Klei Aê Diê Blŭ: Y-Tit 1:1-2
Êlan kliăng: “Kâo gơ̆ Y-Pôl, sa čô dĭng buăl Aê Diê leh anăn khua ƀĭng kna Yêsu Krist, Aê Diê tiŏ nao čiăng bi mđĭ klei đăo phung Aê Diê ruah leh anăn klei diñu thâo săng klei sĭt nik bi djŏ hŏng klei thâo mpŭ kơ Aê Diê” (Y-Tit 1:1)
Klei êmuh ksiêm mĭn: Si bruă klam Khua ƀĭng kna Y-Pôl leh anăn ya klei yuôm bhăn? Klei đăo leh anăn klei thâo săng klei sĭt nik mâo ya klei bi mguôp leh anăn ya boh tŭ dưn mâo? Si drei mâo klei đăo leh anăn klei thâo săng klei sĭt nik?
Mphŭn pŏk hră čih kơ Y-Tit jing anak sĭt nik hlăm klei đăo, Khua ƀĭng kna Y-Pôl bi mklă bruă klam ñu jing “bi mđĭ klei đăo phung Aê Diê ruah leh anăn klei diñu thâo săng klei sĭt nik, …”. Kyua bruă anei ñu hưn pô jing “dĭng buăl Aê Diê leh anăn khua ƀĭng kna Yêsu Krist” (êlan 1). Klei đăo leh anăn klei thâo săng klei sĭt nik jing dua klei nao mbĭt čiăng đru kơ sa čô mnuih mâo klei hdĭp lă lar. Dĭng buăl jing bruă ti gŭ hĭn čiăng mă bruă kơ khua, dưi mblang jing hlŭn. Jih jang phung đăo jing “dĭng buăl Aê Diê” kyua dưi bi tui hŏng êrah Yang Krist, “êngiê leh mơ̆ng klei soh diih leh anăn jing leh hlŭn kơ Aê Diê” (Rôm 6:22; I Kôrantô 6:20). Grăp čô drei ăt tŭ bruă klam ba pô mkăn hriê kơ klei đăo hlăm Khua Yang leh anăn thâo săng klei sĭt nik.
Hdră kñăm klei hdĭp Khua ƀĭng kna Y-Pôl, ăt jing hdră kñăm bruă klam Aê Diê jao “bi djŏ hŏng klei thâo mpŭ kơ Aê Diê, hlăm klei čang hmăng kơ klei hdĭp hlŏng lar Aê Diê ƀuăn leh mơ̆ng lu ênuk êlâo — Ñu amâo tuôm luar ôh” (êlan 1-2). “Klei thâo mpŭ kơ Aê Diê” leh anăn “klei čang hmăng kơ klei hdĭp hlŏng lar Aê Diê ƀuăn” jing boh tŭ mơ̆ng klei đăo leh anăn thâo săng klei sĭt nik. Kyua sa klei hdĭp mâo klei thâo săng klei sĭt nik srăng mâo “klei thâo mpŭ kơ Aê Diê”, amâodah lŏ pia jing knuih hdĭp huĭ mpŭ. Mơ̆ng anăn srăng truh kơ sa klei đăo dưm ti atur klei čang hmăng kơ klei hdĭp hlŏng lar. Leh anăn tơdah sa čô mnuih mâo klei thâo săng klă mngač, klă sĭt kơ klei hdĭp hlŏng lar jing klei hdĭp dưi rơ̆ng kyua Aê Diê kpă ênô, snăn klei đăo pô anăn lŏ kjăp hĭn čiăng lŏ dơ̆ng hriê kơ prŏng hlăm klei hdĭp huĭ mpŭ kơ Aê Diê.
Klei đăo ƀiădah amâo thâo săng klei sĭt nik jing klei đăo mmăt tĭt. Thâo săng klei sĭt nik ƀiădah amâo mâo klei đăo jing mnuih amâo mâo klei đăo, amâo dưi mâo ôh klei hdĭp hlŏng lar. Čiăng mâo klei hdĭp hlŏng lar snăn grăp čô drei brei mâo klei đăo leh anăn klei thâo săng klei sĭt nik. Jing brei drei mđing hmư̆ Klei Mrâo Mrang Jăk bi mtlaih, thâo săng leh anăn đăo. Mơ̆ng klei đăo brei bi êdah sa knuih hdĭp huĭ mpŭ kơ Aê Diê. Brei dlăng, hriăm Klei Aê Diê Blŭ lu hĭn čiăng thâo săng tui hlue Khua Yang lu hĭn. Mơ̆ng klei thâo săng Aê Diê, srăng đru drei kjăp hĭn hlăm klei đăo kơ Aê Diê truh kơ bi tuôm hŏng Ñu leh anăn kơh dưi ngă bruă klam ba phung Aê Diê ruah kơ klei đăo leh anăn klei thâo săng klei sĭt nik.
Si drei đru phung mkăn dưm klei đăo hlăm Khua Yang leh anăn thâo săng klei sĭt nik?
Wah lač: Ơ Khua Yang, kâo bi mni kơ Ih bi tui leh kâo leh anăn brei kâo jing dĭng buăl Ih. Akâo kơ Ih đru kâo hriê kơ prŏng hlăm klei huĭ mpŭ, leh anăn đru phung riêng gah kơ klei đăo, klei thâo săng Aê Diê, mă tŭ klei hdĭp hlŏng lar leh anăn hdĭp bi mơak kơ Ama. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
