Nkauj Quaj Ntsuag 4:1-16
Nqe cim:
“Tus TSWV yeej tsis mob siab txog lawv;nws thiaj muab lawv ntiab mus nyob ua sab ua sua. Nws yeej tsis xam txog peb cov povthawj thiab cov thawjcoj li lawm.” (Nkauj Quaj Ntsuag 4:16)
Lus nug rau sawvdaws xav:
– Tus cev lus Yelemis piav txog haivneeg tau xaiv lub neej tamsim no txawv yav dhau los li cas?
– Vim dab tsi Vajtswv haivneeg raug tiv kev txom nyem li ntawd?
– Zaj kawm los ntawm keeb kwm no ntuas peb yam dab tsi?
Txhua nkawm duab sib txawv uas Yelemis hais ua ntu zus pom nws haivneeg tau xaiv lub neej raug txomnyem kawg nkaus, txawv deb lub neej yav dhau los. Kub tau muab piv rau Vajtswv haivneeg vim zoo nkauj thiab muaj nqis, tiamsis nimno “…kub tsis ci lawm; tej pobzeb uas ua lub Tuamtsev pob poob pawglug rau hauv tej kev” tsis muaj nqis lawm tsis muaj leejtwg xav yuav (nqe 1-2). Yav dhau los zoo nkauj, muaj nqis zoo, dawb huv, “Nimno lawv pw pawglug hauv tej kev tsis muaj neeg paub, lawv tej ntsejmuag dub nciab vim twb tuag lawm; lawv tej tawv qhuav ib yam li tawv ntoo qhwv nkaus lawv tej txha,” (nqe 8). Tej kev txomnyem no los rau txhua tus thiab txhua hom neeg huv tibsi “Cov neeg uas ibtxwm npluanuj yuav mus fawb zaub mov ntawm tej chaw pov liamsim noj” txhua tus zoo tib yam.
Yog ib qhov mob siab tiag tiag rau Vajtswv haivneeg hauv txoj kev txomnyem loj lub sijhawm tamsim no, ua rau leej niam uas yav tas los tau qhuas hais tias, yog leej niam muaj kev hlub nws tej menyuam tiamsis tam sim no lawv twb piv tsis tau ib tug maum hma vim lawv tsis quav ntsej txog lawv tej me nyuam, thiab tsis tas li ntawd xwb, lawv tseem muab lawv tej menyuam tua los ua zaub mov noj! (nqe 3–4, 10). Txoj kev tshaib nqhis yog ib qho teeb meem, txaus ntshai heev tsis txawj hnov qab nyob rau hauv Vajtswv haivneeg, txog qib uas muaj kev sib piv hais tias:“Cov neeg uas tuag rau hauv tshavrog zoo tshaj cov uas yoo tshaib yoo nqhis tuag..” (nqe 9). Qhov uas Vajtswv haivneeg raug nyob rau hauv txoj kev txomnyem los vim lawv tej kev txhaum uas tau ua tawmtsam Vajtswv. Tsis tas li ntawd xwb, tagnrho cov cev lus, cov povthawj puavleej ua txhaum, tua cov neeg ncaj ncees kiag rau hauv plawv nroog, txhua tus puavleej ntshai thaum mus pehawm Vajtswv hauv lub Tuamtsev. Vim li ntawd, tus Tswv thiaj chim rau lawv thiab tsis xam pom txog lawv ntxiv lawm (nqe 13-16).
Yeej yog ib txoj koob hmoov zoo heev rau lub neej rau lub tebchaws twg uas tau Vajtswv xam pom thiab foom koob hmoov. Tiamsis kuj nyuaj siab thiab txaus ntshai heev rau cov uas raug Vajtswv tsis lees paub vim lawv tej kev txhaum, ua txhaum tsis kam lees txim. Zaj kawm los ntawm keebkwm haivneeg Yixalayees ntuas peb txhua tus niaj hnub nimno hais tias peb yuavtsum ua tib zoo tshuaj xyuas peb lub neej kom tsis txhob tsau tsawv rau hauv kev txhaum ntxiv thiaj yuav tsis raug Vajtswv tus uas dawbhuv ncaj ncees rau txim.
Thov Vajtswv:
Vajtswv tus dawbhuv, tus uas tsimnyog hwm thiab tsimnyog ntshai! Nyuam yaus paub hais tias yog lub neej Koj tsis xam pom lawm ces yuav txaus ntshai heev, yog li ntawd thov pab nyuam yaus thaum tau ua txhaum ces paub hloov siab lees txim tam sim ntawd, kom tau Koj zam txim thiab kho dua tshiab. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas tau saj lub neej uas muaj kev zoo siab txaus siab thaum uas Vajtswv xam pom peb?
Nyeem Vajluskub hauv peb lub xyoos: Cov Thawjtswj 11
Kênh Youtube BHKTHN:
