hexekiyas nrog rau nws cov txheeb ze muaj ib nplooj siab kub lug rau tus Tswv thiab nqhis nqhawv pehawm Nws.
Thaum nyuam qhuav sawv ua vajntxwv, nyob hauv thawj lub hli ntawm xyoo thib ib, vajntxwv Hexekiyas mus qhib lub Tuamtsev tej roojvag thiab rov kho dua tshiab. Thaum ntej, nws txiv tau muab lub Tuamtsev tej roojvag kaw cia lawm, cov pejxeem thiaj tsis tau mus pehawm tus Tswv. Nimno, yam xubthawj vajntxwv Hexekiyas ua yog rov txhim kho kev pehawm tus Tswv hauv lub Tuamtsev thiab ntawd yog yam tseemceeb tshajplaws ntawm vajntxwv lubneej.
Hais txog cov ntseeg Tswv Yexus, thawj hnub hauv lub asthiv peb tuaj pehawm tus Tswv hauv lub Tuamtsev. Tiamsis lwm hnub nyob hauv lub asthiv, vim muaj haujlwm ntau tsis khoom qee zaug peb tau kaw tus kheej lub qhov rooj siab, tsis qhib los nrog tus Tswv sib txuas lus thiab txais tos Nws tej lus. Ua mus ua tuaj, kev qhib peb lub qhov rooj siab ib hnub khwv zuj zus, zoo li lub qhov rooj uas ntev hnub tsis siv, raug paug hmoov av thiab raug xeb ua rau qhib khwv. Thaum ntawd peb yuav swm qhov uas tsis thov Vajtswv thiab nyeem Vajluskub txhua hnub, tsuas cia tus kheej qaug mus rau lub ntiajteb tej haujlwm lawm xwb. Feem ntau cov Pawg Ntseeg puavleej muaj sijhawm thov Vajtswv txhua hnub kom tus Tswv cov menyuam tau tuaj hauv Tuamtsev nrog tus Tswv sib txuas lus, yog npaj tau ces tsimnyog peb yuav tsum mus koom. Qhov uas qhib qhov rooj siab kom tau sib txuas lus nrog tus Tswv thiab cia Nws Txojlus taw qhia txhua hnub yuav tsum yog yam tseemceeb tshajplaws hauv peb txhua tus lubneej.
Thov Vajtswv,
Tus Tswv, yog nyuam yaus hnov qab tuaj cuag Koj txhua tagkis, cev thov pub nyuam yaus rov txhim kho lubneej thiab saib qhov ntawd yog yam tseemceeb tshajplaws hauv txhua hnub. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Yam xubthawj uas peb ua thaum sawv ntxov yog dabtsi?
Nyeem Vajluskub hauv peb lub xyoos: Pajlug 14
Kênh Youtube BHKTHN:
