Klei Aê Diê Blŭ: Klei Čŏk Hia 4:1-16
Êlan kliăng: “Yêhôwa pô prah prŭng digơ̆ leh, Ñu amâo srăng lŏ răng kriê kơ digơ̆ ôh. Arăng amâo bi êdah klei mpŭ ôh kơ phung khua ngă yang, kăn bi êdah klei pap rei kơ phung mduôn” (Klei Čŏk Hia 4:16)
Klei êmuh ksiêm mĭn: Khua pô hưn êlâo Y-Yêrêmi lač kơ klei hdĭp phung ƀuôn sang Aê Diê ruah ară anei mdê hŏng hruê êlâo si ngă? Mta phŭn mơ̆ng ya klei phung ƀuôn sang Aê Diê tŭ klei dleh dlan snăn? Ya klei hriăm mơ̆ng hƀuê ênuk anei mñă kơ drei?
Dŭm hlâo rup mdê mdê mâo Khua pô hưn êlâo Y-Yêrêmi čih brei ƀuh klei hdĭp phung ƀuôn sang Aê Diê ruah wưng ară anei dleh dlan snăk, mdê snăk hŏng wưng êlâo anăn. Mah tuôm dưi yua bi hmô kơ phung ƀuôn sang Aê Diê kyua klei yuôm bhăn leh anăn yuôm, ară anei “mah luč leh klei mngač ñu, mah doh bi mlih leh”, Boh tâo yuôm dưi pia jing doh jăk ară anei tuh ti dŭm ktuê êlan msĕ si mnơ̆ng amâo mâo yuôm ôh leh anăn amâo mâo hlei pô čiăng mă yua ôh (êlan 1-2). Hlăk đưm jăk siam, yuôm bhăn, doh jăk, “Ară anei ƀô̆ mta diñu jing jŭ hĭn kơ uê pui, arăng amâo thâo kral diñu ôh ti êlan; klĭt diñu kdjuôt ti dlông klang diñu, jing krô msĕ si djuh” (êlan 8). Boh klei dleh dlan anei amâo djŏ knŏng truh hŏng phung ƀuôn sang ôh ƀiădah wăt kơ phung mdrŏng sah, jing “…phung arăng rông leh hŏng čhiăm hrah jŭ” ăt tŭ sa klei dleh dlan mơh.
Bŏ hŏng ênguôt hnĭng, pap mñai kơ phung ƀuôn sang Aê Diê tơdah hlăm boh klei knap mñai ară anei ngă kơ phung jing amĭ êlâo dih mâo nanao klei bi mni kơ klei khăp, klei săn asei kơ phung anak, ară anei kăn hmao mơh phung asâo tan kyua diñu amâo mđing kriê dlăng phung anak pô ôh, amâo djŏ knŏng dŭm năn ôh lŏ ƀai tơl tŭk ksă anak pô mjing mnơ̆ng ƀơ̆ng huă! (êlan 3-4, 10). Boh klei ư̆ êpa jing klei truh, sa klei rŭng răng kjham đei kơ phung ƀuôn sang Aê Diê, tơl mâo klei bi msĕ snei: “Phung djiê kyua đao gưm jing mơak hĭn kơ phung djiê kyua klei ư̆ êpa…” (êlan 9). Phung ƀuôn sang Aê Diê hdĭp hlăm klei knap mñai anei jing kyua klei soh diñu ngă leh hŏng Aê Diê. Amâo djŏ knŏng dŭm năn ôh, jih jang phung khua pô hưn êlâo leh anăn phug khua ngă yang ăt ngă soh mơh, bi tuh êrah mnuih kpă ênô ti krah ƀuôn prŏng, amâo jhŏng kngưr ƀô̆ mta ôh tơdah mŭt hlăm Sang yang kkuh mpŭ kơ Aê Diê. Kyua anăn Yêhôwa ngêñ kơ diñu, amâo srăng lŏ răng kriê čiăng đru ôh (êlan 13-16).
Jăk mơak snăk kơ klei hdĭp, lăn čar mâo Yêhôwa răng kriê leh anăn hơêč hmưi. Ƀiădah bŏ hŏng dleh dlan, huĭ hyưt kơ hlei pô Ñu hngah kyua klei soh pô ngă soh ƀiădah amâo kmhal. Klei hriăm ênguôt hnĭng mơ̆ng hƀuê ênuk phung ƀuôn sang Israel mñă kơ grăp čô drei hruê anei brei thâo răng ksiêm dlăng klei hdĭp pô čiăng amâo lŏ kma hlăm klei soh ôh leh anăn tŭ klei bi kmhal huĭ hyưt mơ̆ng Pô Doh Jăk, Kpă Ênô.
Drei dôk thâo kơ klei hdĭp jăk mơak tơdah dưi dôk hlăm klei Aê Diê răng kriê mơ̆?
Wah lač: Ơ Aê Diê năng huĭ mpŭ! Kâo klă sĭt ƀuh klei huĭ hyưt tơdah klei hdĭp kâo amâo mâo Aê Diê răng kriê, kyua anăn akâo kơ Ih đru kâo hmao kmhal klei soh, amâo dôk tram hlăm klei soh ôh, čiăng mâo Ih pap brei, bi mrâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
