Titus 1:1-2
Nqe cim:
Kuv yog Paulus uas yog Vajtswv tus tubtxib thiab yog Yexus Khetos tus timthawj. Vajtswv xaiv kuv thiab txib kuv mus pab cov neeg uas Vajtswv tau xaiv cia lawm, thiab qhia kom lawv paub txojlus tseeb uas peb ntseeg (Titus 1:1 HWB)
“Kuv yog Povlauj, yog Vajtswv tus qhev thiab yog Yexus Khetos tus tubtxib uas pab cov uas Vajtswv xaiv cia lawd txojkev ntseeg thiab pab lawv paub qhov tseeb uas raws li Vajtswv txojkev” (Titus 1:1 HMOWSV))
Lus nug rau sawvdaws xav:
– Lub luag haujlwm ntawm Paulus yog dab tsi thiab muaj lub ntsiab li cas?
– Kev ntseeg thiab kev paub qhov tseeb muaj kev sib txuas li cas thiab tau nqi zog dab tsi?
– Peb muaj kev ntseeg thiab kev paub qhov tseeb li cas?
Qhib thawj ntawm tsab ntawv sau rau Titus uas yog tus tub tseeb hauv kev ntseeg, timthawj Paulus qhia meej nws lub luag haujlwm yog “… mus pab cov neeg uas Vajtswv tau xaiv cia lawm, thiab qhia kom lawv paub txojlus tseeb…”. Vim qhov no Paulus hu nws tias“Kuv yog Paulus uas yog Vajtswv tus tubtxib thiab yog Yexus Khetos tus timthawj” (nqe 1). Kev ntseeg thiab kev paub qhov tseeb yog ob yam uas mus ua ke los pab ib tug tibneeg txais yuav txojsia ib txhis. Tub qhe yog txoj haujlwm qis tshaj los ua haujlwm rau tus tswv, lossis kuj txhais hais tias ua qhev rau tus tswv. Cov ntseeg txhua tus tau los ua “Vajtswv cov tub qhe” vim tau Yexus Khetos cov ntshav txhiv los, “Tiamsis nimno Vajtswv twb tso nej dim ntawm txojkev txhaum los ua Vajtswv cov tubqhe lawm” (Loos 6:22; 1 Kauleethaus 6:20). Peb txhua tus kuj yuav tsum lees txais lub luag haujlwm ntawm kev coj lwm tus los ntseeg Vajtswv thiab paub txog qhov tseeb.
Lub hom phiaj ntawm Paulus lub neej, kuj yog lub hom phiaj ntawm tes hauj lwm uas Vajtswv cob, “qhia kom lawv paub txojlus tseeb uas peb ntseeg lawv thiaj yuav tau txojsia ntev dhawv mus ibtxhis. Thaum uas tsis tau tsim lub ntiajteb, Vajtswv coglus tseg hais tias nws yuav pub txojsia ntawd rau peb, nws hais li ntawd nws yeej tsis dag li” (nqe 1-2). “paub txojlus tseeb” thiab “tau txojsia ntev dhawv mus ibtxhis” yog nqe zog ntawm kev ntseeg thiab kev paub qhov tseeb. Vim lub neej muaj kev paub qhov tseeb ces muab siab rau ntseeg. Ntawd yog yog ib txoj kev ntseeg muaj lub chaw cia siab rau txojsia ib txhis. Thaum ib tugneeg paub meej qhov tseeb txog txojsia ib txhis uas Vajtswv tab pov rau txhua tus uas ntseeg Nws ces tus ntawd yuav sawv ruaj thiab yim hnub yim loj hlob rau hauv kev ntseeg Vajtswv.
Kev ntseeg tsis paub qhov tseeb yog kev ntseeg dig muag. Paub qhov tseeb tsis ntseeg ces yeej tsis tau txais txojsia ibtxhis. Ib tus tibneeg tsis muaj kev ntseeg, yuav tsis tau txoj sia ibtxhis ib zaug li. Kom tau txoj sia ibtxhis, peb txhua tus yuav tsum muaj kev ntseeg Yexus thiab paub qhov tseeb. Lub ntsiab yog peb yuavtsum tau hnov txoj Moo Zoo cawmdim, totaub thiab ntseeg. Los ntawm kev ntseeg, peb yuavtsum qhia tawm txoj kev ua neej ntseeg Vajtswv. Yuavtsum nyeem, kawm Vajlugkub ntxiv kom paub Vajtswv ntau ntxiv. Kev paub Vajtswv yuav pab kom peb muaj kev ntseeg ruaj rau hauv Vajtswv mus txog thaum peb ntsib Nws thiab thiaj li ua tau lub luag haujlwm ntawm kev coj txhua tus uas Vajtswv xaiv lawm los ntseeg thiab paub qhov tseeb.
Thov Vajtswv:
Tus Tswv, nyuam yaus ua Koj tsaug uas txhiv nyuam yaus thiab pub nyuam yaus tau ua Koj tub qhe. Thov Koj pab nyuam yaus loj hlob rau hauv kev ntseeg ntawm Vajtswv, thiab pab tau txhua tus ib ncig ntawm nyuam yaus los ntseeg, paub Vajtswv, kom tau txais txoj sia ib txhis, thiab ua neej raws Koj siab nyiam. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmoov tshua,
Peb pab tau lwm tus muaj kev ntseeg rau ntawm Vajtswv thiab paub qhov tseeb li cas?
Nyeem Vajluskub hauv peb lub xyoos: Cov Thawjtswj 9
Kênh Youtube BHKTHN:
